दरवर्षी दिवाळीमध्ये महिनाभर सुटीचा यथेच्छ आनंद लुटणाऱ्या प्राथमिक शाळेच्या विद्यार्थी अन् शिक्षकांना यंदा मात्र सुट्यांमध्ये कपात सोसावी लागणार आहे. २१ दिवसांची दिवाळीची सुटी यंदा १५ दिवसांवर आल्याने सुटीमधील मॅनेजमेंटचे फेरनियोजन करावे लागणार आहे.
शाळेच्या बारा महिन्यांच्या नियोजनात सुमारे २२० दिवस शाळा भरण्यास हवी, अशी तरतूद आरटीई (राईट टू एज्युकेशन अक्ट) मध्ये करण्यात आली आहे. उन्हाळी सुट्यांसह दिवाळी, नाताळ आदी सणवारांसह वर्षभरातील रविवारचा एकत्रित विचार करता चालू शैक्षणिक वर्षात शाळा केवळ २११ दिवसच भरते. सुमारे ९ सुट्यांचा फरक तयार होतो. हा फरक भरून काढण्यासाठी यंदा शासनाने प्राथमिक शाळेच्या दिवाळीच्या सुट्यांमध्ये सात दिवसांची घट केली आहे. त्यामुळे यंदाच्या दिवाळीच्या नियोजनात विद्यार्थ्यांना अवघी १५ दिवसांची सुट्यांची मेजवानी मिळणार आहे. ७ नोव्हेंबरपासून या सुटीला सुरूवात होणार असून २३ नोव्हेंबर रोजी शाळा उघडणार आहे.
नियोजनास सुरूवात
या आठवड्यात शाळांना सुटी लागत असल्याने हाती येणाऱ्या तीन आठवड्यांच्या कालावधीत विद्यार्थ्यांची सुटीच्या नियोजनास सुरूवात झाली आहे. या कालावधीत साहसी शिबिरे, कलाशिबिरे, स्विमिंग, संस्कृत संभाषण, खेळांच्या स्पर्धा व शिबिरे आदी कार्यक्रमांची रेलचेल आहे. या उपक्रमांमध्ये सहभागी होण्यासाठी विद्यार्थ्यांचे नियोजन सुरू आहे.
मोबाइल अॅप डाउनलोड करा आणि राहा अपडेट