प्रवीण बिडवे, नाशिक
जीव मुठीत धरून ये-जा करणारे शालेय विद्यार्थी, रस्त्यावरच ठाण मांडून बसणारी जनावरे, द्वारका, शालिमार, गडकरी चौक अन् भद्रकाली अशा चारही बाजूने गर्दी करणाऱ्या वाहनांमुळे सारडा सर्कलचा श्वास कोंडला आहे. वाहतूक पोलिसांची अनुपस्थिती आणि बेशिस्त वाहनचालक यामुळे येथून ये-जा करणारे विद्यार्थी आणि अन्य नागरिकांनाही जीव मूठीत धरून प्रवास करावा लागतो आहे.
सारडा सर्कलसारख्या शहरातील मुख्य चौकात अपघाती मृत्यूच्या घटना अनेकदा घडल्या आहेत. किरकोळ अपघात ही तर नित्याची बाब बनली आहे. मात्र, तरीही येथील वाहतुकीच्या समस्या सोडविण्यासाठी प्रशासनाकडून लक्ष घातले गेलेले नाही. सिंहस्थ कुंभमेळ्याच्या पार्श्वभूमीवर शहरातील बहुतांश रस्त्यांचे रुंदीकरण, डांबरीकरण, डागडूजी व तत्सम कामे झाली. परंतु, शालिमार ते द्वारका या रस्त्याची मात्र उपेक्षाच करण्यात आल्याचे पहावयास मिळत आहे. म्हणूनच या परिसरात राहणारे आणि या परिसरातून सातत्याने ये-जा करणारे नागरिक याबाबत नाराजी व्यक्त करतात. एसटी महामंडळाच्या ८० टक्क्याहूंन अधिक बसेस सारडा सर्कलमार्गेच शहरातून बाहेर पडतात. पुणे, अहमदनगर, धुळे, या सर्वच मार्गांवरील, नाशिकरोडहून शहरात ये-जा करणाऱ्या नागरिकांकडूनही याच मार्गाचा अवलंब केला जात असल्याने चौकात नेहमीच वर्दळ असते.
भद्रकालीतील रहिवाशांच्या मुलांना सारडा सर्कल येथील उर्दू शाळेत जाण्यासाठी याच मार्गाचा अवलंब करावा लागतो. त्यामुळे सकाळी आणि सायंकाळी विद्यार्थ्यांची या चौकात मोठी गर्दी असते. चौकातील रस्ता ओलांडताना झालेल्या अपघातात शालेय विद्यार्थ्यांनी जीव गमावल्याच्याही घटना घडल्या आहेत. या चौकातून ओव्हर ब्रीज करावा अशी मागणी त्यावेळी रहिवाशांनी केली होती. मात्र ही मागणी अद्याप पूर्ण होऊ शकली नाही. त्यावेळी रहिवाशांची समजूत काढत या चौकामध्ये वाहतूक पोलिसांची नेमणूक करण्यात आली. परंतु आता अनेकदा वाहतूक पोलिसही तेथे गैरहजर असतात. त्यामुळे सकाळी आणि सायंकाळी येथे वाहतुकीचा बोजवारा उडतो. आधीच या मार्गावर असलेली वाहनांची वर्दळ त्यातच भद्रकालीतील लोखंड बाजारातील मालाची याच चौकातून होणारी ने-आण यामुळे वाहतुकीच्या समस्येमध्ये अधिकच भर पडते. भद्रकालीतील अनेक व्यापाऱ्यांच्या मालाची ने-आण करणारी वाहने याच चौकातून ये-जा करतात.
प्रश्न बनला जटील
मुंबई महामार्गाला जोडणारा जवळचा मार्ग म्हणूनही भद्रकाली, शालिमार, सीबीएस, त्र्यंबक नाका, रविवार कारंजा परिसरातील नागरिकही सारडा सर्कल, व्होक हार्ट हॉस्पिटल मार्गे ये-जा करू लागले आहेत. या चौकात अनेक वर्षांपासून पेव्हर ब्लॉक बसविले आहेत. हे ब्लॉक देखील वाहनांच्या वर्दळीमुळे खचले आहेत. अशा एक ना अनेक कारणांमुळे सारडा सर्कल येथील वाहतुकीचा प्रश्न जटील होत असून, त्यावर उपाय शोधण्याचे आव्हान प्रशासनाला पेलावे लागणार आहे.
येथील अतिक्रमणे काही प्रमाणात हटविण्यात आली असली तरी अनधिकृत बांधकामांच्या प्रश्नाला प्रशासनाने अजूनही हात घातलेला नाही. या चौकाने मोकळा श्वास घ्यावा यासाठी प्रशासनाने आश्वासक पाऊले उचलायला हवीत.
मोबाइल अॅप डाउनलोड करा आणि राहा अपडेट