म. टा. प्रतिनिधी, नाशिक
प्रत्येक जण दीपावलीच्या तोंडावर स्वानंदात मग्न असताना निसर्गाच्या अवकृपेचा सामना करणाऱ्या बळीराजाच्या मदतीसाठी पंचवटीतील दंडे हनुमान मित्र मंडळाने पुढाकार घेतला आहे. दिवाळीच्या निमित्ताने प्रत्येकाची पावले बाजारपेठेकडे ओढली जात असताना सामाजिक जाणिवेचे भान जागृत करण्यासाठी आयोजित निधी संकलन उपक्रमात सुमारे लाख रुपयांपेक्षाही अधिक निधी रविवारी संकलित करण्यात आला.
'रुपया तुमचा, प्रयत्न आमचा' असे आवाहन करीत दंडे हनुमान मित्र मंडळाच्या वतीने रविवारी शहरातील मध्यवर्ती बाजारपेठेतील सर्व व्यापारी वर्गासह नागरिकांनी या उपक्रमात मुक्त हस्ते मदत करीत सहभाग नोंदवला. हा उपक्रम दिवाळीच्या कालावधीतही सुरूच राहणार असून, यातून जमा होणारी सर्व रक्कम मुख्यमंत्री निधीसाठी देण्यात येणार आहे. हा निधी राज्यातील जलयुक्त शिवार मोहिमेसाठीच वापरला जावा, अशी मागणीही मुख्यमंत्र्यांकडे करण्यात येणार आहे.
रविवार सुटीचा दिवस असला तरीही दिवाळीच्या निमित्ताने बाजारपेठेत गर्दी होती. व्यापारी वर्गही रविवारी दुकानात उपस्थित होता. यामुळे पंचवटीसह मेनरोड, सीबीएस, शालीमार, अशोक स्तंभ आदी परिसरात हा उपक्रम राबविण्यात आला. या उपक्रमात मोठी मदत देऊन सहभाग घेणाऱ्या व्यापाऱ्यांना तुळशीचे रोप देऊन गौरविण्यात आले. या मदतनिधीत मोठा सहभाग घेणाऱ्या व्यापारी वर्गात प्रकाश सुपारी समूहाचे फासलीवाल परिवार, आनंद फूटवेअरचे विनोद जेठवा, मे. पांडूरंग पवार, दगडू तेली, चांदवडकर, आमले परिवार, श्रीराम ट्रेडर्स, सुनील जाधव, जयहिंद लेदर ब्रदर्स, चोकसी ज्वेलर्स, सागर बुक डेपो आदींनी सहभाग घेतला.
दंडे हनुमान मित्र मंडळाच्या वतीने गजानन शेलार, राहुल शेलार, सतीष आमले, नंदन भास्करे, मुन्ना अन्सारी, गौरव सोनार, विशाल आटोळे, अंकित पाटील, वैभव शुक्ले, सचिन कदम, रमेश महाले, वैभव वाकचौरे आदी पदाधिकारी व कार्यकर्ते सहभागी झाले होते.
मुख्यमंत्री निधीस मदत
यंदा निसर्गाच्या अवकृपेने राज्यात बहुतांश ठिकाणी दुष्काळसदृश परिस्थिती निर्माण झाली आहे. दिवाळीच्या आनंदात सर्वजण मग्न असताना अर्थव्यवस्थेचा कणा असणारा बळीराजा उपेक्षित राहू नये, यासाठी हा उपक्रम राबवला. यातील निधी मुख्यमंत्री निधीस देण्यात येईल.
- राहुल शेलार, दंडे हनुमान मित्र मंडळ
मोबाइल अॅप डाउनलोड करा आणि राहा अपडेट
