सनातनवर बंदी घालणे चुकीचेच

September 22, 2015, 12:00 pm

≫ Next: पोलिस अधिकाऱ्यांचा ताण होणार कमी

≪ Previous: उज्जैन कुंभमेळ्यातील घरांना नाशिककरांचा टच

शंकराचार्य स्वरुपानंद सरस्वती यांचे प्रतिपादन

म. टा. वृत्तसेवा, त्र्यंबकेश्वर

सनातन संस्थेवर बंदी घालणे चुकीचे असून, दिवंगत दाभोलकर आणि पानसरे यांच्या खुनाचा शोध शासनाने आपल्या पोलिस, गुप्तचर आदी यंत्रणांच्या माध्यातून घ्यावा. उगीचच सनातनसारख्या धर्मकार्य करणाऱ्या संस्थेवर बंदी घालण्याचा निर्णय घेणे योग्य होणार नाही, असे ज्योतिषमठ आणि शारदामठ यांचे पीठाधिश्वर जगदगुरू शंकराचार्य स्वरुपानंद सरस्वती यांनी म्हटले आहे.

त्र्यंबकेश्वर येथे आयोजित पत्रकार परिषदेत ते बोलत होते. ते म्हणाले की, भारताच्या कानाकोपऱ्यातून येथे भाविक, भक्त, साधू-संत आले म्हणूनच हा वैश्विक मेळा आहे. एकात्मतेचा संदेश देणारा आहे. हिंदू धर्मातील विविध पंथ, उपासना पध्दती शेवटी एकच आहेत. ही एकात्मता मोसंबी अथव संत्री सारखी नाही जे फोडल्या नंतर छिलके उडतात, तर ही एकात्मता टरबुजासारखी आहे. कापले तरी ते एकसंघता सोडत नाही. सुमारे २५००वर्षांपूर्वी आद्य शंकराचार्य यांनी पीठांची निर्मिती केली व संपूर्ण भारतवर्षात हिंदू धर्म एकसंघ केला.

आपल्या विरुध्द ज्योतिषपीठाबाबत वासुदेवानंद यांनी सर्वोच्च न्यायालयात याचिका दाखल केली होती. ती फेटाळली आहे. त्यांनी सादर केलेले त्यांच्या गुरुंचे इच्छापत्र खोटे होते, असे यापूर्वीच सिध्द झाले आहे. त्याचप्रमाणे काशी येथे कोणतेही पीठ नाही. काही व्यक्ती स्वतःला शंकराचार्य म्हणवितात. मात्र, नियमांचे पालन करीत नाही, असे म्हणून त्यांनी आपण चार्तुमासात नदी ओलांडायची नाही म्हणून अद्याप त्र्यंबकेश्वराच्या मंदिरात देखील गेलेलो नाही. काही आपल्या वाहनावर शंकराचार्य लिहितात आणि अशी वाहने रस्त्यावरील धाब्यावर उभी राहतात. हा धर्माचा अवमान आहे. अशा व्यक्तींना शासनाने समज दिली पाहिजे. आपण स्नान केले याचे कारण जनतेत स्नानाचे महत्त्व टिकले पाहिजे. सनातन धर्माचे रक्षण झाले पाहिजे. आपल्याला मध्य प्रदेश शासनाने संरक्षण दिले आहे. अर्थात संरक्षणाचा उपयोग बडेजाव म्हणून नको मात्र, हिंदू धर्माचे आपण धर्मगुरू आहात इतर धर्माच्या धर्मगुरुंना शासन अधिक महत्त्व देत असताना कोट्यवधी हिंदूंच्या सर्वोच्च पीठाबाबत आकस बाळगणे चुकीचे आहे.

नेपाळवर मावोवादी षडयंत्राचा प्रभाव

नेपाळ राष्ट्राने हिंदू धर्मीय न होता निधर्मी म्हणून स्वतःस जाहीर केले, हे अत्यंत चुकीचे झाले. यामुळे या देशाची एकसंघता लयास जाईल. हा मावोवादी षडयंत्राचा प्रभाव आहे, असे देखील त्यांनी सांगितले. लोकशाही पाहिजेच मात्र, धर्म देखील जपला पाहिजे, हा राजधर्म आहे. नेपाळचा राज चांगला होता मात्र, हे षडयंत्र करणाऱ्यांनी राज परिवाराची हत्या केली. राजकुमारास दोषी ठरविले. तो देखील हयात नाही. येथे ख्रिश्चनधर्माचे प्राबल्य वाढण्याची शक्यता आहे. देशातील मुस्लिम धर्मियांनी आपल्या धर्माचे पालन करावे. त्यांना आमचा कधीच विरोध नाही, असे त्यांनी स्पष्ट केले.

Latest Images