म. टा. प्रतिनिधी, नाशिक इपीएफ पेन्शनर धारकांना काशियारी समितीने सुचविल्यानुसार तीन हजार रुपये पेन्शन आणि महागाई भत्ता लागू करू, असे आश्वासन भाजप नेत्यांनी पाळले नाही. त्यामुळे 'नो कोशियारी-नो वोट' असा निर्धार ईपीएफ पेन्शनरधारकांनी सोमवारी केला. इपीएफ ९५ पेन्शनर साखर, वीज, औद्योगिक कामगार, सहकारी बँक, सहकारी संस्था आदी १८६ आस्थापनांमधील कामगारांना किमान एक हजार रुपये पेन्शन मिळते. आमचे सरकार आले तर १०० दिवसांत कोशियारी कमिटीने सुचविल्याप्रमाणे तीन हजार रुपये रुपये पेन्शन, महागाई भत्ता लागू करू, असे आश्वासन गत लोकसभा निवडणुकांच्या प्रचारावेळी २०१४ मध्ये भाजपचे ज्येष्ठ नेते प्रकाश जावडेकर यांनी दिले होते. परंतु, आगामी निवडणुकांची तयारी सुरू झाली असतानाही अद्याप या आश्वासनांची पूर्तता झालेली नाही. त्यामुळे देशातील ५६ लाख पेन्शनर्समध्ये याबाबत नाराजी आहे. सीबीएस येथील आयटक कामगार केंद्रात जिल्हा पेन्शनर फेडरेशनचे संस्थापक अध्यक्ष राजू देसले यांच्या अध्यक्षतेखाली सोमवारी त्यांची बैठक झाली. पेन्शनर्सला फसविणाऱ्या भाजपला लोकसभा निवडणुकीत मतदान न करण्याचा निर्णय यावेळी घेण्यात आला. या बैठकीला जिल्हाध्यक्ष सुधाकर गुजराथी, कार्याध्यक्ष सुभाष काकड, नामदेव बोराडे, प्रकाश नाईक, एम. एन. लासुरकर, शिवाजी शिंदे, नरेंद्र कांबळे, श्रीकांत साळसकर, निवृत्ती शिंदे, विठोबा गुले, वसंत पाटील, रामकृष्ण जगताप, मामु शेख आदींसह पेन्शनर्स मोठ्या संख्येने उपस्थित होते. जिल्हाभरात करणार आंदोलन आगामी अर्थसंकल्पात केंद्र सरकारने त्वरित पेन्शनवाढ व आरोग्यसुविधा पुरविण्याचा निर्णय घ्यावा याकरीता तालुका पातळीवर आंदोलने करण्याचा निर्णय या बैठकीत घेण्यात आला. पेन्शनराना फसविणाऱ्या पक्षांच्या उमेदवारांना मतदान करणार नाही, अशी शपथ पेन्शनर्स घेणार आहेत. तसेच 'आम्ही मत देणार नाही' अशी पाटी घरावर लावण्यात येणार आहे. नाशिक, दिंडोरी, निफाड, सटाणा, मनमाड, सिन्नर येथे आंदोलन करण्याचा निर्णय घेण्यात आल्याची माहिती देसले यांनी दिली.
मोबाइल अॅप डाउनलोड करा आणि राहा अपडेट