शहरातील वेगवेगळ्या भागातून चार दुचाकींसह एक पिकअप व्हॅन चोरट्यांनी लंपास केली. वाहनचोरीच्या गुन्ह्यात काही प्रमाणात घट झाली असली तरी चोरटे अशा पध्दतीने वाहनचालकांना दणका देत असल्याने पोलिसांनी जलद तपास करण्याची मागणी केली जाते आहे. विशेष म्हणजे वाहनचोरीचा गुन्हा लागलीच दाखल होत नसल्याने वाहनचालकांच्या मनस्तापात आणखी भर पडते आहे.
वाहनचोरीची एक घटना सिटी सेंटर मॉलच्या मागील बाजुस २५ जानेवारी रोजी दुपारी १२ ते ४ या वेळेदरम्यान घडली. नाशिकरोड येथील नारायणबापू नगर येथे राहणारा वसंत पोपट करंजकर (१६) याने आपल्याकडील दुचाकी (एमएच १५ सीजी ८२२८) पार्क केली होती. या प्रकरणी गंगापूर पोलिस स्टेशनमध्ये गुन्हा दाखल करण्यात आला. यानंतर, सैयद प्रिंपी येथे राहणाऱ्या मोहन नामदेव उखाडे (४२) यांनी पंचवटीतील मार्केट यार्ड येथे पार्क केलेली २५ हजार रुपयांची दुचाकी चोरट्यांनी हातोहात लंपास केली. ही घटना १९ जानेवारी रोजी १२ ते साडेबारा वाजण्याच्या सुमारास घडली. पंचवटी पोलिसांनी गुन्ह्याची नोंद केली आहे. पळसे येथील चौधरी पार्कच्या रूम नंबर दोन जवळ पार्क केलेली दुचाकी चोरट्यांनी २२ नोव्हेंबरच्या मध्यरात्री चोरी केली. या प्रकरणी केशव रामकृष्ण गायधनी यांनी दिलेल्या फिर्यादीनुसार नाशिकरोड पोलिसांनी वाहनचोरीच्या गुन्ह्याची नोंद केली. दरम्यान, दिंडोरी रोडवरील कलानगर येथील आकाश रो हाऊस येथे समित रमेश बिरारी यांनी पार्क केलेल्या दुचाकीवर देखील चोरट्यांनी हात साफ केला.
चोरट्यांनी सातपूर त्र्यंबकरोडवर पार्क केलेली दीड लाख रुपयांची पिकअप व्हॅन चोरी केली. त्र्यंबकरोडवरील मंदिरासमोर राहणाऱ्या कुमार शांताराम जाधव (२८) यांनी आपल्याकडील पिकअप जीप (एमएच १५ ई ४५८२) घरासमोर पार्क केली होती. २६ जानेवारीच्या पहाटे चोरट्याने ती गाडी पळवली. याप्रकरणी सातपूर पोलिसांनी चोरीचा गुन्हा दाखल केला आहे.
भाजी विक्रेत्यांवर गुन्हा
गंगाघाट भाजीबाजार मैदानावर अतिक्रमण करणाऱ्या विक्रेत्यांवर कारवाई केली जात आहे. त्यास विरोध केल्याप्रकरणी पंचवटी पोलिसांनी दिलीप नेरकर, भिमराव शांताराम शिरसाठ यांच्यासह संघटनेच्या इतर पदाधिकाऱ्यांविरोधात सरकारी कामात अडथळा आणल्याप्रकरणी गुन्हा दाखल केला.
मोबाइल अॅप डाउनलोड करा आणि राहा अपडेट
