\Bठिकाण : \Bजुने नाशिक\B \B जुने नाशिक परिसरात मोकाट जनावरांमुळे नागरिकांना अनेक समस्यांना तोंड द्यावे लागत आहे. या जनावरांमुळे आरोग्याचा प्रश्नही उभा ठाकला आहे. या मोकाट जनावरांचा बंदोबस्त करण्याकडे महापालिकेने कायम कानाडोळा केला जात असल्याची तक्रार नागरिक करीत आहेत. \Bयेथे असतात गायी\B जुन्या नाशिकमध्ये सारडा सर्कल, जुना वडाळा नाका, खडकाळी, दूधबाजार, गाडगे महाराज चौक, फूलबाजार, भद्रकाली, रविवार कारंजा या भागात मोकाट जनावरांबरोबरच भटक्या कुत्र्यांचाही त्रास आहे. परिसरातील गोठा मालकांची ही जनावरे असून, चरण्यासाठी त्यांना मोकळे सोडले जात असल्याचे नागरिकांचे म्हणणे आहे. \B वाहतुकीचा प्रश्न\B गायी रस्त्याच्या मधोमध रवंथ करत बसलेल्या असतात. त्यामुळे परिसरात वाहतूक कोंडी अनेकदा होत असते. सारडा सर्कल हे त्याचे उत्तम उदाहरण आहे. यामुळे होणारे अपघातही अधिक आहेत. गायींप्रमाणेच जुन्या नाशिकमधील प्रत्येक गल्लीत मोकाट कुत्र्यांचा मुक्त वावर दिसून येतो. ही भटकी कुत्री नागरिकांच्या अंगावर धावून जातात. अनेकदा ही कुत्री शाळकरी मुलांवर धावतात. जुन्या नाशिकमधील मोकाट जनावारांची समस्या कित्येक वर्षांपासून कायम असून, महापालिका प्रशासनाकडून याकडे सातत्याने दुर्लक्ष होत आहे. \Bरात्रीची वेळ घातकच\B नागरिकांच्या अनेक तक्रारींनंतर महापालिकेने जुने नाशिक परिसरातील भटकी कुत्री ताब्यात घेत, निर्बीजीकरण केले. मात्र, त्यानंतर ही कुत्री पुन्हा रस्त्यावर सोडण्यात आली. या कुत्र्यांपाठोपाठ इतरही कुत्री परिसरात येऊ लागली आहेत. गंगाघाट, फूलबाजार, भद्रकाली, मेनरोड, दहीपूल या परिसरात भटक्या कुत्र्यांचा वावर मोठ्या प्रमाणावर आहे. त्यामुळे रात्री व पहाटे या भागातून जाणाऱ्यांना त्रास सहन करावा लागतो. याकडे महापालिकेने लक्ष देत ठोस उपाययोजना करावी, अशी मागणी नागरिक करीत आहेत. \Bघंटागाडी दोन दिवसाआड\B जुने नाशिक भागात घंटागाडी दोन दिवसाआड येते. त्यामुळे परिसरात कचरा मोठ्या प्रमाणावर साचून राहतो. घंटागाडी नियमित येत नसल्याने फूलबाजार, दहीपूल, गंगाघाट, भद्रकाली मार्केट, खडकाळी परिसरात रस्त्याच्या बाजूला कचरा टाकला जातो. हा कचरा खाण्यासाठी गायी आणि कुत्री परिसरात येतात. त्यामुळे परिसरात मोकाट जनावरांचा वावर अधिक असल्याचे दिसते. घंटागाडी नियमित आल्यास, तसेच परिसरात स्वच्छता राहिल्यास ही समस्या कमी होईल, अशी आशा नागरिकांनी व्यक्त केली. फूलबाजार, गंगाघाट व भद्रकाली परिसरात कचऱ्याची समस्या अधिक आहे. या कचऱ्यामुळे गायी व इतर भटकी जनावरे इथे येतात. भटक्या कुत्र्यांमुळे पहाटे किंवा रात्री या परिसरातून चालणेही कठीण होते. गायी रस्त्यातच ठाण मांडून असल्यामुळे वाहने चालवणेही कठीण होते. - आकाश कुंवर, नागरिक परिसरात दोन ते तीन दिवसांतून एकदा घंटागाडी येते. त्यामुळे कचरा परिसरातील रस्त्यावरच टाकला जातो. साचलेल्या कचऱ्याजवळ भटकी कुत्री जमतात. ही कुत्री येणाऱ्या-जाणाऱ्यांवर धावून जातात. या समस्येवर योग्य उपाय होणे आवश्यक आहे. - सचिन देवगिरे, नागरिक मोकाट जनावरांचा योग्य तो बंदोबस्त व्हावा. यासाठी महापालिका अधिकाऱ्यांकडे अनेकदा तक्रारी केल्या आहेत. मात्र, अधिकारी याकडे दुर्लक्ष करतात. लसीकरणानंतर पुन्हा जनावरांना रस्त्यावर सोडून देतात. त्यामुळे ही संख्या वाढते. ताब्यात घेण्यात आलेली जनावरे निर्जन स्थळी सुरक्षित ठेवायला हवी. - गजानन शेलार, नगरसेवक
मोबाइल अॅप डाउनलोड करा आणि राहा अपडेट
