Prashant.bharvirkar@timesgroup.com Tweet : bharvirkarPMT नाशिक : आषाढी एकादशीनिमित्त अनेक गाणी येतात. किती तरी विठ्ठलभक्तीचे अभंग, भजनं त्यात असतात. वारकरी पंढरपूरला येतो, परंतु तो घरी नीट पोहोचला की नाही, याची काळजी पांडुरंगाला असते. 'आम्ही पोहोचलो पांडुरंगा तू नीज आता' अशी भावना असलेले एक वेगळेच गीत नाशिकच्या प्राजक्त देशमुखने लिहिले असून, त्याला प्रख्यात शास्त्रीय गायिका देवकी पंडित यांचा स्वर लाभला आहे. आज हे गाणे यू ट्यूबवर रिलीज होत आहे. रागभक्तीनिर्मित हे गाणे 'निर्माणमोहा'ने प्रस्तुत केले आहे. नाशिक महापालिका शाळा क्रमांक ५, मानूर येथील शालेय विद्यार्थ्यांना घेऊन हा व्हिडीओ चित्रीत केलेला असून, संगीत संयोजन कमलेश भडकमकर यांचे आहे. वारकरी पंढरपुराहून निघाल्यानंतर घरी पोहोचला की नाही, या चिंतेत भगवंत असतो. परंतु, तो थकलेला आहे, त्याला विश्रांतीची गरज आहे म्हणून एक वारकरी त्याला झोप घेण्यासाठी आळवत आहे, असा भाव या गाण्यात आहे. प्राजक्त म्हणतो, हा व्हिडीओ मी आईला दाखवला तेव्हा आई म्हणाली, ही देवशयनी एकादशीच आहे. म्हणजे देव झोपी जातात, आजच्या दिवशी आणि पुन्हा कार्तिकी एकादशीला उठतात. देव आता झोपणार आहे म्हणून झोपण्यापूर्वीचे शेवटचे दर्शन म्हणजे आषाढी एकादशी! मी अचंबित झालो, कारण मला यातलं काहीच माहीत नव्हतं. मी एका सहजसाध्या भावनेने हे करायचं ठरवलं. पण, मग लक्षात आलं झोपी जाणाऱ्याला कलकलाट करीत भेटण्यापेक्षा असंच मंजूळ संगीत ऐकवत का झोपवू नये आपण? पांडुरंगाचे हे अंगाईगीत You tube Search : Nij Nij Devaki Pandit Prajakt Deshmukh या नावाने https://youtu.be/kySvSJBLIZw या लिंकवर भक्तांसाठी आजपासून खुले होणार आहे. --- ...अशी आहे टीम छायाचित्रण-संकलन : अभिषेक कुलकर्णी दिग्दर्शन सहाय्य : अभिषेक वालझाडे, बासरी : संदीप कुलकर्णी, साईड ऱ्हिदम : दीपक थोरकर, कलावंत : सार्थक जाधव, गौरव मिटके, करण दरोडे, कृष्णा नवले, कृष्णा राथड, माया टोकरे, राधिका बुधर, साहील गावित, अर्चना राथड, वैष्णवी बेलेकर आणि विजय साळवे, सूत्रधार : गिरीश गर्गे, हेमंत महाजन, निर्मिती व्यवस्था : राजेश भुसारे, प्रणव प्रभाकर, श्रीपाद देशपांडे, प्रकाशयोजना : प्रफुल्ल दीक्षित, सुलेखन : सुप्रिया देशमुख. -- आषाढ सुरू झाला, की पंढरपूरचे मंदिर चोवीस तास उघडे ठेवतात. देवाच्या काळजीपोटी विठोबा-रखूमाईच्या मूर्तींमागे तक्क्या-उशा ठेवण्याचा प्रघात आहे. आषाढीला सर्व भाविक वाजतगाजत त्याच्या दारी जातात. पण, नंतर त्याचे काय होत असेल? या कलकलाटानंतर त्याला कुणी 'झोप आता, खूप केलंस' म्हणतं का? मी तेच म्हणायचं ठरवलं. देवकीताईंचा दैवी स्वर त्याला मिळाला. -प्राजक्त देशमुख, दिग्दर्शक-गीतकार --- ही कल्पना जेव्हा मला प्राजक्तने सांगितली तेव्हाच मला ती विलक्षण आवडली. तोच भाव आहे जो अंगाईचा आहे. फक्त यावेळी भक्त माउली झाले आहेत, आई झालेले आहेत. खूप सढळ हस्ते तू आम्हाला दिले. आता तू झोप. निखळ प्रेमातूनच हा वात्सल्याचा भाव उतरलाय. या विलक्षण कल्पनेचा मला भाग होता आले याचा मला मनस्वी आनंद आहे. -देवकी पंडित, गायिका-संगीतकार
मोबाइल अॅप डाउनलोड करा आणि राहा अपडेट
