म. टा. प्रतिनिधी, नाशिक
माजी राष्ट्रपती डॉ. ए. पी. जे. अब्दुल कलाम यांच्या स्मृती जतन करण्याच्या उद्देशाने विविध शैक्षणिक संस्थांमध्ये वाचन प्रेरणा दिवस साजरा करण्यात आला. विद्यार्थ्यांमध्ये व समाजाला वाचनाची आवड निर्माण व्हावी व वाचनाचे महत्त्व त्यांना समजावे, या उद्देशाने राज्य स्तरावर हा दिवस साजरा करण्यात आला. व्याख्यान, भाषण, चर्चासत्र, सामूहिक वाचन, अनुभवकथन या माध्यमांतून हे प्रदर्शन पार पडले. डॉ. अब्दुल कलाम यांचे लेखन व विचार समाजापर्यंत पोहोचावे, यासाठी शैक्षणिक स्तरावर प्रयत्न करण्यात आले. यानिमित्ताने अनेक ग्रंथालयांमध्ये खुले ग्रंथ प्रदर्शनाचेही आयोजन करण्यात आले होते. तसेच जागतिक हॅण्डवॉश दिनानिमित्त स्वच्छतेविषयी जनजागृतीही या संस्थांमार्फत करण्यात आली.
जिल्हा परिषद शाळा
डॉ. ए. पी. जे. अब्दुल कलाम यांच्या जयंती नि‌मित्त जिल्हा परिषद शाळा शिलापूर येथे वाचन प्रेरणा दिन वाचनकट्ट्याचे उद् घाटन करण्यात आले. वाचनाची आवड विद्यार्थ्यांमध्ये रुजावी, यासाठी हा कट्टा येथे तयार करण्यात आला आहे.
यावेळी शाळेच्या विद्यार्थ्यांनी अग्निपंख, प्रकाशवाटा, शामची आई, काळे पाणी या पुस्तकांची ओळख करुन दिली. शाळेतील उपशिक्षक प्रदिप शिंदे यांनी डॉ. कलामांच्या जीवनावर माहिती सांगितली. कलाम यांच्या जीवनावरील माहितीपट संग्रहाचे प्रकाशनही यानिमित्ताने करण्यात आले. त्यानंतर विद्यार्थ्यांसाठी मी वाचलेले पुस्तक विषयावर निबंध स्पर्धा, चर्चासत्र, कथा, कविता, गायन आदी स्पर्धा घेण्यात आल्या. सरपंच मीना कहांडळ यांनीदेखील विद्यार्थ्यांना मार्गदर्शन केले. तसेच जागतिक हॅण्डवॉश डेदेखील साजरा करीत विद्यार्थ्यांना स्वत्छतेचे महत्त्व पटवून देण्यात आले. शाळेचे मुख्याध्यापक नंदलाल अहिरे यांनी कार्यक्रमाचे प्रास्ताविक केले. कार्यक्रम यशस्वीतेसाठी हिराबाई भावसार, रेखा चौधरी, कल्पना मोरे, जनाबाई मोरे आदींनी परिश्रम घेतले.
रंगुबाई जुन्नरे प्राथमिक शाळा
डॉ. ए. पी. जे. अब्दुल कलाम यांच्या जयंतीनिमित्त नाशिक एज्युकेशन सोसायटी संचलित रंगुबाई जुन्नरे प्राथमिक शाळेत वाचन आणि वैज्ञानिक प्रयोगांतून साजरी करण्यात आली. मराठी विज्ञान परिषदेचे कार्यकर्ते अजित टक्के यांनी मुलांमधील वैज्ञानिक दृष्टीकोन कसा वाढवावा, याबद्दल शिक्षकांना मार्गदर्शन केले. तसेच काही वैज्ञानिक प्रयोग सादर करून व काही ध्वनिचित्रफित दाखवून मुलांशी संवाद साधला. यावेळी इयत्ता तिसरी व चौथीच्या विद्यार्थ्यांनी वाचनाचा आनंद लुटला. त्याचबरोबर मुख्याध्यापिका रेखा रडके यांनी वाचाल तर वाचाल या उक्तीद्वारे मुलांना वाचनाचे महत्त्व समजावून सांगितले.
वाघ गुरुजी बालशिक्षण मंदिर
डॉ. ए. पी. जे. अब्दुल कलाम यांच्या जयंतीनिमित्त मराठा विद्या प्रसारक संचलित वाघ गुरुजी बाल शिक्षण मंदिर शाळेत माई खैरनार यांनी कलाम यांच्या जीवनचरित्राविषयी माहिती दिली. शाळेच्या मुख्याध्यापिका मंदाकिनी सोनवणे यांच्या हस्ते प्रतिमेचे पूजन करण्यात आले. यावेळी वाचन प्रेरणा दिवसानिमित्त पुस्तकांचे वाचनही केले. कार्यक्रमाचे सूत्रसंचालन मंगला गुळे यांनी केले. यावेळी शालेय शिक्षिका रंजना घुले, कल्पना पाटील, मनिषा जाधव आदी उपस्थित होते.
उन्नती विद्यालय
उन्नती एज्युकेशन सोसायटी संचलित उन्नती प्राथमिक विद्यालयात डॉ. ए. पी. जे. अब्दुल कलाम यांच्या जयंतीनिमित्त वाचन प्रेरणा दिन साजरा करण्यात आला. लायन्स क्लब नाशिक सेंट्रल यांच्या वतीने शंभर पुस्तके असलेली ग्रंथपेढी शाळेस देण्यात आली. तसेच चार्टड अकाऊंट भूषण कोतकर यांनी डॉ. कलाम लिखित पुस्तके खरेदी करण्यासाठी शाळेस रुपये २१०० तर निळकंठ नेक यांनी पुस्तकांसाठी रुपये ११०० ची देणगी दिली. कार्यक्रमाचे सूत्रसंचालन रत्नाकर अलई यांनी तर आभार मुख्याध्यापक नंदलाल धांडे यांनी मानले. यावेळी लायन्स क्लब नाशिक सेंट्रलचे अध्यक्ष किशोर शिरुडे, माजी अध्यक्ष विनोद कोठावदे, सेक्रेटरी विनोद सोनजे आदी उपस्थित होते.
महापालिका शाळा
नाशिक : महापालिका शाळांमध्ये वाचन प्रेरणा दिनानिमित्त विविध उपक्रम राबविण्यात आले. अंबड येथील शाळा क्रमांक ७२ येथे शाळेतील उपशिक्षिका रुपाली चव्हाण यांनी या शाळेच्या ग्रंथालयास १०१ पुस्तक भेट स्वरुपात दिली. तसेच जागतिक हॅण्डवॉश दिनानिमित्त मनपा शाळांमध्ये शिक्षकांच्या वतीने स्वच्छतेची माहिती देण्यात आली.
मोबाइल अॅप डाउनलोड करा आणि राहा अपडेट
