बारा वर्षांनी एकदा येणा-या सिंहस्थ पर्वकाळाला दि. १४ जुलै २०१५ रोजी सकाळी साडेसहा वाजता प्रारंभ होत आहे. त्र्यंबकवासीयांनी करायचे ते दणक्यात म्हणत जोरदार तयारी सुरू केली आहे. या महापर्वाचा प्रारंभ तितकाच भव्य दिव्य झाला पाहिजे म्हणून त्र्यंबक नगरपालिका, पुरोहित संघ, त्र्यंबकेश्वर देवस्थान विश्वस्त, साधू-महंत आणि शहरातील सामाजिक संस्था, सार्वजनिक उत्सव मंडळांच्या संयुक्त बैठका घेऊन नियोजन केले आहे.
त्र्यंबक पालिकेने येथे होणाऱ्या कार्यक्रमाची जबाबदारी स्वीकारली आहे. कुशावर्त चौक, गंगामंदिर समोर भव्य शामियाना उभरण्यात येत आहे. पावसाची शक्यता लक्षात घेता सर्वतोपरी काळजी घेण्यात येत आहे. भव्य व्यासपीठ आणि सर्वांना बसण्याची सुविधा असेल. त्याचप्रमाणे निमंत्रण पत्रिका तयार करण्यात आली आहे. त्र्यंबक नगरपालिका, पुरोहित संघ आणि त्र्यंबकेश्वर देवस्थान ट्रस्ट असा सर्वांचा एकत्रित कार्यक्रम असून, सुमारे दहा हजार व्यक्तींची हजेरी या प्रसंगी लाभणार असल्याचा अंदाज व्यक्त करण्यात आला आहे.
दरम्यान, ध्वजारोहण पर्वाच्या पूर्वसंध्येला पुरोहित संघाच्या वतीने शोभायात्रा काढण्यात येणार आहे. यामध्ये चित्ररथ सामील करण्यात येणार आहे. सिंहस्थ कथा संदर्भातील रथ आकषर्ण ठरतील, असे नियोजन करण्यात आले आहे. ध्वजारोहणाचा कार्यक्रम श्री शंभू पंचदशनाम जुना आखाड्याचे महामंडलेश्वर अवधेशानंदजी यांच्या हस्ते होणार आहे. यावेळी जगद्गुरू शंकराचार्य महाराज उपस्थित राहणार आहेत. त्याचप्रमाणे केंद्रीय गृहमंत्री राजनाथ सिंह
तसेच उमाभारती, प्रकाश जावडेकर आदींसह मान्यवरांना निमंत्रित करण्यात आले आहे.
महिलांची तयारी
त्र्यंबकमधील नागरिक तयारीला लागले आहेत. येथील आदिशक्ती महिला मंडळ ढोल, लेझीम सराव करीत असून, सुमरे ५० महिला यात सहभागी झाल्या आहेत. याचबरोबर माहेश्वरी समाजाच्या महिला पारंपरिक टिपऱ्यांचा सराव करीत आहेत. शहरातील सार्वजनिक मंडळांनी आपापल्या परीने हा सोहळा भव्यदिव्य झाला पाहिजे, अशी तयारी केली आहे.
मोबाइल अॅप डाउनलोड करा आणि राहा अपडेट