मुख्यमंत्रिपदावरून भाजप-शिवसेनेत धुसफूस; होर्डिंग्जमुळे कोंडी
..
म. टा. खास प्रतिनिधी, नाशिक
राज्यात मुख्यमंत्री कोणाचा या विषयावरून शिवसेना आणि भाजपच्या वरिष्ठ नेत्यांमध्ये वर्चस्ववादाचे शाब्दिक युद्ध पेटले आहे. नाशिकमध्ये शिवसेनेच्या नगरसेविका किरण गामणे यांनी भाजप कार्यालयासमोरच 'मुख्यमंत्री शिवसेनेचा होणार' असा दावा करणारे पोस्टर्स लावून भाजपलाच आव्हान देण्याचा प्रयत्न केला आहे. यामुळे युतीमध्ये खळबळ उडाली असून, या पोस्टर्सने दोन्ही पक्षातील नेत्यांची कोंडी वाढली आहे. शिवसेनेच्या स्थानिक नेत्यांनी याबाबत कानावर हात ठेवले असून, संपर्कप्रमुख भाऊसाहेब चौधरी यांनी या प्रकरणाची माहिती मागवली आहे. दरम्यान, भाजपने युती तोडण्याचे हे षडयंत्र असल्याचे सांगत, अशा लोकांपासून सावध रहावे, असे आवाहन सेना नेत्यांना केले आहे.
लोकसभा निवडणुकीत झालेल्या युतीवेळी राज्यात मुख्यमंत्री कोणाचा होणार हे भाजपचे अध्यक्ष अमित शाह, मुख्यमंत्री देवेंद्र फडणवीस आणि शिवसेना पक्षप्रमुख उद्धव ठाकरे यांच्यात ठरले होते. त्यामुळे 'आमच ठरलंय' असे सांगत वरिष्ठ नेत्यांनी विधानसभेनंतर मुख्यमंत्री कोणाचा होणार याबाबतचे मौन पाळले आहे. परंतु, या वादानंतरही भाजपचे प्रदेशाध्यक्ष रावसाहेब दानव यांनी मुख्यमंत्री भाजपचाच होणार असे सांगितले. सोमवारी नाशिक दौऱ्यावर आलेल्या भाजपच्या राज्य प्रभारी सरोज पांडे यांनी मुख्यमंत्री भाजपचाच होईल असे ठणकावून सांगितले. तसेच, शिवसेनेला कल्पनाविलासात रमू द्या, असा टोलाही त्यांनी लगावला. त्यामुळे सेना आणि भाजपच्या नेत्यांमध्ये मुख्यमंत्री पदावरून शाब्दिक वार सुरू असतानाच आता कार्यकर्त्यांमध्येही धुसफूस सुरू झाली आहे. पांडे यांची पाठ फिरताच शिवसेनेच्या सिडकोतील नगरसेविका किरण गामणे यांनी मंगळवारी भाजपला आव्हान देणारे पोस्टर्स थेट भाजपच्या कार्यालयासमोरच लावले. 'मुख्यमंत्री भाजप-सेना युतीचाच होणार याचा अर्थ शिवसेनेचाच होणार' असे थेट मोठे होर्डिंग तीन ठिकाणी लावून भाजपला डिवचले आहे. शिवसेनेच्या नगरसेविकेनेच अशा प्रकारचे होर्डिंग्ज लावल्याने शहरात एकच चर्चेला उधाण आले. या होर्डिंग्जमुळे शिवसेना आणि भाजपमध्ये स्थानिक पातळीवर तणाव निर्माण झाला आहे. यातून अधिक वाद उद्भवू नये म्हणून पोलिसांनी हे होर्डिंग्ज काढून घेतल्याचे समजते. या प्रकरणामुळे शिवसेना आणि भाजपच्या युतीत मिठाचा खडा पडण्याची शक्यता असून, या प्रकरणाची वरिष्ठ पातळीवर गंभीर दखल घेण्यात आली आहे. स्थानिक भाजपन नेत्यांनी शिवसेनेतील काही लोक हे युती तोडण्यासाठी षडयंत्र करीत असल्याचा आरोप केला आहे.
...
पक्षप्रमुखांचे आदेश डावलले
नगरसेविका गामणे यांनी लावलेल्या होर्डिंग्जमुळे स्थानिक भाजप आणि शिवसेनेच्या नेत्यांमध्ये तणाव निर्माण होऊ नये, यासाठी स्थानिक शिवसेनेच्या नेत्यांनी या होर्डिंग्जच्या प्रकारापासून अंतर राखण्याचा प्रयत्न केला आहे. काहींनी तर या प्रकारामुळे वाद ओढवू नये म्हणून संपर्क क्षेत्राच्या बाहेर जाणे पसंत केले आहे. संबंधित नगरसेविकेचे हे वैयक्तिक मत आहे असे सांगत, याबाबत स्थानिक नेत्यांनी अधिक बोलण्यास नकार दिला.
...
मुख्यमंत्री भाजपचाच होणार हे सरोज पांडेचे वक्तव्य म्हणजे शिवसेनेच्या बालेकिल्लात येऊन शिवसेनेला डिवचण्याचा प्रकार आहे. शिवसैनिक हे खपवून घेणार नाही. मुख्यमंत्रिपदाचा निर्णय वरिष्ठांनी घेतला आहे. त्यात कुणी पडू नये.
- किरण गामणे, नगरसेविका
...
भाजप कार्यालयासमोर होर्डिंग्ज लावणारे हे शिवसेनेचे अधिकृत आहेत का, याचाही शोध आम्ही घेत आहोत. शिवसेना आणि भाजपची युती आकाराला येत असताना कुणीतही युतीला ग्रहण लावण्याचा प्रयत्न करीत आहे. युतीत बिघाडाचे हे षडयंत्र आहे. त्यामुळे शिवसेनेने अशा लोकांपासून सावध राहिले पाहिजे.
- लक्ष्मण सावजी, सरचिटणीस, भाजप
...
मुख्यमंत्री आणि शिवसेना प्रमुख उद्धव ठाकरे यांच्याशिवाय मुख्यमंत्री पदाबाबत कुणी बोलू नये हे आधीच ठरलंय. त्यामुळे दोन्ही बाजूच्या नेत्यांनी संयम पाळला पाहिजे. नाशिकमधील होर्डिंग्ज प्रकाराबाबत संबधितांकडून माहिती मागवली आहे.
- भाऊसाहेब चौधरी, संपर्कप्रमुख, शिवसेना
