एटीएममधून पैसे काढून घराकडे परणाऱ्या महिलेच्या गळ्यातील सोनसाखळी व मंगळसूत्र दुचाकीस्वार भामट्यांनी ओरबाडून नेले. ही घटना भुजबळ फार्म परिसरात घडली. गोविंदनगर येथील भावसार भवनमागे राहणाऱ्या अर्चना जयंत एंडाईत (वय ४६) यांनी या प्रकरणी तक्रार दिली आहे.
याबाबतची अधिक माहिती अशी, की बुधवारी रात्री आठच्या सुमारास एंडाईत मुंबई- आग्रा हाय-वेवरील एचडीएफसी बँकेच्या एटीएममध्ये पैसे काढण्यासाठी गेल्या होत्या. पैसे काढून परतत असताना भुजबळ फार्ममागील श्रीजी लक्झरिया इमारतीसमोर दुचाकीवर आलेल्या दोघांपैकी एकाने त्यांच्यावर थेट हल्लाच चढवला. चोरट्यांनी जोरात चापट मारून एंडाईत यांच्या गळ्यातील सुमारे ७५ हजार रुपये किमतीची सोनसाखळी आणि मंगळसूत्र ओरबाडून नेले. या प्रकरणी अंबड पोलिसांनी गुन्हा दाखल केला असून, उपनिरीक्षक पवार तपास करीत आहेत.
महिलेचा विनयभंग
महिलेस मारहाण करीत विनयभंग करण्यात आल्याची घटना द्वारका परिसरात घडली. या प्रकरणी समीर इब्राहीम मिर्झा (वय ३९, रा. लेखानगर) याच्याविरुद्ध भद्रकाली पोलिसांनी गुन्हा दाखल केला आहे.
मालेगाव येथील आंबेडकरनगर भागात राहणाऱ्या महिलेने या प्रकरणी तक्रार दाखल केली आहे. द्वारका परिसरातील मालेगाव टॅक्सी स्टँडवर पीडित महिला बुधवारी सायंकाळी पाचच्या सुमारास उभी होती. त्या वेळी संशयिताने तिला 'ये भवाने' असे संबोधल्याने वाद झाला. महिलेने जाब विचारला असता संशयिताने तिचे केस धरून मारहाण करीत विनयभंग केला. या प्रकरणी सहाय्यक निरीक्षक लोखंडे तपास करीत आहेत.
जुगार अड्ड्यावर छापा
हॉटेल एक्स्प्रेस इनमागील ढेमसे मळ्यातील जुगार अड्डा पोलिसांनी उद््ध्वस्त केला. पोलिसांनी अड्डा चालकासह सात जुगारींना जेरबंद केले. त्यांच्याकडून सुमारे ६७ हजार रुपयांचा मुद्देमाल हस्तगत करण्यात आला आहे.
पंकज भरत पाटील (रा. सिडको) असे जुगार अड्डा चालवणाऱ्या मुख्य संशयिताचे नाव आहे. हॉटेल एक्स्प्रेस इनमागील ढेमसे मळ्यात उभारण्यात आलेल्या पत्र्याच्या शेडमध्ये जुगार खेळला जात असल्याची माहिती इंदिरानगर पोलिसांना मिळाली होती. त्यानुसार पोलिसांनी बुधवारी रात्री साडेआठच्या सुमारास छापा टाकला. या कारवाईत जुगाराच्या साहित्यासह रोकड व अन्य साहित्य असा सुमारे ६६ हजार ६४० रुपयांचा मुद्देमाल जप्त करण्यात आला. हवालदार पाळदे तपास करीत आहेत.
तडीपार शिंपी जेरबंद
शहरासह जिल्ह्यातून दोन वर्षांसाठी तडीपार केलेले असताना शहरात वास्तव्यास असलेल्या कामटवाडे येथील पंकज प्रकाश शिंपी (रा. साई संकुल, आनंदनगर, कामटवाडे) यास पोलिसांनी जेरबंद केले. शिंपीवर विविध पोलिस स्टेशनमध्ये गंभीर गुन्हे दाखल आहेत. गुन्हेगारी पार्श्वभूमीमुळे शिंपीविरोधात जानेवारीमध्ये तडीपारीची कारवाई करण्यात आली. दोन वर्षांसाठी हद्दपार केलेले असताना शिंपी मात्र शहरात राहत असल्याची माहिती पोलिसांना समजली होती. मिळालेल्या माहितीच्या आधारे पोलिसांनी मंगळवारी रात्री मोगलनगर येथील सूर्योदय बीअरबार परिसरात सापळा रचून शिंपीला जेरबंद केले. हवालदार शेळके तपास करीत आहेत.
कामगाराचा मृत्यू
बांधकाम सुरू असलेल्या इमारतीवरून पडल्याने शिंगवे बहुला येथील रवी बाबूराव उगले (वय ४५) या कामगाराचा देवळाली कॅम्प परिसरात बुधवारी दुपारी दीड वाजेच्या सुमारास मृत्यू झाला. लॅम रोडवरील दर्शन अकादमी येथील एका बांधकामावर काम करीत असताना उगले कोसळले. गंभीर जखमी झाल्याने त्यांना तातडीने कॅन्टोन्मेंट हॉस्पिटलमध्ये दाखल करण्यात आले. मात्र, तोपर्यंत त्यांचा मृत्यू झाला. या प्रकरणी देवळाली कॅम्प पोलिसांनी आकस्मिक मृत्यूची नोंद करण्यात आली.
तरुणाची आत्महत्या
लोखंडे मळा परिसरातील चंद्रशेखर देवेंद्रसिंग (वय २८) याने राहत्या घरात गळफास घेऊन आत्महत्या केल्याची घटना बुधवारी सायंकाळी उघडकीस आली. आत्महत्येचे कारण स्पष्ट होऊ शकले नाही. त्याने बुधवारी दुपारी आत्महत्या केली. या प्रकरणी उपनगर पोलिसांनी आकस्मिक गुन्ह्याची नोंद केली असून, हवालदार सोनवणे तपास करीत आहेत.
मोबाइल अॅप डाउनलोड करा आणि राहा अपडेट
