नाशिक : ड्रिल मशिनने भिंतीस होल पाडत असतांना अंडरग्राऊंड असलेली वीज वितरणाची वायर तुटल्याने प्लंबरचा शॉक बसून मृत्यू झाला. ही घटना उंटवाडीतील सिटी सेंटर मॉलमध्ये घडली. या प्रकरणी गंगापूर पोलिस ठाण्यात आकस्मात मृत्यूची नोंद करण्यात आली. सुमेरसिंग बहादुरसिंग देवरे (वय ३५, रा. खोडे मळा, सावतानगर सिडको) असे मृत प्लंबरचे नाव आहे. देवरे हे शनिवारी (दि.१५) एका ठेकेदारामार्फत मॉलमधील दुरुस्तीचे काम करीत असतांना ही घटना घडली. नळफिटींगसाठी दुपारी साडेतीनच्या सुमारास देवरे हे ड्रिलमशिनने भिंतीस होल पाडत होते. यावेळी अंडरग्राऊंड असलेली वीजपुरवठा करणारी वायर तुटली. त्यामुळे ड्रिल मशिनमध्ये वीजप्रवाह उतरला. या घटनेत देवरे गंभीर जखमी झाले होते. दोन्ही हात भाजल्याने त्यांना जिल्हा रुग्णालयात तत्काळ दाखल करण्यात आले. मात्र, डॉक्टरांनी तपासून देवरे यांना मृत घोषित केले. वृद्धाचा मृत्यू नाशिक : घरासमोरील अंगणात चक्कर येऊन पडल्याने दत्तात्रेय रघुनाथ यार्दी (रा. सर्वेश बंगला, कार्तिकेयनगर) यांचा मृत्यू झाला. ही घटना सिडकोतील कामटवाडा भागात घडली. यार्दी हे शनिवारी (दि. १५) दुपारी तीनच्या सुमारास आपल्या घरासमोरील अंगणात उभे असतांना अचानक चक्कर येऊन जमिनीवर कोसळले. जिल्हा रुग्णालयात त्यांना तत्काळ दाखल करण्यात आले. मात्र, डॉक्टरांनी तपासून मृत घोषित केले. या प्रकरणी अंबड पोलिस ठाण्यात आकस्मात मृत्यूची नोंद करण्यात आली आहे.
मोबाइल अॅप डाउनलोड करा आणि राहा अपडेट
