घटनास्थळी कामगारांचा आक्रोश ... म. टा. वृत्तसेवा, सातपूर /म. टा. खास प्रतिनिधी, नाशिक 'आला पावसाळा जीवाला सांभाळा' अशी म्हण मराठीत आहे. परंतु, यातील गांभीर्याकडे दुर्लक्ष केल्याने गंगापूररोडवरील ध्रुवनगर येथे पाण्याची टाकी चौघा कामगारांसाठी काळ ठरली. सम्राट ग्रुपच्या 'अपना घर' या बांधकाम साइटवर मंगळवारी सकाळी साडेसात वाजेच्या सुमारास ही घटना घडली. बीबी सनाबी शेख (वय २७, पश्चिम बंगाल) या महिलेसह अब्दुल गरीबुल बारी (वय ३०, रा. बिहार), सुदाम खिरदार (रा. ओडिसा), अनामी चंदन (वय ५०, रा. ओडिसा) अशी मृत्युमुखी पडलेल्या चौघांची नावे आहेत. या घटनेत शेख मझार आलम (वय ३०, रा. पश्चिम बंगाल) हा कामगार जखमी झाला आहे. ही बांधकाम साइट मोठी असून, सध्या येथे जोरदार काम सुरू आहे. बांधकामासाठी उत्तर प्रदेश, बिहार आणि पश्चिम बंगाल येथून आलेल्या कामगारांच्या निवासासाठी तात्पुरती सोय केली आहे. याच मजुरांच्या पाण्याची सोय करण्यासाठी ३० हजार लिटर क्षमतेची ही टाकी उभारली होती. मंगळवारी सकाळी काम सुरू करण्यापूर्वी कामगारांची नेहमीप्रमाणे तयारी सुरू होती. पाण्याच्या टाकीजवळ किमान आठ ते दहा कामगार आंघोळ, कपडे धुणे, दात घसत होते. अचानक एक आवाज झाला. विस्फोट व्हावा त्याप्रमाणे टाकी कोसळून पडली. विटा आणि हजारो लिटर पाण्याने तिथे असलेल्या कामगारांना कवेत घेतले. सुदैवाने काही वेळतेच बाजूला सरले. मात्र, वरील चौघा कामगारांना नियतीने तेवढा वेळ दिला नाही. या घटनेने साइटवरील कामगारांसह त्यांच्या कुटुंबीयांमध्ये एकच खळबळ उडाली. आर्त किंकाळ्यांनी हा परिसर गजबजून गेला. घटनेची माहिती मिळताच अग्निशमन दलाचे जवान घटनास्थळी दाखल झाले. या जवानांनी दिलेल्या माहितीनुसार, ते पोहचले तेव्हा दोघा जखमी कामगारांना तेथून हलविण्यात आले होते. इतर बांधकामाच्या राडारोड्याखाली दबलेले होते. रविवारी रात्रीच्या पावसामुळे तेथे मदत पोहचणे शक्य नव्हते. त्यामुळे एका ट्रॅक्टरने कसाबसा गाळातून तिथपर्यंत मार्ग काढला. एक मोठा चबुतरा असून, त्यावर विटा आणि सिमेंटच्या मदतीने या मोठ्या टाकीचे बांधकाम केले होते. पावसामुळे जमिनीत पाणी मुरून टाकीचा चबुतरा हलला आणि आतील पाण्याच्या प्रेशरमुळे पुढील प्रकार घडला असावा, अशी शक्यता अग्निशमन दलाच्या जवानांनी व्यक्त केली. ... ... तर दुर्घटना टळली असती! संबंधित बांधकाम व्यावसायिकाने काम करणाऱ्या मजुरांसाठी पत्र्याचे टेंट उभारले आहे. मजुरांना आंघोळ, पिण्याचे पाणी व इतर कामासाठी पाण्याच्या टाकीची व्यवस्था केली होती. ही टाकी वरच्या बाजूने झाकलेली नाही. त्यामुळे दोन दिवसांपासून सुरू असलेल्या संततधार पावसामुळे टाकी ओव्हरफ्लो झाली होती, असे प्रत्यक्षदर्शी मजुरांनी सांगितले. पाण्याची टाकी नादुरुस्त झाल्याबाबत तक्रार मजुरांनी केली होती. मात्र याकडे ठेकेदाराने लक्ष दिलेच नाही. या प्रकरणी गंगापूर पोलिस ठाण्याचे पोलिस अधिक माहिती घेत असून, पुढील तपास सहाय्यक पोलिस निरीक्षक साबळे करीत आहेत. 'अपना घर' या घरकुलच्या बांधकामाच्या ठिकाणी तब्बल सात ते आठ ठेकेदारांनी काम घेतले असल्याचे समजते. ... कच्च्या जागेवर स्ट्रक्चरल ऑडिट कसे? 'अपना घर' या ठिकाणी सुरू असलेल्या बांधकामाच्या ठिकाणी महापालिका आयुक्त गमे यांनी भेट दिली. यावेळी प्रसारमाध्यमांशी बोलताना संबंधित जागेचे स्ट्रक्चरल ऑडिट केले जाईल, अशी माहिती दिली. प्रथम दर्शनी बांधकाम कच्चे असल्याचे दिसते. त्याबाबत अधिक माहिती घेऊन पुढील कारवाई केली जाईल, असेही गमे यांनी सांगितले. यावेळी महापालिकेचे सातपूर विभागीय अधिकारी राजेंद्र गोसावी व कर्मचारी उपस्थित होते. ... महापालिकेच्या अहवालानंतर गुन्हा शहराचे पोलिस आयुक्त विश्वास नांगरे पाटील यांनी घटनास्थळी भेट दिली. यावेळी पोलिस उपायुक्त लक्ष्मीकांत पाटील यांच्यासह इतर अधिक हजर होते. ही आकस्मात घटना असून, महापालिकेकडून माहिती मिळाल्यावर सदोष मनुष्य गुन्हा दाखल करणार असल्याचे सांगितले. पोलिस आयुक्त नांगरे पाटील यांनी संपूर्ण जागेची पाहणी करून गंगापूर पोलिसांना योग्य सूचनाही दिल्या. परंतु, संबंधित जागेवर केवळ बांधकाम मजुरांना पिण्याची पाण्याची व्यवस्था करण्यात आली होती. याबाबत कुठलीही ठोस व्यवस्था ठेवली नसल्याने मजुरांना त्यांचे प्राण गमवावे लागले, असा आरोप केला जात आहे. संबंधित घटनेची सखोल चौकशी महापालिका व पोलिस आयुक्तांनी करावी, अशी मागणी स्थानिकांनी केली आहे.
मोबाइल अॅप डाउनलोड करा आणि राहा अपडेट
