राजकीय पक्षांसह नाशिककरांना उत्सुकता असलेली महापालिका निवडणुकीची आरक्षण सोडत शुक्रवारी जाहीर झाली. यामुळे राजकीय वर्तुळात ‘कही खुशी कही गम’चे वातावरण निर्माण झाले. शहरातील ३१ प्रभागांमधील १२२ पैकी ६१ जागा महिलांसाठी राखीव झाल्या आहेत. प्रत्येक प्रभागातून दोन महिलांना संधी मिळणार आहे. अनुसूचित जातीसाठी १८, अनुसूचित जमातीसाठी ९, विशेष मागास प्रवर्गासाठी ३३ जागा राखीव झाल्या. यातही महिलांना समान आरक्षण देण्यात आले आहेत. तीन प्रभाग वगळता अन्य २९ प्रभागांमध्ये सर्वसाधारण उमेदवारांसाठी जागा खुल्या आहेत.
महापालिका आयुक्त अभिषेक कृष्णा यांच्या अध्यक्षतेखाली सकाळी अकरा वाजता महाकवी कालिदास कलामंदिरात आरक्षण सोडतीला सुरुवात झाली. प्रभागरचनेचे नागरिकांच्या सोयीसाठी प्रभागांचे नकाशे अगोदरच बाहेर लावले होते. त्यामुळे पदाधिकारी व नागरिकांनी अगोदरच आपल्या प्रभागाचे नकाशे बघूनच सोडतीच्या ठिकाणी प्रवेश केला. प्रशासनाने सोडतीचे योग्य नियोजन केल्याने किरकोळ आक्षेप वगळता आरक्षण सोडत निर्विघ्नपणे पार पडली. सुरुवातीला अनुसूचित जातीसाठी असलेल्या १८ जागांचे सोडत जाहीर काढण्यात आली. प्रभागांमधील अनुसूचित जातीच्या लोकसंख्येच्या आधारावर पुरुषांसाठी नऊ तर महिलांसाठी नऊ जागांची सोडत काढण्यात आली. त्यानंतर अनुसूचित जमातीच्या नऊ जागांपैकी सहा महिलांसाठी तर तीन पुरूषांसाठी राखीव झाल्या आहे.
विशेष मागास प्रवर्गातील ३३ जागांसाठी प्रशासनाला तारेवरची कसरत करावी लागली. ३१ प्रभागांमध्ये प्रत्येकी एक जागा ओबीसीसाठी आरक्षित केल्यानंतर उर्वरित दोन जागांसाठी चिठ्ठ्या काढण्यात आल्या. यात प्रभाग क्रमांक १५ व १९ मध्ये दोन जागा अतिरिक्त ओबीसीसाठी आरक्षित करण्यात आल्या. त्यासाठी विना आरक्षित प्रभागांमधून या जागा राखीव करण्यात आल्याने दोन प्रभागांमध्ये ओबीसीच्या दोन-दोन जागा राखीव झाल्या आहेत. सर्वात शेवटी सर्वसाधारण गटातील महिलांसाठी आरक्षण काढण्यात आले. त्यात ६२ जागांमधून सर्वसाधारण महिलांसाठी ३० जागा आरक्षित करण्यात आल्या आहेत.
इच्छुकांची भाऊगर्दी वाढणार
आरक्षण सोडतीने जवळपास २९ प्रभाग सर्वसाधारण गटांसाठी खुले असणार आहे. त्यामुळे या जागांमध्ये स्पर्धकांसह इच्छुकांची मोठी भाऊगर्दी वाढणार आहे. आरक्षणामुळे प्रभागांमधून बाद झालेले विद्यमान नगरसेवक सर्वसाधारण गटातून निवडणूक लढवू शकतात. त्यामुळे सर्वसाधारण जागांमध्ये चुरशीच्या लढती रंगणार असून राजकीय पक्षांसह अपक्षांचीही संख्या अधिक असणार आहे. त्यामुळे निवडणूक चुरशीची होणार असून प्रशासनालाही ती पार पाडण्यासाठी तारेवरची कसरत करावी लागणार आहे.
लोंढेच प्रभागातून ‘हद्दपार’
आरक्षणाचा सर्वाधिक फटका महापालिकेत सतत चारवेळा निवडून आलेले भारतीय रिपब्लिकन पक्षाचे (आठवले) जिल्हाध्यक्ष प्रकाश लोंढे यांना बसला आहे. त्यांचा प्रभाग क्रमांक ११ अनुसूचित जातीच्या महिलांसाठी आरक्षित झाला आहे. तर सर्वसाधारण गटातील जागाही महिलांसाठी राखीव झाली आहे. उर्वरित एक जागा अनुसूचित जाती तर दुसरी ओबीसीसाठी राखीव आहे. त्यामुळे प्रभागातून लोंढे हद्दपार झाले आहेत. त्यांना प्रभागातून कुटुंबातील महिलेला संधी द्यावी लागणार आहे. तसेच स्वत:साठी अन्य प्रभागातून चाचपणी करावी लागणार आहे.
वसंत गितेंवरून संभ्रम
महापालिकेत भाजपचे नेते वसंत गिते यांच्या प्रभागातील आरक्षणाकडे सर्वांचे लक्ष लागून होते. काठेगल्ली व भाभानगर परिसर नव्या रचनेत एकत्र झाला आहे. त्यातच प्रभाग क्रमांक १५ हा तीन सदस्यीय आहे. त्यामुळे या प्रभागातील आरक्षण सोडतीत तीनही जागा महिलांसाठी राखीव झाल्याचा संभ्रम निर्माण झाला होता. त्यामुळे गितेंचा पत्ता कट झाल्याची अफवा शहरात पसरली. मात्र, आयुक्तांनी प्रभाग १५ मधील दोनच जागा महिलांसाठी राखीव असल्याचे व एक जागा सर्वसाधारण असल्याचे स्पष्टीकरण दिल्याने अफवांचा बाजार थंडावला.
मोबाइल अॅप डाउनलोड करा आणि राहा अपडेट
