शेतकऱ्यांच्या अर्थकारणातील कांदा पिकाला गेल्या काही दिवसांपासून मातीमोल बाजारभाव मिळत असल्याने लासलगाव बाजार समितीला अन्न नागरी पुरवठा मंत्रालयातील संचालक जाकीर हुसेन आणि उपसंचालक दिनेश कुमार यांच्या पथकाने भेट देऊन शेतकऱ्यांशी संवाद साधला. यावेळी शेतकऱ्यांनी उत्पादन खर्चाचा ताळेबंद समितीपुढे मांडल्याने समितीचे सदस्यही आवाक् झाले.
लासलगाव कृषी उत्पन बाजार समितीमध्ये कांद्याची आवक गेल्या काही दिवसात मोठ्या प्रमाणात वाढली आहे. मागणीपेक्षा पुरवठा जास्त होत असल्याने कांदादरात घसरण सुरू आहे. त्यामुळे कांदा उत्पादकांमध्ये असंतोष निर्माण झाला आहे. गत आठवड्यात जिल्ह्यातील बाजार समितीत भाव घसरल्याने लिलावही बंद झाले होते. कांद्याच्या दरामध्ये मोठ्या प्रमाणातील अनियमितता दिसून आल्याने दिल्ली येथील अन्न नागरी पुरवठा मंत्रालयातील संचालक यांनी लासलगाव बाजार समितीला भेट देऊन सभापती नानासाहेब पाटील, कांदा उत्पादक शेतकरी आणि व्यापारी यांच्याशी चर्चा केली.
याप्रसंगी उपस्थित शेतकऱ्यांनी लासलगावमध्ये कोल्ड स्टोअरेज उभारण्याची मागणी केली. यावेळी पणन महामंडळाचे चंद्रशेखर बारी, निफाडचे तहसीलदार संदीप आहेर, बाजार समिती संचालक राजाराम दरेकर, व्यापारी प्रतिनिधी नितीन जैन, मनोज रेदासनी, सचिव बी. वाय. होळकर, राजाराम काळे, निवृती न्याहारकर आदी उपस्थित होते.
मागणी आणि पुरवठ्यात समतोल साधणार कांद्यास मिळालेला भाव आणि उत्पादनास झालेला खर्च बघता हातात काहीच शिल्लक राहत नसल्याचे या पथकाच्या लक्षात आले. घाऊक बाजारात हा कांदा पाच ते सहा रुपयांनी विकला असला तरी शहरात हाच कांदा २५ ते ३० रुपये किलो विकला जात आहे. त्यामुळे किरकोळ बाजारात इतका फरक कसा पडत आहे, असा प्रश्न या समितीलाही पडला. येणाऱ्या काळात कांदा भावामध्ये अनियमितता राहू नये, मागणी आणि पुरवठा यामध्ये समतोल राहावा यासाठी हा दौरा असल्याचे या पथकाने सांगितले.
मोबाइल अॅप डाउनलोड करा आणि राहा अपडेट
