म. टा. वृत्तसेवा, नाशिकरोड
प्रत्येकी युवती आयुष्यातील विवाहाच्या सुवर्णक्षणाची प्रतीक्षा करीत असते. अनाथ प्रज्ञा सुरेश खिल्लारेच्या आयुष्यात हा क्षण १९ व्या वर्षांच्या आतच आला... सुशील, सुस्वरूप प्रज्ञा गुजरातची सून झाली. सूरतमध्ये हिरे कंपनीत पैलू पाडणाऱ्या जितेंद्र हिरप्रा याच्याशी तिचे शुभ मंगल झाले आहे.
जेलरोड येथील नारी आधार केंद्रात विठ्ठल दिनकर व त्यांची पत्नी सुमन हे निराधार मुलींचा सांभाळ करतात. या मुली नोकरी-व्यवसाय करून शिक्षण घेतात. सूरतचे राहुल व्याकरिया यांचा ट्रॅव्हलिंगचा व्यवसाय आहे. नाशिकरोडला आल्यावर त्यांचा परिचय रमेश जोशी यांच्याशी झाला. त्यांनी आपला दहावी झालेला मित्र जितेंद्रसाठी उपवर वधू पाहण्याची विनंती केली. जोशी त्यांना नारी केंद्रात घेऊन आले. प्रज्ञाशी बोलणी झाल्यानंतर जितेंद्र त्याची बहीण वैशालीला घेऊन आला. सर्वांना प्रज्ञा पसंत पडली. अनाथ मुलीचा आधार होता येणार असल्याने जितेंद्रच्या कुटुंबीयांनीही विवाहास होकार दिला.
14-1
पुरेपूर खबरदारी
या केंद्राच्या नियमानुसार जितेंद्रने डॉक्टरांचा एचआयव्ही रिपोर्ट सादर केला. त्यानंतर नारी केंद्राच्या सहव्यवस्थापन समितीच्या अधिक्षीका शोभा गायकवाड, नगरसेविका मंगला आढाव, सचिव सुमन दिनकर, समाजसेविका कल्पना गोपनर यांच्या पॅनलने जितेंद्रची मुलाखत घेतली. विठ्ठल दिनकर, कल्पना गोपनर, रमेश जोशी यांची टीम गृह चौकशी अहवालासाठी जितेंद्रच्या कंपनीत व घरी जाऊन आली. जितेंद्रच्या भावजिंजवा ग्रामपंचायतीचा रहिवासाचा दाखला, आधारकार्ड, वाहन परवाना, कंपनीचे आयकार्ड, रेशनकार्ड मिळविण्यात आले. सुरत पोलिसांनी कॅरेक्टर सर्टिफिकेट दिले. यानंतरच नारी केंद्राने विवाहाला मान्यता दिली. जितेंद्रकडून प्रज्ञाच्या नावे ५० हजारांचे फिक्स्ड डिपाजिट व सद््वर्तणुकीचा बाँड लिहून घेण्यात आला.
14-1
वैदिक पद्धतीने विवाह
जेलरोडच्या नारी केंद्रात शुक्रवारी सकाळी साडेनऊच्या मुहूर्तावर वैदिक पद्धतीने प्रज्ञा व जितेंद्रचा शुभविवाह पार पडला. त्यानंतर विवाह निबंधक कार्यालयात विवाहाची नोटीस देण्यात आली. महापालिकेतही मॅरेज सर्टिफिकेटसाठी अर्ज देण्यात आला. विवाहाला नगरसेविका मंगला आढाव, विठ्ठल दिनकर, सुमन दिनकर, रमेश जोशी आणि प्रज्ञाच्या केंद्रातील मैत्रिणी वऱ्हाडी होते. जितेंद्रचा मित्र राहुल व्याकरिया, बहीण वैशाली विपूलराय, आई-वडील, व परिसरातील काही नागरिक उपस्थित होते.
अनाथाचा नाथ
'मटा'शी बोलताना जितेंद्र म्हणाला, की अनाथाचा नाथ होण्याचे भाग्य लाभल्याने समाज काय म्हणेल याची फिकीर मी केली नाही. मनासारखा जीवनसाथी मिळाल्याबद्दल मी देवाचा आभारी आहे. प्रज्ञा अजूनही स्वप्नातच वावरत आहे. नेत्राच्या कडा पुसत ती म्हणाली, की एवढ्या लवकर विवाहाचा योग येईल, असे वाटले नव्हते. दुःखाचे व कष्टाचे दिवस आता संपले आहे. जितेंद्रच्या कुटुंबीयांच्या विश्वासाला मी तडा जाऊ देणार नाही. जितेंद्रची बहीण वैशाली विपूलराय म्हणाली, की प्रज्ञा आम्हाला पहिल्या भेटीतच पसंत पडली होती. आई-वडिलांनी सांगितल्यावर त्यांनीही आनंदाने होकार दिला. इतरांनीही हा आदर्श घ्यावा.
मोबाइल अॅप डाउनलोड करा आणि राहा अपडेट
