म. टा. वृत्तसेवा, पंचवटी
केंद्र सरकारच्या स्वच्छता सर्वेक्षणाची तयारी महापालिकेने सध्या फारच मनावर घेतलेली दिसते. लोकप्रतिनिधी कधी नव्हे, ते सकाळी कडाक्याच्या थंडीत घराबाहेर पडून स्वच्छता करून घेण्यासाठी अधिकारी व कर्मचाऱ्यांना मार्गदर्शन करीत फिरत असल्याचे चित्र सध्या दिसत आहेत. मात्र, बऱ्याचशा भागात लोकप्रतिनिधी निघून जाताच स्वच्छतेचे काम अर्धवट सोडून दिले जात आहे. त्यामुळे स्वच्छ नाशिक सुंदर नाशिकचे स्वप्न कितपत पूर्ण होईल, याविषयी प्रश्न उपस्थित होत आहे.
केवळ सर्वेक्षणापुरता स्वच्छतेचा बेगडी देखावा करण्यात येऊ नये, असे नागरिक म्हणू लागले आहेत. स्वच्छतेच्या सर्वेक्षणात गतवर्षी नाशिक महापालिका पिछाडीवर पडल्यामुळे यंदा परिस्थिती सुधारून महापालिका स्वच्छतेच्या बाबतील आघाडीवर यावी यासाठी लोकप्रतिनिधींनी पुढाकार कंबर घेतलेला दिसत आहे. नाशिक परिसरात इतकी अस्वच्छता आहे, की ती स्वच्छ करण्यासाठी कर्मचाऱ्यांना कडाक्याच्या थंडीतही घाम फुटू लागला आहे.
रस्तोरस्ती स्वच्छतेवर भर
सर्वेक्षण हे रस्त्यारस्त्यांनी होणार असल्याचे गृहित धरून रस्त्यांच्या स्वच्छतेवर भर दिलेला दिसत आहे. त्यामुळे रस्त्यावरील दुभाजकांच्या जवळ वाढलेले गवत काढणे, दुभाजकाजवळील माती गोळा करून ती भरून नेणे, दुभाजक स्प्रे पंपांच्या साह्याने स्वच्छ धुणे, रस्त्यावरील धूळ झाडून ती गोळा करून वाहनातून वाहून नेणे, दगडगोटे, कचरा गोळा करणे अशी कामे सर्वच विभागांत दिसत आहेत. मात्र, ही कामे करताना कर्मचारी लोकप्रतिनिधींच्या उपस्थितीत जोमाने कामे करताना दिसतात. पण, लोकप्रतिनिधींची पाठ फिरताच हाती घेतलेले काम तसेच टाकून देण्यात येत असल्याचे दिसते.
शेकोट्या पेटल्याचे दृश्य!
प्रभागानुसार एक-एक दिवस स्वच्छतेवर लक्ष ठेवण्याचे काम लोकप्रतिनिधींकडून केले जात आहे. नगरसेवक आपापल्या प्रभागातील स्वच्छतेवर लक्ष देऊ लागेल आहेत. सकाळपासून सुरू होणाऱ्या या मोहिमेची पाहणी करीत कर्मचाऱ्यांना सूचना देण्याचे आणि त्यांच्या कामाचा दर्जा सुधारण्याचा प्रयत्न करीत आहेत. सकाळ-दुपार-सायंकाळ याच मोहिमेचा धडाका लागलेला आहे. नियमित स्वच्छतेकडे केलेले दुर्लक्षामुळे शहरात अस्वच्छता असल्यामुळे ती साफ करण्यात कर्मचाऱ्यांचे चांगले हाल होत आहेत. रस्त्याच्या कडेला पडणारा कचरा ही या स्वच्छता मोहिमेतील सर्वांत मोठी समस्या दिसत आहे. रस्त्याच्या कडेला पडलेला कचरा उचलण्यात येतो ना येतो तोच पुन्हा कचरा टाकला जात आहे. हा कचरा उचलण्याऐवजी तेथेच पेटवून देण्याचा पराक्रमही काही कर्मचारी करीत आहेत. त्यामुळे रस्त्याच्या कडेला बऱ्याच ठिकाणी शेकोट्या पेटल्याचे दृश्य दिसते.
हागणदारीचे वास्तव उघड
सिन्नर फाटा ः हागणदारीमुक्त शहर म्हणून नाशिक घोषित झालेले असले, तरी प्रभाग १९ मध्ये प्रभाग समिती सभापतींच्या पाहणी दौऱ्यात सिन्नर फाटा परिसरात मुक्त हागणदारीच्या वास्तवाचे दस्तुरखुद्द महापालिका पदाधिकाऱ्यांनाच दर्शन होण्याची नामुष्की ओढावल्याचा प्रकार मंगळवारी सकाळी घडला. मंगळवारी सकाळी नाशिकरोड प्रभाग समिती सभापती सुमन सातभाई यांनी प्रभाग १९ मध्ये पाहणी केली. या दौऱ्याप्रसंगी प्रभाग १९ चे नगरसेवक पंडित आवारे, जयश्री खर्जुल यांच्यासह विभागीय अधिकारी सोमनाथ वाडेकर, कार्यकारी अभियंता सतीश हिरे, उपअभियंता राजेश पालवे, स्वच्छता निरीक्षक संजय दराडे, विद्युत विभागाचे विजय गायकवाड आदींसह पाणी, उद्यान, ड्रेनेज विभागांचे अधिकारी व कर्मचारी उपस्थित होते. सिन्नर फाटा परिसरातील केळकरवाडी, गोदरेजवाडी, स्टेशनवाडी, चेहेडी या भागातील बहुतांश कुटुंबांकडे वैयक्तिक शौचालयांची सुविधा उपलब्ध नाही. त्यामुळे ते सार्वजनिक शौचालयांचा वापर करतात. मात्र, लोकसंख्येच्या प्रमाणात या सार्वजनिक शौचालयांची संख्या अगदीच नगण्य असल्याने या भागात उघड्यावर शौचविधीचे प्रमाण मोठे असल्याचे यावेळी आढळून आले. या दौऱ्याप्रसंगी नागरिकांनी सुचविलेली स्वच्छता, विद्युतविषयक कामे तात्काळ करण्याचे आदेश प्रभाग समिती सभापतींनी संबंधित अधिकाऱ्यांना दिले. प्रभाग स्वच्छ राखण्यासाठी नागरिकांनी महापालिकेच्या स्वच्छता विभागाला सहकार्य करण्याचे आवाहनही त्यांनी केले.
----
भूखंडांची सफाई कशी?
सातपूर ः सातपूर भागात ४ जानेवारीपासून केंद्र शासनाच्या स्वच्छ सर्वेक्षणाची पाहणी करण्यासाठी केंद्राची टीम येणार आहे. त्यासाठी सातपूर विभागात जोमाने स्वच्छता मोहीम सुरू करण्यात आली आहे. मात्र, या मोहिमेत महापालिकेच्या आरोग्य विभागाकडून मोकळ्या भूखंडांचीदेखील सफाई केली जात आहे. वास्तविक मोकळ्या भूखंडांवर पडलेला कचरा उचलण्याची जबाबदारी संबंधित जागामालकाची असते. मालकाने घाण, कचरा उचलला नाही, तर त्यावर आरोग्य विभागाकडून दंडात्मक कारवाईदेखील केली जाते. परंतु, स्वच्छ सर्वेक्षणात आरोग्य कर्मचाऱ्यांकरवीच खासगी मोकळ्या भूखंडांवरील घाण, कचरा उचलला जात असल्याचे दिसून येत आहे. याप्रश्नी महापालिका आयुक्तांनीच लक्ष घालावे, अशी मागणी परिसरातून होत आहे. रोजच विविध भागात होणाऱ्या या मोहिमेमुळे आरोग्य कर्मचाऱ्यांची दमछाक होत आहे. पहाटे सहा वाजेपासून दुपारी १ वाजेपर्यंत स्वच्छतेचे काम केले जात असल्याने कर्मचाऱ्यांनी नाराजी व्यक्त केली आहे. त्यातच वाढलेल्या भागात अतिरिक्त कर्मचारी नसल्याने एकाच कर्मचाऱ्याकडून स्वच्छता करण्याची वेळ येत असल्याने वाढीव आरोग्य कर्मचारी देण्यात यावेत, अशी मागणीही करण्यात येत आहे.
मोबाइल अॅप डाउनलोड करा आणि राहा अपडेट
