नवरात्रोत्सवानिमित्त सातव्या माळेला सप्तशृंग गडावर दिवसभर भाविकांची अलोट गर्दी होऊन सुमारे एक लाखापेक्षा जास्त भाविकांनी दर्शनाचा लाभ घेतला. आदिशक्ती सप्तशृंग गडावर नवरात्रोत्सवानिमित्त पहिल्या दिवसापासून भाविकांनी दर्शनास गर्दी केली आहे. शनिवार व रविवार या दोन सुटी सलग आल्याने रविवारी विशेष गर्दी होती. मात्र, सोमवारी सप्तमीनिमित्त गडावर सुमारे एक लाखापेक्षा जास्त भाविकांनी दर्शन घेतले. तीस हजार भाविकांनी मोफत महाप्रसादाचा लाभ घेतला. आमदार सीमा हिरे यांच्या हस्ते देवीची महापूजा करण्यात आली. दिवसभरात ट्रस्ट कार्यालयात दहा लाख रुपयांच्या देणग्या स्वीकारण्यात आल्या.
सकाळपासून गर्दीचा ओघ वाढू लागल्याने पहिल्या पायरीपासून बारी लावण्यात आल्या होत्या. सुरक्षेच्या कारणास्तव ठराविक अंतराने मंदिरात प्रवेश दिला जात होता. वाढती गर्दी पाहून गडावर जाणाऱ्या एस.टी. बसेस दुपारी नांदुरी पायथ्यपासून काही कालवधीसाठी बंद करण्यात येऊन गडावरील गर्दी कमी होऊन भाविक नांदुरी पायथ्याशी आल्यांनतर एस. टी. बसेस पुन्हा सुरू करण्यात आल्या. अलोट गर्दीमुळे प्रशासनावर तान वाढला होता. मात्र, ट्रस्टच्या सुरक्षा कर्मचारी यांच्या सुयोग्य नियोजनाने दर्शन घेण्यास भाविकांना काही त्रास झाला नाही परंतु, दर्शनास दोन ते अडीच तास एवढा वेळ लागत होताच. घोषणांनी गड परिसर दुमदुमून गेला होता.
..................
चांदवडच्या रेणुका मातेच्या दर्शनासाठी शनिवार, रविवार व सोमवारी भाविकांनी गर्दी केली होती. सातव्या माळेनिमित्त दर्शनासाठी भाविकांच्या रांगा लागल्या होत्या. मंदिर चोवीसतास दर्शनासाठी खुले आहे. गर्दी नियंत्रित करण्यासाठी पोलिस बंदोबस्त ठेवण्यात आला आहे. दर्शन घेताना अडचणी येऊ नयेत म्हणून टप्पाटप्प्याने भाविकांना सोडण्यात येत होते.
मोबाइल अॅप डाउनलोड करा आणि राहा अपडेट