तालुक्यात झालेल्या ७७ ग्रामपंचायतींच्या निवडणुकीत तालुक्यात दोन्हीही प्रमुख पक्षांनी विजयाचा दावा केला आहे. निवडणुकीत राष्ट्रवादी व भाजपला संमिश्र यश मिळाल्याचे चित्र निर्माण झाले आहे. त्यामुळे तालुक्यात विजयी उमेदवारांकडे खुशी तर पराभूत उमेदवांरांकडे 'गम' असे वातावरण दिसून आले. निवडणुकीत भाजपला ४५ ग्रामपंचायतींवर वर्चस्व मिळाल्याचा दावा भाजपचे तालुकाध्यक्ष के. बी. साळूंखे यांनी केला. तर निवडणुकीत ६५ टक्के जागा निवडून आल्याचा दावा राष्ट्रवादीचे तालुकाध्यक्ष शश‌िकांत साळूंखे यांनी केला आहे.
तालुक्यात मतदान झालेल्या ७७ ग्रामपंचायतींपैकी ८ ग्रामपंचायती बिनविरोध झाल्याने ६९ ग्रामपंचायतींची पंचवार्षिक व तीन ग्रामपंचायतींची पोटनिवडणूक ४ ऑगस्ट रोजी पार पडली. मतमोजणीस गुरूवारी सकाळी आठ वाजेच्या सुमारास शहरातील हिरापूर रोडवरील राष्ट्रीय महाविद्यालयात सुरुवात झाली. निवडणुकीनंतर काही ठिकाणी वाद झाल्याने मतमोजणीसाठी प्रशासनाने जय्यत तयारी केली होती. निकालानंतर कोणताही वाद उद्भवू नये म्हणून कडक बंदोबस्त ठेवण्यात आला होता. मतमोजणीसाठी २५ टेबल लावण्यात आले होते. १६०च्या वर कर्मचाऱ्यांची नियुक्ती करण्यात आली होती. ३५० पोलिस व होमगार्ड कर्मचारी व अधिकाऱ्यांचा ताफा बंदोबस्तासाठीतैनात करण्यात आला होता. शहराला लागून असलेल्या टाकळी प्र. चा. येथील निवडणुकीत मोठ्या संख्येने तरुण उमेदवार उतरले होते. त्यामुळे येथील निकालाकडे सर्वांचे लक्ष लागले होते. येथे भाजपचे पंचायत समिती सदस्य जगन महाजन यांच्या पॅनलने १५ पैकी ११ जागा मिळवत सत्ता काबीज केली. वाघळी ग्रामपंचायतही आधी राष्ट्रवादीच्या ताब्यात होती. या निवडणुकीत भाजपचे माजी जिल्हा परिषद सदस्य पोपट भोळे यांच्या पॅनलने १५ पैकी ११ जागा मिळवत सत्ता खेचून आणली. वाघळी ग्रामपंचायतीच्या निवडणुकीच्या प्रचारात मूळ वाघळीचे असलेले व जळगावचे आमदार सुरेश भोळे उतरले होते. त्यांनी निवडणुकीत गावच्या समस्या सोडविण्याचे आश्वासन गावकऱ्यांना दिले होते.
मोबाइल अॅप डाउनलोड करा आणि राहा अपडेट
