म. टा. प्रतिनिधी, नाशिक
जमीन हस्तातंरण करण्याच्या प्रक्रियेसाठी पन्नास लाख रूपयांची लाच मागणाऱ्या मालेगावच्या अप्पर जिल्हाधिकारी रामचंद्र पवार यांच्यासह एका मध्यस्थास अॅण्टी करप्शन ब्युरोने आज बेड्या ठोकल्या. मालेगाव, अहमदनगरसह शहरातील त्यांच्या मालमत्तांचा शोध घेण्याचे काम रात्री उशिरापर्यंत सुरू होते.
हिरावाडी येथील जंयतीभाई पटेल यांच्यासह त्यांच्या काही मित्रांनी मिळून नांदगाव तालुक्यात गणेशनगर आणि गंगाघाटी येथे ७५ एकर ८५ गुंठे जमीन खरेदी केली. याच जमिनीचे हस्तांतरणाचे काम पवार यांच्याकडे पोहचले असता, त्यांनी पटेल यांना नोटीस पाठवली. शेतकरी नसताना जमीन खरेदी करणे आणि नजराणा बुडवणे यामुळे, तुमच्यावर फौजदारी कारवाई का करू नये, अशा अशायाची ती नोटीस होती. यानंतर, तक्रारदार पटेल यांनी शेतकरी असल्याचा पुरावा सादर करून नजराणा रक्कम भरण्याची तयारी दर्शवली. मात्र, पुढील कारवाई टाळण्यासाठी संशयित आरोपी पवार यांनी तक्रारदाराकडे ५० लाख रूपयांची लाच मागितली. यासाठी पवार यांच्यातर्फे दिनेशभाई पंचासरा यांनी काम केले. पंचासरा हे खडी क्रशर उद्योगाशी निगडीत असून, त्यांचे पवार यांच्याकडे सातत्याने जाणे-येणे होते. याप्रकरणात त्याने मध्यस्थ म्हणून काम पाहिले.
दरम्यान, एसीबी कारवाई करणार असल्याची कुणकुण लागल्याने पवार यांनी दोन्ही वेळेस पैसे स्वीकारले नाहीत. याच दरम्यान, एसीबीने पवार आणि तक्रारदार तसेच पंचासरा आणि तक्रारदारात झालेले संभाषण व इतर पुरावे संकलित केले. या आधारे पवार आणि पंचासरा विरोधात भद्रकाली पोलिसात गुन्हा दाखल केल्याची माहिती अॅण्टी करप्शन ब्युरोचे अधीक्षक डी. पी. प्रधान यांनी दिली. दोन महिन्यापासून एसीबीचे अधिकारी या केसवर काम करीत असल्याचे प्रधान यांनी स्पष्ट केले. आज, सकाळी ११ वाजून १० मिनिटांनी गुन्हा दाखल झाल्याबरोबर दोघांना ताब्यात घेतले.
रात्री उशिरापर्यंत चौकशी
मालेगावचे अप्पर जिल्हाधिकारी रामचंद्र पवार यांना लाचलुचपत विभागाने ताब्यात घेतल्यानंतर शहरात खळबळ उडाली. पवार यांच्या निवास स्थानाच्या हाकेच्या अंतरावर तहसील तसेच प्रांत कार्यालय असल्याने कामकाजासाठी आलेले कर्मचारी व अधिकारी तसेच नागरिकांनी त्यांच्या निवासस्थानी एकच गर्दी केली होती. पवार यांचे सरकारी निवासस्थान व कार्यालयात नाशिक येथील अधिकाऱ्यांकडून सायंकाळी उशिरापर्यंत तपासणी सुरूच होती. पवार यांच्याकडे मोठे घबाड सापडण्याची शक्यता व्यक्त केली जात आहे. बुधवारी (ता. ५) सायंकाळी लाचलुचपत विभागाने मनपा शिक्षण मंडळातील कनिष्ठ लिपिकास २० हजाराची लाच घेतांना रंगेहाथ पकडले होते आणि या कार्यवाहीला २४ तास उलट नाहीत, तोच गुरुवारी सकाळी थेट अप्पर जिल्हाधिकारी यांना लाचलुचपत विभागाने अटक केल्याने या धडक कार्यवाहीबद्दल शहरात चांगलीच चर्चा रंगली होती. शहरात मागील काही महिन्यांतच लाचलुचपत विभागाने वेगवेगळ्या प्रशासकीय विभागात लाच घेतांना अधिकारी रंगेहाथ पडकले आहेत. २५ फेब्रुवारी रोजी येथील प्रांत संदीप पाटील, शिरस्तेदार हर्षल गायधनी आणि वरिष्ठ लिपिक नाना बागडे यांना देखील सव्वादोन लाख रुपयांची लाच घेतांना पकडले होते. २०११ मध्ये अप्पर जिल्हा अधिकारी यशवंत सोनावणे यांना तेल माफियांकडून जिवंत जाळण्यात आले होते. त्यावेळी देखील त्यांच्यावर लाच मागितल्याचा आरोप झाला होता. मालेगाव तहसील व प्रांत कार्यालयातील कारभाराबद्दल देखील नेहमीच लाचखोरी होत असल्याचा विषय चर्चेच असतो. लाचलुचपत विभागाकडून गेल्या काही महिन्यांत सातत्याने होत असलेल्या धडक कार्यवाहीमुळे मालेगावचे महसूल प्रशासन कारभार चांगलाच चर्चेत आला आहे.
आज कार्यवाही करण्यात आलेल्या पवार यांच्या लाचखोर कारभाराबद्दल देखील सातत्याने तक्रारी झाल्या होत्या. मात्र, लाचलुचपत विभागाने संपूर्ण पुरावे हाती घेण्यासाठी जून महिन्यापासून त्यांच्यावर पाळत ठेवली आणि योग्य रेकोर्ड व पुरावे हाती लागल्या बरोबर त्यांना अटक करण्यात आली आहे. मात्र, गेले काही दिवस लाचलुचपत विभागाकडून होत असलेल्या कार्यवाहीमुळे एकूणच मालेगाव प्रशासनातील अधिकारी व कर्मचाऱ्यांत चांगलीच दहशत पसरली आहे. तर नागरिकांमध्ये या कार्यवाहीबाबत समाधान व्यक्त केले आहे. महसूल यंत्रणेतील अनागोंदी कारभारास अशा कार्यवाहीमुळे निश्चितच वचक बसेल अशा प्रतिक्रिया व्यक्त होत आहेत .
तीन ठिकाणी संपत्तीचा शोध
एसीबीने ताब्यात घेतल्यानंतर संशयित आरोपी पवार यांच्यासह पंचासरा यांना नाशिकमध्ये आणण्यात आले. अटकेबाबतची तांत्रिक पूर्तता करून लागलीच त्यांना पुन्हा मालेगावला नेले. पवार हे मुळचे अहमदनगर जिल्ह्यातील श्रीगोंदा तालुक्यातील आहेत. नाशिक आणि मालेगाव येथेही ते बऱ्याच वर्षांपासून राहतात. निवृत्तीला अवघे काही महिने बाकी असताना अटक केलेल्या पवारांच्या संपत्तीचा या तीनही ठिकाणी शोध घेण्याचे काम तातडीने हाती घेण्यात आले.
तक्रारदाराकडे लाच मागितल्याचे पुरावे संकलित केल्यानंतर गुन्हा दाखल करण्यात आला. दोघा संशयितांना अटक करण्यात आली. पवार यांच्या संपत्तीचा शोध घेण्यासाठी अहमदनगर तसेच मालेगाव येथे पथक तैनात करण्यात आले आहे. - डी. पी. प्रधान, अधीक्षक, एसीबी
मोबाइल अॅप डाउनलोड करा आणि राहा अपडेट