आधारकार्ड नोंदणी आणि दुरुस्तीसाठी नागरिकांना अनंत अडचणींना तोंड द्यावे लागत आहे. नागरिकांना त्यांच्या समस्या खुलेआम मांडता याव्यात, यासाठी महाराष्ट्र टाइम्सने ‘मटा संवाद’ हे व्यासपीठ उपलब्ध करून दिले. नागरिकांनी त्यांना येणाऱ्या अडचणी भरभरून मांडल्या. त्या कशा प्रकारे सोडविता येतील, सोडविताना प्रशासनाला काय अडचणी येतात, त्यावर काय उपाययोजना करण्यात येत आहेत, याविषयी उपजिल्हाधिकारी डॉ. शशिकांत मंगरुळे यांनी नागरिकांच्या अडचणी ऐकून घेऊन त्यांच्या शंकांचे समाधान केले. गंगापूर रोड येथील मविप‍्रच्या केबीटी इंजिनियरींग कॉलेजमध्ये ‘आधार हवाय’ या विषयावर ‘म. टा संवाद’ कार्यक्रमाचे आयोजन करण्यात आले होते. यावेळी उपजिल्हाधिकारी डॉ. शशिकांत मंगरूळे, महापालिकेचे सहायक आयुक्त संतोष ठाकरे, महाविद्यालयाचे प्राचार्य डॉ. कैलास होळकर, जिल्हाधिकारी कार्यालयातील डिस्ट्र‌िक्ट प्रोजेक्ट मॅनेजर चेतन सोनजे आदी उपस्थित होते. आधार बाबतच्या समस्या मांडण्यासाठी नागरिकांनी मोठ्या संख्येने गर्दी केली होती.
नागरिकांच्या प्रश्नांना उपजिल्हाधिकारी डॉ. शशिकांत मंगरूळे यांनी उत्तरे दिली..
एका अशिक्षित विधवा महिलेकडे मतदान कार्ड, रहिवाशी दाखला आहे. मात्र, जन्मदाखला नाही. यामुळे आधारकार्ड मिळत नाही. यावेळी तिने काय करावे? - शहाणे, नागरिक
- मतदान कार्ड व आमदार किंवा खासदारांनी दिलेला रहिवाशी दाखला आधार कार्डसाठी ग्राह्य कागदपत्रे आहेत. यामुळे आधार कार्ड मिळणे शक्य आहे. मात्र, तरीही आधार कार्ड काढून देण्यास नकार मिळत असेल तर संबंधित केद्रांची माहिती जिल्हाधिकारी कार्यालयाकडे द्या. पुढील कार्यवाही करण्यात येईल.
सात वेळा आधार कार्डासाठी नोंदणी केली आहे. मात्र, अद्याप आधार कार्ड मिळाले नाही. यावर उपाय काय? – संतोष गवांदे, प्रकाश जाधव, नागरिक
- एकदा आधार कार्ड नोंदणी केल्यास तुमचा आधार कार्ड क्रमांक तयार होतो. काही तांत्रिक कारणास्तव आधार कार्ड तुमच्यापर्यंत पोहोचत नाही. एकदा नोंदणी केल्यावर पुन्हा-पुन्हा नोंदणी करणे टाळावे. असे केल्यास तुमचे आधार कार्ड कायमचे ब्लॉक होऊ शकते. नोंदणी करुनही आधार कार्ड मिळाले नाही, तर त्याची रीस‌िट घेऊन जिल्हाधिकारी कार्यालयात यावे. आताचे स्टेटस तपासून कार्यवाही करता येते.
आधारकार्डच्या अपडेटचे काम ६० ते ७० टक्के बाकी आहे. ज्येष्ठ नागरिकांची फिंगर प्रिंट येत नाही. त्यासाठी काय करावे?.......दीपाली कुलकर्णी (नगरसेविका)
- खासगी आधार सेंटर्स बंद करण्यात आली आहेत. अधिकृत ६० केंद्र सुरू करण्यात येणार आहेत. फिंगर प्रिंटच्या संदर्भातील तक्रारी खूप आहेत. त्यावर केंद्र पातळीवर काम सुरू असून लवकरच उपाययोजना केल्या जातील. सुप्रीम कोर्ट आणि यूडीएआय यांच्याकडे आधार केंद्रांची अनुमती देण्याचे अधिकार आहेत. त्यांनी सर्वत्र खासगी आधार केंद्रांची सुविधा बंद केली आहे. यामुळे व्यक्तिगतरित्या आधार केंद्र सुरू करता येणार नाही. पण लवकरच प्रत्येक प्रभागात एक दिवस अशी आधार केंद्रांची सुविधा देऊ.
आधार कार्डांवरील फोटो अतिशय अस्पष्ट आहेत. यामुळे अनेकदा त्याची झेरॉक्स काढल्यास ती प्रत बँक किंवा इतर कार्यालये ग्राह्य धरत नाहीत. यामुळे फोटो अपडेटेशन करण्याची सुविधा सुरू करता येईल का? - अॅड. चिन्मय गाढे
- आधार कार्ड क्रमांक आणि तुमचे नाव ही मुख्य माहिती आहे. आधार कार्डावरील फोटो अस्पष्ट असल्यामुळे ते ग्राह्य न धरणे गैर आहे. कारण, आधारमध्ये फोटो बदलण्याची सुविधा नाही. ज्या ठिकाणी फोटो अस्पष्टचे कारण देत आधार नाकारले जाईल, त्या कार्यालयाची माहिती जिल्हाधिकारी कार्यालयाकडे द्या. गरज भासल्यास तेथील वेब कॅमेरेही बदलण्यात येतील.
शहरात आधार केंद्र कमी आहेत. वृद्धांना तेथे जाणे शक्य होत नाही. अशा नागरिकांसाठी मूव्हिंग आधार मशिन्स केव्हा सुरू होतील? - स्वाती भामरे, नगरसेविका
- मूव्हिंग आधार मशिन्स सुरू आहेत. एका दिवसात फारतर चार-पाच नागरिकांचे आधार कार्ड त्यांच्या घरी जाऊन काढण्याची सुविधा त्याद्वारे उपलब्ध होते. आमच्याशी जिल्हाधिकारी कार्यालयात संपर्क साधल्यास दखल घेतली जाईल. परंतु, जे लोक वृद्धापकाळ किंवा तत्सम कारणामुळे सेंटरपर्यंत येऊच शकत नाहीत त्यांच्यासाठी ही सुविधा आहे.
नीट, जेईई तसेच बोर्डाच्या परिक्षा अर्जात आधार कार्ड जोडणे अनिवार्य केले आहे. मात्र, आधार कार्डावरील नाव हे संबंधित परीक्षेच्या फॉरमॅटमध्ये नाही. यामुळे विद्यार्थ्यांना अडचणी येणार नाहीत ना? – टी. पी. देवी, नागरिक
- परीक्षा अर्जासोबत आधार कार्ड हे ओळखपत्र म्हणून जोडणे अनिवार्य आहे. जर आधार कार्डावरील नाव चुकीचे असेल, तर ते अपडेट करून घ्या. प्रथम नाव, वडिलांचे नाव व आडनाव हा आधार कार्डाचा फॉरमॅट आहे. यामुळे योग्य नाव असल्यास परीक्षा अर्ज भरताना विद्यार्थ्यांना कोणतीही अडचण येणार नाही.
माझा मुलगा विदेशात आहे. त्याच्याकडे आधार कार्ड नाही. माझे आणि मुलाचे जॉइंट बँक अकाउंट आहे. माझे आधार बँकेत दिले आहे. पण मुलाचे आधार नसल्याने माझे बँकेतील व्यवहार होत नाहीत. काय करावे? – सुनील चाटी, नागरिक
- तुमच्या मुलाचे आधार कार्ड बँकेत लिंक करावेच लागेल. मुलाचे आधार काढण्यासाठी त्यांना भारतात बोलावून सदरची प्रक्रिया पूर्ण करवून घ्या. मुलाचे आधार लिंक न केल्यास बँकेचे व्यवहार नंतर ठप्प होऊ शकतात.
ज्येष्ठ नागरिकांच्या आधार कार्डवर जन्मतारीख नाही, ती कशी टाकता येईल? - शहाणे.
- ज्येष्ठ नागरिक आधार केंद्रावर येऊ शकत असतील तर त्यांना त्यांच्या जन्म तारखेची नोंद करून घेता येऊ शकेल. त्यासाठी जन्मतारखेचा पुरावा सोबत ठेवावा. ज्यांना शक्य नाही त्यांच्यासाठी मूव्हेबल नोंदणीची व्यवस्था आहे.
आधार कार्डवरील पत्ता बदलायचा असेल तर बँकेत अपडेट करून मिळतो का? - प्रा. टी. बी. सांळुके
- काही बँका आणि पोस्ट ऑफिसमध्ये अशी व्यवस्था करण्यात आली आहे. त्यात येस बँक, कोटक महिंद्रा, डीसीपी बँक, अॅक्सिस बँक आदी ठिकाणी अपडेट करताना बँकेजवळचे आधार केंद्र लोकेट होते.
बँकांच्या कामकाजासाठी ज्या विवाहीत महिलांचे आधार कार्डवर माहेरचे नाव लागले आहे, त्यांना अडचणी येतात, त्यांनी काय करावे?- रमेश कडलग
- विवाहीत महिलांचे आधार कार्ड माहेरच्या नावाने असण्याची शक्यता असते. त्यांना बँकांच्या व्यवहारासाठी नाव बदलण्याचा साध्या कागदावर अर्ज करता येतो.
दहावीच्या गुणपत्रिका आणि आधारकार्ड यांच्या नावाच्या सिक्वेन्समध्ये बदल असल्याने जेईई, नीट यांसारख्या परीक्षांचे फॉर्म भरताना अडचणी येत असल्यास काय करावे?
- या बाबी आज कंपल्सरी नाहीत. विद्यार्थ्यांना परीक्षेला काही अडचणी येणार नाहीत. या परीक्षेसाठी अर्ज भरता येतो.
लहानपणी आधारकार्ड काढले असेल, तर ते १८ वर्षांनंतर अपडेट करण्याची गरज आहे का?
- १८ वर्षांनंतर आधार कार्ड अपडेट करता येऊ शकते. करायलाच हवे, अशी तूर्तास सक्ती नाही.
आधार कार्डला मोबाइल नंबर लिंक कसा करायचा?- प्रदीप पाटणकर
- घरबसल्या मोबाइल आधारला लिंक करता येईल. त्यासाठी तीन वेगवेगळ्या पद्धती आहेत.
आधार कार्ड काढताना दिलेला मोबाइल नंबरच आधारशी लिंक होतो का?- वृषाली मते
- आधार कार्ड काढताना दिलेल्या मोबाइल नंबर व्यतिरिक्त दुसरा नंबर लिंक करता येतो. सध्या एकापेक्षा जास्त आधारला एकच मोबाइल नंबर लिंक होत असला तरी भविष्यात अडचणी येऊ शकतात. त्यामुळे शक्यतो आधारला स्वतःच्या नावेच स‌िम असलेला मोबाइल नंबरच लिंक करावा. सीमकार्ड स्वतःच्या नावावर सहज करून घेता येऊ शकते. त्यासाठी आधारची सक्ती नाही.
रविवारी सुटीच्या दिवशी आधार केंद्र सुरू राहील का?- जयश्री कुलकर्णी
- रविवारी सुटीच्या दिवशीही आधारकेंद्र सुरू ठेऊ. तसेच ज्यांना आधार केंद्रावर जाणे शक्य नाही, अशा ज्येष्ठ नागरिकांसाठी मूव्हेबल क‌िटद्वारे आधार कार्ड काढून देण्याची व्यवस्था करण्यात आली आहे.
मटाच्या या उपक्रमामुळे आमच्या आधार कार्डविषयीच्या समस्यांवर तोडगा मिळाला. त्यामुळे मटाचे आभार. आधार कार्ड अपडेशनअभावी अनेकांची पेन्शन अडकून पडली आहे. त्रस्त नागरिकांचा सरकारने विचार करावा.
- समाधान पाटील
माझा मुलगा विदेशात राहातो. त्याचे आधार कार्ड नसल्याने बँकेत व्यवहार करताना अडचणी येत आहेत. उपजिल्हाधिकारी मंगरुळे यांनी मला त्यावर पर्याय काढून दिला. त्यामुळे माझी समस्या सुटेल असा विश्वास वाटतो.
- सुनील चाटी
या उपक्रमामुळे प्रत्येकाकाला आधारबाबतच्या समस्या सर्वांसमोर मांडता आल्या. त्या समस्यांवर अधिकाऱ्यांकडून अचूक मार्गदर्शनही मिळाले. धन्यवाद.
- रामचंद्र निजामपूरकर
‘मटा संवाद’ सारख्या उपक्रमामुळे नागरिकांच्या आधार कार्ड विषयक समस्या दूर होत आहेत. लोकांच्या मनात आधारबाबत अनेक प्रश्न असून आधारसक्तीबद्दल भीतीही आहे. या उपक्रमामुळे शंकांचे समाधानकारक निरसन होण्यास मदत होईल. नगरसेवकांची मदत घेऊन आणखी काही सेंटर्स सुरू करायला हवीत, अशी अपेक्षा आहे.
- दीपाली कुलकर्णी, नगरसेविका
पाल्यांच्या आधारकार्डबद्दल आम्हाला मोठे टेन्शन होते. याचे पूर्णपणे समाधान ‘मटा संवाद’मध्ये झाले. आधारविषयक जनजागृतीची गरज असून, असे उपक्रम राबवायला हवेत.
- डॉ. सुनीता संकलेचा
हा उपक्रम अत्यंत चांगला आहे. आधार नागरिकांच्या जिव्हाळ्याचा विषय बनला आहे. याबाबत अधिक माहिती मिळणे महत्त्वाचे होते, जे ‘मटा संवाद’सारख्या उपक्रमातून साध्य झाले. नागरिकांच्या समस्यांचे निरसन होण्यासाठी असे उपक्रम व्हायला हवेत.
- स्वाती भामरे, नगरसेविका
मला हा उपक्रम खूप छान वाटला. शंकांचे समाधान थेट अधिकाऱ्यांनी केले. ज्येष्ठ नागरिकांना योग्य मार्गदर्शन मिळाले.
- निवृत्ती जाधव
कार्यक्रम खरंच चांगला आणि आवश्यक होता. आधारविषयक समस्यांचे निरसन झाले. विशेषतः सीनियर स‌िट‌िझनला योग्य सल्ला मिळाला.
- रमेश चव्हाण
बँक खाते आणि आधार कार्डविषयक समस्या होती, ज्याचे समाधान झाले. उपक्रम अतिशय उपयुक्त आहे आणि यासाठी ‘मटा’चे विशेष आभार. आम्हाला मिळालेली माहिती इतरांपर्यंत पोहचवू.
- काशिनाथ पवार
शहरात २१ सेंटर्स सुरू
शहरात ६० सेंटर्सची मागणी केली आहे. त्यापैकी २१ सेंटर्स सुरू आहेत. लवकरच येस बँकेच्या माध्यमातून १० सेंटर्स सुरू होतील. उर्वरित सेंटर्ससाठी आम्ही परवानगीची वाट पाहात आहोत. बहुतांश तक्रारी आधार अपडेशनबाबतच्या असल्यामुळे केवळ याच कामासाठी आम्ही स्वतंत्र सेंटर्स सुरू करू. तेथे नवीन एनरोलमेंट होणार नाही. नागरिकांच्या मागणीनुसार रविवारीदेखील सकाळी १० ते सायंकाळी सहा यावेळेत आधार सेंटर्स सुरू ठेवण्यात येतील. ज्या ज्येष्ठ नागरिकांना आधार सेंटर्सपर्यंत येणेच शक्य नाही अशा नागरिकांच्या घरी किट पाठवून अपडेशन करून देण्यात येईल. अनेकदा आधार कार्ड काढूनही ते रिजेक्ट होत असेल, तर अशा नागरिकांच्या आधार कार्डचे स्टेटस तपासून डेटा रिट्राइव्ह करून द्यावा लागणार आहे. त्यासाठी तक्रारदारांनी गुरुवार, २८ डिसेंबर रोजी सकाळी १० ते सायंकाळी सहा या वेळेत जिल्हाधिकारी कार्यालयात यावे. जिल्हाधिकारी कार्यालयातील चारपैकी एक कीट फक्त ज्येष्ठांसाठी राखीव ठेवण्यात आले आहे.
- डॉ. शशिकांत मंगरूळे, उपजिल्हाधिकारी
आधार सेंटर - मोबाइल नंबर- पत्ता
रवींद्र खैरे- ९९२२४४०१९९-जिल्हाधिकारी कार्यालय
रवींद्र गायकवाड- ८२३७७८८००२- जिल्हाधिकारी कार्यालय
रवींद्र विशे - ९५०३५६६०१४- जिल्हाधिकारी कार्यालय
योग‌िता वाघचौरे - ८४४६०२७८०६- मनपा शाळा क्र. ९९, शिवाजीनगर, सातपूर
महेश जगताप - ७७९८६३०४८२ - सेतू कार्यालय, विभागीय आयुक्त, नाशिकरोड
जीवन बर्वे- ९९२२४६८१६४- मखमलाबाद सर्कल कार्यालय
जीवन बर्वे - ९९२२४६८१६४- मनपा शाळा शॉपिंग सेंटर, आनंदवली
कमलेश सोनवणे - ८९८३०९९९०८- मनपा शाळा क्र. २२, विश्वासनगर, सातपूर
अशोक माळी- ७०२०५२७८३६- मनपा शाळा १५७९, चेहेडी
वैभव सूर्यवंशी - ७५८८५५८६६९- मनपा शाळा क्र. ३४, नांदूर, पंचवटी
अनिल आठवले - ७७९८५८९६८०- मनपा शाळा क्र. १०७, तोरणानगर, सिडको
राधाकिसन शिंदे - ९८२३९५८६७४- माडसांगवी सर्कल, ऑफिस
मीनाक्षी जोर्वेकर - ९३७३३५९८८८- मनपा शाळा क्र. २२, विश्वासनगर, सातपूर
रवी जाधव - ८००७८५३०५४- मनपा कार्यालय, राजीव गांधी भवन
सागर बेदरकर- ९५०३६५००७२- फिरते किट, (वृद्ध व विशेष मुलांसाठी)
माधुरी जाचक - ९७६५५०१३११- अजय मित्र मंडळ हॉल, रथचक्र चौक, इंदिरानगर
नारायण जाचक- ८७९६११८०२३- गीतांजली हॉल, गंगापूर रोड
अशी करा घरबसल्या दुरुस्ती..
आधार कार्डमध्ये नाव, पत्ता, जन्मतारीख, मोबाइल क्रमांक यांसारख्या दुरुस्त्या करायच्या असतील, तर त्या घरबसल्यादेखील करता येऊ शकतात. त्यासाठी युन‌िक आयडेंट‌िफिकेशन अॅथोरिटी ऑफ इंडियाच्या uidai.gov.in या वेबसाइटवर जाऊन आपला आधार क्रमांक टाकावा. तेथे अनेक पर्याय दिसतात. त्यापैकी हव्या त्या पर्यायावर जाऊन दुरुस्ती करवून घेता येते. या वेबसाइटवर रिक्वेस्ट टाकल्यानंतर रजिस्टर्ड मोबाइलवर वन टाइम पासवर्ड पाठविला जातो. तो वापरून दुरुस्त्या करता येतात. या वेबसाइटवरून आधारचे स्टेटस तपासता येते. तसेच डिजिटल फॉरमॅटमध्ये आधार कार्ड डाऊनलोड करता येते. याच वेबसाइटवर रिक्वेस्ट टाकून पत्ताही बदलता येतो. असे बदल करण्यासाठी आवश्यक कागदपत्रांची यादी या वेबसाइटवर दिली आहे. ही ओरिज‌िनल डॉक्युमेंटस स्कॅन करून ते अपलोड करता येतात.
- चेतन सोनजे, डिस्ट्र‌िक्ट प्रोजेक्ट मॅनेजर
दुरुस्तीसाठी कागदपत्रे (यापैकी आवश्यक ती अपलोड करावीत)
- सरकारी फोटो ओळखपत्र
- सर्व्ह‌िस फोटो ओळखपत्र
- इलेक्ट्र‌िसिटी ब‌िल
- टेलिफोन लँडलाइन ब‌िल
- प्रॉपर्टी टॅक्स रिसिट
- क्रेडिट कार्ड स्टेटमेंट
- इन्शुरन्स पॉलिसी
- नरेगा जॉब कार्ड
- एआरएमएस परवाना
- पेन्शनर कार्ड
- स्वातंत्र्य सैनिक कार्ड
- किसान पासबुक
- सीजीएचएस / इसीएचएस कार्ड
- इन्कम टॅक्स अॅसेसमेंट ऑर्डर
- व्हेईकल रजिस्ट्रेशन सर्ट‌िफिकेट
- पासपोर्ट
(संकलन : रामनाथ माळोदे, सौरभ बेंडाळे, अक्षय शिनकर, योगेंद्र देवरे)
मोबाइल अॅप डाउनलोड करा आणि राहा अपडेट
