म. टा. खास प्रतिनिधी, नाशिक
गंगापूर धरणातून मराठवाड्याला पाणी दिल्यानंतर पाण्यावरून सुरू झालेल्या राजकारणाने कळस गाठला आहे. वाढीव पाणीकपातीवरून मनसे, भाजपमध्ये टोलवाटोलवी कायम आहे. शहराला ३१ जुलैपर्यंत पाणी पुरविण्यासाठी आणखीन २५ दिवस पाण्याचा तुटवडा जाणवत आहे. त्यासाठी आणखीन ३०० दशलक्ष घनफूट पाण्याची गरज आहे. मात्र, धरणात जादा पाणी उपलब्ध नसतांनाही भाजप आमदारांनी वाढीव पाणीकपातीला विरोध करत आणखीन पाणी देवू, अशी भूमिका कायम ठेवली आहे. त्यामुळे हे ३०० दशलक्ष घनफूट पाणी येणार कुठून? असा सवाल सत्ताधाऱ्यांनी उपस्थित केला आहे. तर अतिरिक्त पाण्यावरून भाजपची पुन्हा कोंडी होणार आहे.
शहरातील वाढीव पाणीकपातीचा निर्णय घेण्यासाठी गुरूवारी महापौर अशोक मुर्तडक यांनी आमदारांसह गटनेत्यांची बैठक बोलावली होती. यात उपमहापौर गुरूमीत बग्गा, आयुक्त डॉ. प्रवीण गेडाम, आमदार बाळासाहेब सानप, प्रा. देवयानी फरांदे, सीमा हिरे, डॉ. अपूर्व हिरे, स्थायी समिती अध्यक्ष शिवाजी चुंभळे, विरोधी पक्षनेत्या कविता कर्डक, सभागृह नेते सलिम शेख, शिवसेना गटनेते अजय बोरस्ते, भाजप गटनेते संभाजी मोरुस्कर, काँग्रेस गटनेते शाहू खैरे, मनसे गटनेते अनिल मटाले, माकप गटनेते तानाजी जायभावे, आरपीय गटनेते प्रकाश लोंढे, दिनकर पाटील उपस्थित होते.
बैठकीत अधीक्षक अभियंता यू. बी. पवार यांनी पाण्याची वस्तुस्थिती सादर केली. गंगापूर धरणात आता महापालिकेसाठी १३८३ दशलक्ष घनफूट पाणी शिल्लक आहे. तर १७१ दिवस पाणी पुरवायचे आहे. सध्याच्या १२.३५ क्यूसेक प्रमाणे पाणी पुरवायचे झाल्यास २५ दिवसांचा गॅप कायम आहे. त्यावर आमदार सानप यांनी महापालिकेच्या पाणीगळतीवर बोट ठेवत, काटकसरीने पाणी वापरण्याचा सल्ला दिला. शहरात पाण्याचा अपव्यव होत असल्याचा आरोप त्यांनी महापालिकेने सुरुवातीलाच जास्त पाणी का मागितले नाही, असा प्रश्न केला. आम्हीही २० वर्षांपासून सभागृहात काम करतो. मात्र, अशा प्रकारचे राजकारण आम्ही केले नाही. सत्ताधारी पक्ष जनतेला घाबरवित आहे. ते तातडीने थांबले पाहिजे, असे सांगत त्यांनी पाणीकपातीला विरोध केला. गरज वाटल्यास अजून पाणी उपलब्ध करून देवू असा दावा त्यांनी केला. सानपांच्या या आक्रमकतेमुळे बैठकीचा रंग बदलला. मनसे नगरसेवकांनी भाजपला टार्गेट करत जुने विषय उकरून काढण्यास सुरुवात केली. त्यामुळे बैठक निर्णयाविना संपली.
सानपांची 'दबंगगिरी'
भाजप शहराध्यक्ष असलेल्या आमदार बाळासाहेब सानप यांनी एकहाती किल्ला लढवीत सत्ताधारी मनसे, शिवसेना, काँग्रेस सदस्यांना तोंड दिले. तसेच बैठकीत त्यांनी थेट अधिकाऱ्यांना दमबाजी केली. माहिती देण्याच्या प्रयत्न करणाऱ्या महापालिकेच्या अधिकाऱ्यांसह जलसंपदाच्या अधिकाऱ्यांनाही बोलू न देता खाली बसण्यास आमदार सानप यांनी भाग पाडले. त्यांच्या या दबंगशाहीमुळेच नगरसेवक आणि सानप यांच्यात वादावादी झाली. शेवटपर्यंत त्यांनी मनसेच्या पाणीकपातीचा प्रयत्न उधळून लावला.
मनसे पदाधिकाऱ्यांचा उथळपणा
महापौरांनी सामंजस्य भूमिका दाखवत सर्व गटनेते आणि आमदारांची वाढीव पाणीकपातीसंदर्भात बैठक बोलावली. मात्र, या बैठकीत मनसेच्याच पदाधिकाऱ्यांचा उथळपणा महापौरांच्या अंगलट आला. मनसेचे जिल्हाप्रमुख सुदाम कोंबडे यांनी जायकवाडीच्या पाण्याचा प्रश्न उपस्थित करून भाजप आमदारांना आयते कोलीत दिले. आमदार सानप यांच्यासमोर मागील कुरापती काढल्याने बैठकीत सानप आणि कोंबडे यांच्यातच तू-तू, मंै-मंै सुरू झाली. तर अनिल मटाले यांनीही भाजप आमदारांमुळे लोक घाबरायला लागल्याचे वक्तव्य केल्याने भाजप आमदार संतप्त झाले. महापौरांनी दोघांनाही शांत राहण्याचा सल्ला दिला. मात्र, गटनेते आणि नगरसेवक महापौरांचेही ऐकायला तयार नव्हते. त्यामुळे महापौरही हतबल झाले. या संधीचा फायदा घेवून आमदारांनी बैठकीतून पाय काढण्याचा प्रयत्न केला. त्यामुळे मनसेचेच पदाधिकारी महापौरांच्या प्रयत्नांवर पाणी फिरवण्याचा प्रयत्न करत होते.
जलसंपदाचा यू-टर्न
जलसंपदा विभागाचे उपअभियंता एन. डी. महाजन यांनी प्रथम ३०० क्यूसेक पाणी महापालिकेला देण्याचा प्रयत्न सुरू असल्याचा खुलासा केला. त्यामुळे पहिले ३०० दशलक्ष घनफूट पाणी मिळाले नसल्याची बाबसमोर आली. त्यामुळे भाजप आमदारांची फसगत झाली. मात्र, आमदारांनी तातडीने सुत्रे फिरवत, जिल्हाधिकाऱ्यांकडे पत्र आल्याचे सांगितले. दुसरीकडे महाजन यांची कानउघाडणी केली. त्यामुळे बैठक संपण्यापूर्वी त्यांनी ३०० दशलक्ष पाणी महापालिकेला दिल्याचा खुलासा केला.
पालकमंत्र्यांच्या उपस्थितीत तोडगा
बैठकीत वादावादी, एकमेकांवर आरोप करण्याच्या राजकारणामुळे या बैठकीत तोडगा निघालाच नाही. त्यामुळे आता पुन्हा वाढीव ३०० दशलक्ष पाणीकपातीचा निर्णयाचा विषय पालकमंत्री गिरीश महाजन यांच्याकडे टोलवण्यात आला आहे. येत्या बुधवारी पालकमंत्र्यांच्या उपस्थितीत बैठक घेवून सर्वपक्षीय तोडगा काढण्याचा निर्णय घेण्यात आला. मात्र, ही बैठक लांबली तर महापालिका आपल्या स्तरावर निर्णय घेईल, असा इशाराच महापौरांनी आमदारांना दिला. त्यामुळे कपातीची टोलवाटोलवी सुरूच आहे.
बोरस्ते-सानप यांच्यात तू-तू,मैं-मैं
बैठकीत मनसे विरुद्ध भाजप असा वाद रंगला. आमदार बाळासाहेब सानप व शिवसेना गटनेते अजय बोरस्ते एकमेकांना चिमटे काढलेत. शिवसेनालाही सत्तेत असल्याची आठवण करून देत, माझ्या घरासमोर आंदोलन केले तेव्हा मला चहा पाजला आला नाही याची खंत वाटते, असा टोला सानप यांनी लावला. तर बोरस्ते यांनीही आम्ही सत्तेत असलो तरी जनतेसोबत असल्याचे सांगत जनतेची चेष्टा होवू देणार नाहीत असे प्रत्युत्तर दिले. पूर्ण बैठकीत शिवसेना व भाजपच्या पदाधिकाऱ्यांमध्ये तू-तू, मैं-मैं सुरूच होती.
पाणीकपाती बैठक निष्फळ ठरली. सध्याच्या साठ्यात २५ दिवसांचा तुटवडा आहे. त्यामुळे बुधवारपर्यंत बैठक घेवून पालकमंत्र्यांनी निर्णय द्यावा. अन्यथा महापालिका आपल्या अधिकारात कपातीसंदर्भात निर्णय घेईल.
- अशोक मुर्तडक, महापौर
आमदार पाणी उपलब्ध करून देत असतील तर कपातीची गरज नाही. आम्हाला एकवेळ पूर्ण पाणी मिळावे. यापुढे पाणीकपात सहन करणार नाहीत.
- अजय बोरस्ते, गटनेता, शिवसेना
महापालिका हद्दीत पाणी अपव्यव होत असून प्रथम गळती थांबवावी. ३०० क्यूसेक पाण्याव्यतिरिक्त आणखीन पाणी उपलब्ध करून देण्याचा आम्ही प्रयत्न करू. मनसेने राजकारण करू नये. - बाळासाहेब सानप, आमदार
शहराला रोज ३५० एमएलडीपेक्षा कमी पाणीपुरवठा करू नये. सध्याच्या कपातीत एक थेंब पाणी कमी केले तरी आम्ही रस्त्यावर येवून आंदोलन करू.
- गुरूमीत बग्गा, उपमहापौर
नाशिकमध्ये पाण्याचे पाट वाहत आहेत. पाणीगळती रोखण्यासाठी प्रयत्न केले पाहिजेत. पालकमंत्र्यांसोबत बैठक घेवून वाढीव पाण्यासाठी प्रयत्न करू.
- प्रा. देवयानी फरांदे, आमदार
गळती लगेच थांबवणे अवघड आहे. १८०० किलोमीटरची जलवाहिनी आहे. त्यामुळे पाणीपुरवठा करतांना धरणातून किती पाणी उचलले जाते व प्रत्यक्षात किती पाणी पोहचते, त्याचा हिशेब करून पाण्याचे नियोजन केले पाहिजे.
- डॉ. प्रवीण गेडाम, आयुक्त
मोबाइल अॅप डाउनलोड करा आणि राहा अपडेट
