म. टा. प्रतिनिधी, नाशिक मकरसंक्रातीच्या खरेदीसाठी सोमवारी बाजारपेठ फुलल्याचे दिसून आले. मुख्य बाजारपेठेसह उपनगरातील दुकानांमध्ये संक्रांतीच्या वस्तू घेण्यासाठी नागरिकांची झुंबड उडाली होती. सुकडी, साखरेचा हलवा, तीळ-गुळाचे लाडू, काळ्या रंगाचे कपडे, वाण देण्यासाठी लागणाऱ्या साहित्यासह पूजेचे साहित्य घेण्यासाठीची लगबग महिलावर्गात दिसून आली. मकर संक्रांतीच्या दिवशी सूर्याचे दक्षिणायन पूर्ण होऊन, सूर्य उत्तरायणात प्रवेश करतो. उत्तरायणात सूर्य असण्याचा काळ हा शुभ काळ मानला जातो. यावेळी सूर्य जेव्हा मकर राशीत प्रवेश करतो, म्हणून या दिवसाला मकरसंक्रांती म्हणतात. या सणाच्यानिमित्ताने एकमेकांना तीळगूळ देत, शुभेच्छा दिल्या जातात. तसेच महिलावर्ग हळदी कुंकवाचा कार्यक्रम घेत, सौभाग्याचे वाण एकमेकींना देत असतात. त्यामुळे संक्रांतीच्या पूर्वसंध्येला बाजारपेठेत खरेदीसाठी गर्दी झाली होती. बाजारात उपलब्ध असलेले वैविध्यपूर्ण वाण वाण खरेदीसाठी महिलावर्गाची सकाळपासूनच बाजारात लगबग दिसली. मुख्य बाजारपेठेसह उपनगरांतील दुकानांत गृहोपयोगी वस्तूंसह सौंदर्य प्रसाधने व इतर वस्तूंच्या खरेदीकडे महिलांचा कल होता. तसेच संक्रांत सणाला काळ्या रंगाच्या वस्त्रांचे महत्त्व असल्याने, कपड्यांच्या दुकानांत काळी वस्त्रे खरेदी करण्यासाठी ग्राहकांनी गर्दी केली. काळ्या वस्त्रांवर साजेशी ज्वेलरी खरेदी करण्याकडे महिलावर्गाने पसंती दिली. तीळगूळ, साखर फुटाणे यांच्या खरेदीसाठी ग्राहकांनी रविवार कारंजा, मेनरोड, दहीपूलसह उपनगरांतील दुकांनात गर्दी केली. तसेच विविध आकाराच्या कापडी पतंग खरेदीला यंदा तरुणांनी पसंती दिल्याचे यावेळी दिसून आले. या सर्व खरेदीमुळे बाजारात ग्राहकांची झुंबड उडाल्याचे दिसले. \B संक्रांतीचा शुभ मुहूर्त \Bसंक्रांत सणाचा शुभ मुहूर्त सकाळी ७.१४ ते सायंकाळी ६.१९ पर्यंत असून, संक्रांतीच्या दिवशी नदीपात्रात स्नान करण्यास महत्त्व आहे. संक्रांतीची पूजा करताना सूर्य देवाला नमस्कार करुन, घरात प्रसाद ग्रहण करण्यापूर्वी आगीत थोडासा गूळ आणि तीळ टाकून अग्नीदेवतेलाही नमस्कार करावा. तसेच यावेळी 'सूर्याय नम: आदित्याय नम: सप्तार्चिषे नम:' या मंत्राचे उच्चारण करावे, असे पुरोहितांनी सांगितले आहे.
मोबाइल अॅप डाउनलोड करा आणि राहा अपडेट
