सावित्रीबाई फुले पुणे विद्यापीठांतर्गत शिक्षण घेणाऱ्या कायद्याच्या विद्यार्थ्यांच्या पाठी अडचणींचे शुक्लकाष्ठ अद्याप जैसे थे आहे. उत्तरपत्रिकांच्या पुनर्तपासणीचा तिढा सुटतो न सुटतो तोच नव्या अनुभवाची भर या मालिकेत सोमवारी पडली. जनरल लॉ या पदविका अभ्यासक्रमाच्या पेपरला चक्क इन्कमटॅक्सची प्रश्नपत्रिका विद्यार्थ्यांच्या हाती थोपवली गेली.
हाती पडलेली चुकीची प्रश्नपत्रिता तब्बल तासभर सोडविताना मनस्तापाची नामुष्की विद्यार्थ्यांवर ओढावली होती. अखेरीस विद्यार्थ्यांनी मागणीचा जोर लावल्यानंतर तब्बल तासाभराच्या अंतराने त्यांच्या हाती योग्य विषयाची प्रश्नपत्रिका देत ती सोडविण्यासाठी त्यांना वेळ वाढवून देण्यात आला. या प्रकाराच्या विरोधात विद्यार्थ्यांनी तीव्र नाराजी व्यक्त केली.
कायद्याच्या विद्यार्थ्यांच्या परीक्षा विभागासंदर्भातील तक्रारी काही वर्षांपासून वाढीस लागल्या आहेत. पुणे विद्यापीठाच्या परीक्षा विभागाने याप्रश्नी लक्ष देऊन विद्यार्थ्यांशी थेट संवाद साधावा. त्यांच्या अडचणी समजून घ्याव्यात, अशी विद्यार्थ्यांची मागणी आहे. दरम्यान, सोमवारी दुपारी घडलेल्या या प्रश्नपत्रिकेतील बदलाच्या अनुभवाने विद्यार्थी धास्तावले आहेत. विद्यापीठाने गोंधळलेला कारभार त्वरित सुधारावा, अशी विद्यार्थ्यांची मागणी आहे. यापूर्वी विद्यार्थ्यांना विद्यापीठाच्या कारभाराचा फटका बसला आहे.
मोबाइल अॅप डाउनलोड करा आणि राहा अपडेट
