सामाजिक भान हे संवेदनशील मनाचे लक्षण साहित्यिक विजयकुमार मिठे यांचे प्रतिपादन - - म. टा. प्रतिनिधी, नाशिक समाजाची जबाबदारी विचारवंत, लेखक, कवी व समाजकार्य शिक्षण घेणाऱ्या विद्यार्थ्यांची आहे. सामाजिक जबाबदारीचे भान असणे हे जिवंतपणाचे लक्षण असून हे भान पाय जमिनीवर असणाऱ्यांकडे असतात. त्यासाठी संवेदनशील मन असले पाहिजे, असे प्रतिपादन प्रसिद्ध ग्रामीण साहित्यिक विजयकुमार मिठे यांनी केले. समाजकार्य महाविद्यालयाच्या वार्षिक गुणगौरव समारंभाचे आयोजन करण्यात आले होते. यावेळी साहित्यिक मिठे यांची प्रमुख उपस्थिती होती. प्रमुख अतिथी म्हणून बोलत होते. महाविद्यालयाचे प्राचार्य डॉ. विलास देशमुख यांनी स्वागतपर मनोगत व्यक्त करत शैक्षणिक गुणवत्ताधारक विद्यार्थ्यांचे अभिनंदन केले. तसेच महाविद्यालयाची भूमिका मांडली. वर्षभरात राबविण्यात आलेल्या शैक्षणिक उपक्रमांची चित्रफितीद्वारे प्रा. सुनिता जगताप यांनी वर्षभराचा अहवाल सादर केला. यावेळी महाविद्यालयातील विविध स्पर्धा, कार्यक्रम व शैक्षणिक गुणवत्ता संपादन केलेले विद्यार्थी तसेच महाविद्यालयाबाहेर राज्यस्तरीय, विद्यापीठ स्तरीय व जिल्हास्तरीय विविध स्पर्धांमध्ये सहभागी होऊन यश संपादन केलेल्या विद्यार्थ्यांचे सन्मानचिन्ह व प्रमाणपत्र देऊन गुणगौरव करण्यात आला. कार्यक्रमाचे प्रास्ताविक प्रा. प्रतिमा पवार यांनी केले. यावेळी मविप्रचे संचालक नानासाहेब महाले अध्यक्षस्थानी होते. यावेळी विविध स्पर्धा, शिक्षण आदींमध्ये यशस्वी ठरलेल्या विद्यार्थ्यांना गौरविण्यात आले. कार्यक्रमाचे सूत्रसंचलन प्रा. डॉ. घनशाम जगताप यांनी केले तर प्रा. प्रतिभा पगार यांनी आभार मानले. - - विद्यार्थ्यांचा गौरव गांधी रिसर्च फाउंडेशन अंतर्गत गांधी विचार परीक्षा महाविद्यालयात घेण्यात आली होती. या परीक्षेत महाविद्यालयाची विद्यार्थिनी मनिषा जाधव जिल्ह्यात प्रथम आल्याबद्दल सुवर्णपदक देऊन गौरवण्यात आले. माजी विद्यार्थिनी राजश्री भानगुडे हिलादेखील सावित्रीबाई फुले पुणे विद्यापीठांतर्गत सुवर्णपदक मिळाल्याबद्दल गुणगौरव केला. तसेच माजी विद्यार्थिनी करिश्मा सुर्यवंशी, निकिता जंगम व सविता भांगरे यांना अनुक्रमे प्रथम, द्वितीय व तृतीय क्रमांकाचे पारितोषिक देऊन सन्मानित करण्यात आले. यानंतर प्रथम वर्षाचे विद्यार्थी अक्षय बोंबले, नारायण गभाले व किर्ती वाणी यांना अनुक्रमे प्रथम, द्वितीय व तृतीय क्रमांकाचे पारितोशिक देऊन सन्मानित करण्यात आले.
मोबाइल अॅप डाउनलोड करा आणि राहा अपडेट