सौरभ बेंडाळे, कॉलेज क्लब रिपोर्टर
दिवाळी म्हटल्यावर घरी आलेल्या पाहुणेमंडळींच्या गाठीभेटींत चार घास जास्तच खाल्ले जातात. बदलती जीवनशैली, बैठे काम, तसेच व्यायामाच्या अभावामुळे तेल, तुपाचे, तसेच गोड पदार्थ असलेल्या दिवाळीचा फराळ शरीरास त्रासदायक ठरू शकतात. त्यामुळे दिवाळसणाला आरोग्याला हितकारक फराळाची चव चाखता यावी यासाठी डाएट फराळाची मागणी वाढत आहे. या फराळाबाबत माहिती जाणून घेण्यासाठी डाएटीशनकडे नाशिककरांचा ओघ वाढला आहे. अनेक जण आपली शंका विचारून घेत नेमका काय फराळ असावा, हे आहारतज्ज्ञांना विचारत आहेत.
शहरात अनेक ठिकाणी डाएट फराळ विक्रीस उपलब्ध झाला आहे. तयार फराळ खरंच डाएटफुल असेल का याची शाश्वती नसल्याने गृहिणी आचाऱ्यांकडून डाएट फराळ बनवून घेत आहेत. हेल्थ कॉन्शियस व्यक्तींनाही या डाएट फराळाचा आस्वाद घेता येणार आहे. दिवाळीच्या फराळात तेलातुपाचे प्रमाण जास्त असल्यामुळे बऱ्याच घरांमध्ये फराळ तयाराना विशेष काळजी घेतली जात आहे. बाजारात डाएटचे पदार्थ मिळू लागल्याने डाएट करणाऱ्यांसाठी या ऑइल फ्री फराळाचा पर्यायाला पसंती मिळत आहे. दिवाळीच्या फराळाचा आस्वाद घेताना आपल्या प्रकृतीकडे दुर्लक्ष होता कामा नये, यासाठी डाएट फराळाबरोबरच शुगर फी मिठाईदेखील बाजारात उपलब्ध आहे. या फराळाच्या किमती अन्य फराळाच्या तुलनेत १० टक्क्यांनी जास्त आहे. महिला गृहोद्योग, बचत गट यांनीही यंदा मागणीनुसार डाएट फराळ बनविले असून १००-१५० रुपयांना लहान पॅकेटमध्ये हे फराळ बाजारपेठेत उपलब्ध आहेत. डाएट फराळामध्ये कमी कॅलरीज असलेल्या करंज्या, गव्हाचे व नाचणीचे पौष्टिक लाडू, मेथी-पालकचे शंकरपाळे यांना अधिक मागणी असल्याचे विक्रेत्यांनी सांगितले.
आरोग्यास बाधा आणत चविष्ट फराळावर ताव मारण्यापेक्षा फराळाच्या ताटापासून लांब राहिलेलेच परवडते. मात्र, डाएट फराळ उत्तम पर्याय आहे. हवी तशी चव बनवून घेत आरोग्य नीट राखता येते. इको फ्रेंडलीप्रमाणे डाएट आहाराची दिवाळी साजरी व्हावी.
- चारुलता नेमाडे, गृहिणी
---
डाएटचा फराळ खाताना किती प्रमाणात खात आहोत याकडे लक्ष दिले जावे. डाएट फराळ आचारी माणसाकडून स्वतः बनवून घ्यावा. शरीराची काळजी घेत डाएट फराळाचा आस्वाद घेणे चांगलेच. पण त्याचाही अतिरेक नको.
- डॉ. निशिगंधा वझे-दिवेकर, आहारतज्ज्ञ
मोबाइल अॅप डाउनलोड करा आणि राहा अपडेट