म. टा. वृत्तसेवा, नाशिकरोड
वीज कंपनीतील अधिकारी व कर्मचाऱ्यांनी आपल्या मागण्यांसाठी एकत्र येऊन लढा द्यावा, १४ ऑक्टोबरच्या धरणे आंदोलन व साखळी उपोषणात सहभागी व्हावे, असे आवाहन अधिकारी व कर्मचारी फोरमचे केंद्रीय कार्याध्यक्ष एम. बी. आहेर यांनी केले.
नाशिकरोड येथील नाशिक परिमंडळ कार्यालय, वीज भवनासमोर वीज कंपनीतील अधिकारी व कर्मचारी यांची द्वारसभा झाली. त्यावेळी आहेर बोलत होते. बहुजन विद्युत अभियंता, अधिकारी व कर्मचारी फोरमतर्फे ही सभा झाली. झोनल अध्यक्ष ज्ञानेश्वर बागूल, झोनल सचिव संजय परवार, केंद्रीय पदाधिकारी भाऊसाहेब गांगुर्डे, साहेबराव पगारे, शिवदास साबरे, अविनाश पगारे, राजू जाधव, कुणाल तेलोरे, सुनील मायर, कैलास वारुंगसे, देवीदास सोनवणे, एन. डी. भोये, बाळासाहेब सोनवणे, प्रवीण माळी आदी उपस्थित होते.
संघटनेने दिलेल्या पत्रकात म्हटले आहे, की बिंदुनामावली व मागासवर्गीयांच्या अनुशेषांची माहिती मिळावी, मंडल व विभागीय पातळीवर बिंदुनामावली शासनाच्या नामनिर्देशित अधिकाऱ्यांकडून प्रमाणित करूनच अनुशेष मुख्यालयाला पाठवावा, मृत कर्मचाऱ्यांच्या वारसांच्या प्रलंबित प्रकरणांवर सकारात्मक कार्यवाही व्हावी, बदली व बढती पदस्थापनेत भेदभाव करू नये, वीजबिल थकबाकी वसुली करताना कर्मचाऱ्यांना मारहाण होऊ नये यासाठी पोलिस संरक्षण मिळावे, बदली पोस्टिंगमध्ये भेदभाव करू नये, मुख्य कार्यालयातून आलेल्या आदेशाच्या नावाखाली परिमंडळात ५१४ या परिपत्रकाचे उल्लंघन होत आहे, ते होऊ नये. यावेळी १४ ऑक्टोबरच्या आंदोलनाविषयीदेखील चर्चा करण्यात आली.
मोबाइल अॅप डाउनलोड करा आणि राहा अपडेट