रत्नपारखी यांच्याकडे नाशिक, धुळे, नंदुरबार आणि मुंबईची जबाबदारी .. Bhavesh.Brahmankar@timesgroup.com Twitter - @BhaveshBMT .. नाशिक : माजी सैनिकांची काळजी वाहणाऱ्या जिल्हा सैनिक कल्याण कार्यालयाचा कारभार अधांतरीच असल्याची बाब समोर येत आहे. एकाच अधिकाऱ्याकडे नाशिक, धुळे, नंदुरबार आणि मुंबईचीही जबाबदारी सोपविण्यात आली आहे. त्यामुळे हा अधिकारी आठवड्यातून एकदाच उपलब्ध होत असल्याने आमच्या समस्या सुटणार कशा, असा प्रश्न माजी सैनिकांकडून उपस्थित केला जात आहे. माजी सैनिकांच्या विविध प्रकारच्या समस्या, अडीअडचणी सोडविण्यासाठी जिल्हास्तरावर जिल्हा सैनिक कल्याण कार्यालयाची स्थापना करण्यात आली आहे. या कार्यालयाचे प्रमुखपद असलेल्या जिल्हा सैनिक कल्याण अधिकारी या पदासाठी संरक्षण क्षेत्रातून निवृत्त झालेल्या व्यक्तीचीच निवड केली जाते. मात्र, या पदासाठी व्यक्तीच मिळत नसल्याची किंवा या पदाच्या नियुक्तीबाबत दिरंगाई केली जात असल्याचे दिसून येत आहे. परिणामी, या कार्यालयांचे काम त्यामुळे प्रभावित होत असल्याचे निदर्शनास येत आहे. जिल्हाधिकारी कार्यालयाच्या आवारातच असलेल्या या कार्यालयाकडे सैनिकांच्या विविध अडीअडचणी तसेच समस्या सोडविण्याचा प्रमुख समन्वय आहे. विविध सरकारी विभागांशी संपर्क साधून संबंधित अडचण दूर होणे अपेक्षित असते. मात्र, ते होत नसल्याने जिल्ह्याच्या विविध भागातून येणाऱ्या माजी सैनिकांना, वीरमाता, वीरपत्नी किंवा कुटुंबीयांना अनेक अडचणींना तोंड द्यावे लागत आहे. ... पदाचा भारच भार नाशिक जिल्हा सैनिक कल्याण अधिकारी पदाची धुरा कॅप्टन विद्या रत्नपारखी यांच्याकडे आहे. विशेष म्हणजे त्यांच्याकडेच मुंबई, नंदुरबार आणि धुळे येथील जिल्हा सैनिक कल्याण अधिकारी हा पदभारही आहे. तसेच, नाशिकरोड येथील प्रशिक्षण कार्यालयाची जबाबदारीही आहे. त्यामुळे त्यांना तब्बल पाच कार्यालयांचे कामकाज पहावे लागत आहे. ... सरकारने पूर्णवेळ जिल्हा सैनिक कल्याण अधिकारी देणे आवश्यक आहे. हेच कार्यालय आमच्या समस्या सोडवू शकते. पण, विविध कारणंमुळे प्रभारी पदभारावरच कामकाज सुरू राहते. हे सैनिकांवर अन्याय करणारेच आहे. - फुलचंद पाटील, जिल्हाध्यक्ष, भारतीय माजी सैनिक संघटना, नाशिक ... ग्रामीण भागातून आमचे सैनिक विविध समस्या, अडीअडचणी घेऊन नाशिकला येतात. तेथे अधिकारी भेटत नाहीत. त्यामुळे त्यांना रिकाम्या हाती परतावे लागते. म्हणून जिल्हा सैनिक कल्याण अधिकारी पूर्णवेळ कार्यालयात हवेत. - लोटन शेवाळे, अध्यक्ष, मालेगाव तालुका माजी सैनिक संघ ... माझ्याकडे पाच कार्यालयांची जबाबदारी असली तरी प्रत्येक आठवड्याला मी कार्यालयात येते आणि तक्रारी तसेच फायलींचा निपटारा करते. मी कार्यालयात आहे आणि कुणाला भेटले नाही, असे कधीही घडलेले नाही. मी दर गुरुवारी नाशिक कार्यालयात असते. - कॅप्टन विद्या रत्नपारखी, जिल्हा सैनिक कल्याण अधिकारी
मोबाइल अॅप डाउनलोड करा आणि राहा अपडेट
