म. टा. प्रतिनिधी, नाशिक
नाशिकच्या विभागीय क्रीडा संकुलातील उपलब्ध क्रीडा सुविधा उदयोन्मुख क्रीडापटू, प्रशिक्षण संस्था आणि क्रीडाप्रेमी नागरिकांना परवडणाऱ्या दरात उपलब्ध करून देण्याचा निर्णय सोमवारी नाशिक विभागीय क्रीडा संकुल समितीच्या बैठकीत विभागीय आयुक्त एकनाथ डवले यांनी जाहीर केला.
हे संकुल उत्कृष्ट दर्जाचे प्राविण्य केंद्र बनावे, यासाठी प्रशासन सर्वतोपरी प्रयत्न करील, असेही त्यांनी स्पष्ट केले. विभागीय क्रीडा संकुल समितीची सभा हिरावाडी रोड येथील संकुलात झाली. या बैठकीला विभागीय आयुक्त एकनाथ डवले, जिल्हाधिकारी दीपेंद्रसिंह कुशवाह, जिल्हा परिषदेचे मुख्य कार्यकारी अधिकारी मिलिंद शंभरकर, क्रीडा संघटक भीष्मराज बाम, नरेंद्र छाजेड, नगरसेवक रुची कुंभारकर, बांधकाम विभागाचे कार्यकारी अभियंता पवार, माहिती उपसंचालक सतीश लळीत आणि समितीचे सदस्य सचिव तथा क्रीडा उपसंचालक संजय सबनीस उपस्थित होते.
सरकारने कोट्यवधी रुपये खर्च करुन नाशिकला अद्ययावत क्रीडा संकुल उभे केले आहे. या संकुलातील इनडोअर बॅडमिंटन हॉल, जिम्नॅस्टिक सुविधा, टेबल टेनिस, शुटींग रेंज, स्क्वॅश कोर्ट, जलतरण तलाव, मल्टिपर्पज प्लेईंग फिल्ड आणि लॉन, वसतिगृह आदी सुविधा तयार आहेत. बाकीची प्रगतीपथावर असलेली कामे कालबद्ध कार्यक्रम आखून पूर्ण करावीत, अशा सूचनाही डवले यांनी दिल्या. सुविधांचा वापर उदयोन्मुख क्रीडापटू, प्रशिक्षण संस्था आणि क्रीडाप्रेमी नागरिकांना व्हावा, यासाठी मासिक शुल्क आकारून या सुविधा उपलब्ध करून द्याव्यात. त्रैमासिक, सहामाही, वार्षिक शुल्क भरणाऱ्यांना त्यात काही प्रमाणात सवलत द्यावी. यासाठी सदस्यत्व कार्ड देण्याची सूचनाही त्यांनी केली. क्रीडा संकुल परिसरात सीसीटीव्ही लावणे, अद्ययावत ध्वनीक्षेपक यंत्रणा बसविणे, बॅडमिंटनकरिता रोलेबल सिंथेटिक सरफेस उपलब्ध करून देणे, इनडोअर स्टेडियममध्ये कुस्तीसाठी पोडियम तयार करून देणे, वसतिगृह, इनडोअर हॉल आणि पथदिपांसाठी सौरशक्तीचा वापर करणे ही कामे प्राधान्याने करुन घेण्याचा निर्णयही समितीने घेतला. संकुलाची सुरक्षा लक्षात घेऊन खासगी सुरक्षा रक्षक नेमण्यासही समितीने मान्यता दिली.
मोबाइल अॅप डाउनलोड करा आणि राहा अपडेट