कॉलेजेसमध्ये विद्यार्थ्यांच्या उपस्थिती अन् प्राध्यापकांची कामातील अनियमिततेच्या परिणामी उच्च शिक्षणासमोर निर्माण होणारी आव्हाने लक्षात घेता उच्च शिक्षण विभागाने आता कॉलेजेसच्या पटपडताळणी मोहिमेला प्रारंभ केला आहे. या मोहिमेचा पहिला टप्पा सोमवारी शहर व जिल्ह्यातील कॉलेजेसमध्ये पार पडला. विद्यापीठाच्या तपासणी पथकांसमोर कॉलेजचे रेकॉर्ड सादर करताना सोमवारी दिवसभर कॉलेजेसचा जीव टांगणीला लागला होता.
राज्य सरकारच्या उच्च शिक्षण विभागाच्या वतीने ही मोहीम उघडण्यात आली आहे. गेल्या वर्षी याच धर्तीवर राज्यातील शाळांची पटपडताळणीची मोहीम उघडण्यात आली होती. यातून धक्कादायक निष्कर्ष हाती आले होते. या धर्तीवर आता कॉलेजेसचीही पटपडताळणी पार पडत असल्याने राज्याच्या उच्च शिक्षणाच्या बाबतीत असेच निष्कर्ष हाती येऊन धक्कादायक निर्णय राबविले जाण्याची शक्यता शैक्षणिक वर्तुळातून व्यक्त होत आहे.
सावित्रीबाई फुले पुणे विद्यापीठांतर्गत सोमवारी नाशिकमध्ये ही मोहीम राबवली. आज (दि. १९) ही मोहीम नगर जिल्ह्यात तर उद्या पुणे जिल्ह्यातील कॉलेजेसमध्ये राबविण्यात येणार आहे. सोमवारी शहर व जिल्ह्यातील विविध कॉलेजेसमध्ये विद्यापीठाच्या तपासणी पथकांनी ठिय्या देत कॉलेजमधील प्रवेश नोंदवह्या, जनरल रजिस्टर, कॅटलॉग, विद्यार्थ्यांचे विद्यापीठाकडे नोंदणी असलेली वही, विद्यार्थ्यांची पात्रता नोंदवही, प्रवेश अर्ज संच, प्रवेश चलन पावत्या आदी कागदपत्रांची तपासणी करीत नोंदी घेतल्या आहेत. या संदर्भांनुसार उच्च शिक्षण विभागाच्या वतीने काही नवी धोरणे राबविण्यासाठी या प्रक्रियेचा फायदा होणार असल्याचा शिक्षण विभागाचा कयास असल्याने ही मोहीम राबविण्याची भूमिका उच्च शिक्षण विभागाचे संचालक डॉ. विजय नारखेडे यांनी मांडली आहे.
अनुदान लाटणाऱ्यांच्या मुसक्या आवळणार
या मोहिमेत प्राधान्याने अनुदानित असलेल्या आर्ट, कॉमर्स, सायन्स, शिक्षणशास्त्र आणि लॉ या पाच विद्याशाखांच्या कॉलेजेसची तपासणी सुरू आहे. गत काही वर्षात शिक्षणसंस्थांची संख्या वाढली आहे. बहुतांशी कॉलेज बोगस पटसंख्या दर्शवून मोठ्या प्रमाणावर अनुदान लाटताहेत. बोगस पटसंख्या या मोहिमेतून निदर्शनास आल्यास अनुदानात कॉलेजेसकडून होणारा भ्रष्टाचार रोखण्यासाठी या मोहिमेची मदत होण्याचे मुख्य उद्दिष्ट यामागे असल्याची माहिती विद्यापीठाच्या सूत्रांनी दिली.
मोबाइल अॅप डाउनलोड करा आणि राहा अपडेट