मटा फोकस
--
संकलन ः अश्विनी कावळे
--------------
ग्लॅमरस सनई-चौघडे
----
सध्या लग्नाचा धूमधडाका सुरू असून, यंदा मुहूर्त कमी असल्याने एकाच दिवशी अनेक ठिकाणी विवाहांचा बार उडत असल्याचे चित्र आहे. विवाह सोहळा हा प्रत्येकाच्या आयुष्यातील अविस्मरणीय क्षणांपैकी एक मानला जातो. हा सोहळा आता केवळ विधींपुरताच मर्यादित राहिला नसून, लग्नाकडे ग्लॅमरस इव्हेंट म्हणून पाहिले जात आहे. हा इव्हेंट खास व्हावा यासाठी वर, वधूबरोबर त्यांचे कुटुंबीयदेखील प्रयत्नशील असतात. लग्नमंडपाच्या सजावटीपासून फोटोशूट, लग्नात खमंग पदार्थ वऱ्हाडींच्या दिमतीला ठेवण्यापर्यंत सर्व व्यवस्था अगदी चोख करण्याकडे लक्ष केंद्रित केले जाते. लग्नाची शॉपिंग, मेंदी, हळद, सीमंती पूजन यानुसार कपड्यांची थीम, त्याचबरोबर लग्नस्थळी रोषणाई, फुलांच्या पाकळ्यांनी स्वागत आदींद्वारे हा सोहळा दिमाखदार बनविण्याकडे कल वाढल्याचे दिसून येत आहे.
----
लॉन्सकडे वाढता कल
हल्ली थीम वेडिंग हा प्रकार प्रत्येकालाच हवाहवासा वाटत आहे. थीमनुसार डेकोरेशन, तसे कपडे, दागिने घालण्याला पसंती दिली जाते. लॉन्सवर थीम वेडिंग करण्यास ऐसपैस जागा गरजेची असते. हवे तसे डेकोरेशन करता येत असल्याने कार्यालयांपेक्षा लॉन्सवर लग्न करण्याचा हा ट्रेंड हल्ली मोठ्या प्रमाणात दिसून येत आहे. थीम्सवर आधारित आकर्षक देखावे, रंगीत कारंजे, फुलांच्या माळा, विविध प्रकारच्या साहित्याची सजावट करून लग्नमंडप सजविण्यात येतात. बहुतांश कार्यालयांमध्ये त्यांचा ठरवलेलाच सेट घ्यावा लागत असल्याने लॉन्सला पसंती मिळत असल्याचे लॉन्सचालक सांगतात. यामुळे इव्हेंट मॅनेजमेंट कंपन्यांनाही चांगले दिवस आले आहेत. आपल्या बजेटनुसार या कंपन्या थीम्स, डेकोरेशनविषयी कल्पना सुचवतात.
--
लॉन्स, कार्यालयातच पॅकेजेस
लग्नाचा हॉल, होमकुंड, सुपाऱ्या, भटजी, पाट, चौरंग, अगदी समईच्या वाती, आतषबाजीसाठीचे फॅन्सीफटाके या व अशा अनेक वस्तूंसाठी ऐन लग्नाच्या गडबडीत मोठी पळापळ होते. लग्नाच्या आनंदावरही त्यामुळे विरजण पडू शकते. हे टाळण्यासाठी आता लॉन्स, कार्यालयांनीच पुढाकार घेतला आहे. हॉलबरोबरच या सर्व वस्तू त्यांच्याकडून पॅकेजनुसार पुरविल्या जात आहेत. शहरातील अनेक कार्यालये, लॉन्सचालकांनी दोन लाखांपासून पुढे असे पॅकेजेस उपलब्ध करून दिले आहेत. इतकेच नव्हे, तर नवरीसाठी डोली, नवरदेवासाठी घोडी, बँड, बग्गी यांचीही मागणी केली, तरी काही वेळात तेही उपलब्ध करून दिल्याची उदाहरणे असल्याचे त्यांच्याकडून सांगण्यात येते.
---
ड्रेस, ज्वेलरी कन्सल्टंट
लग्नाच्या महत्त्वाच्या दिवशी आपला लूक फसू नये म्हणून वर-वधू यांच्याकडून पूर्वतयारी करण्यास मोठे महत्त्व दिले जाते. त्यासाठी खास वेडिंग ड्रेस कन्सल्टंटची मदत घेतली जात आहे. वधू आणि वराची शारीरिक बांधणी, रंग, लग्नाचे ठिकाण यावरून ड्रेसची निवड केली जाते. सध्या कोणती फॅशन सुरू आहे, कोणत्या फॅशनचे कपडे चांगले दिसतील, कोणत्या रंगाची सध्या चलती आहे, निवडलेल्या ड्रेसवर कोणत्या प्रकारची ज्वेलरी चांगली दिसेल, अशी माहिती यांच्याकडून मिळते. शिवाय अनेक कन्सल्टंट फॅशनल डिझायनर, बुटिक यांच्याशी संलग्न असल्याने हवे तसे ड्रेस डिझाइन करून घेण्याविषयीही त्यांच्याकडून सुचविले जाते. याशिवाय मोठमोठ्या ज्वेलर्स, शोरुम्स, मॉल्समध्येही ही सुविधा पुरविली जाते. नाशिकमध्ये अद्याप हा ट्रेंड तितका रुजला नसला, तरी मोठ्या शहरांमध्ये अशा कन्सल्टंट्सला चांगली मागणी आहे.
--
वेडिंग प्लॅनरलाही पसंती
लग्न थाटामाटात करण्याची इच्छा अनेकांना असते. परंतु, आजच्या धावपळीच्या जीवनशैलीत स्वतःच्या लग्नाच्या तयारीसाठी तितका वेळ काढणेही अनेकांना शक्य नसते. काही वर्षांपूर्वी ‘बँड बाजा बारात’ हा चित्रपट प्रदर्शित झाला होता. वेडिंग प्लॅनर ही थीम यातून सर्वसामान्यांना स्पष्ट झाली होती. अशा वेडिंग प्लॅनरची आजच्या धावपळीत चांगली मदत होत आहे. त्यामुळेच त्यांची मागणीदेखील वाढली आहे. मध्यमवर्गीय माणसांच्या मनात अद्याप वेडिंग प्लॅनरची मदत घ्यावी की नाही, याबाबत संभ्रम दिसून येतो. परंतु, लग्न कोणत्याही चिंतेविना योग्य रीतीने व्हावे यादृष्टीने त्यांच्याकडूनही वेडिंग प्लॅनरचा पर्याय निवडला जात आहे. लग्न नेमकं कसं असावं, किती लोकं लग्नाला बोलवायचे आहेत, लग्नात कोणकोणते कार्यक्रम असावेत, परफॉर्मन्सेस, वर-वधू यांची मंडपात एन्ट्री कशा पद्धतीने होणार आहे, लग्नात मेन्यू काय असावा, डेकोरेशन कसे असावे, डेकोरेशनला साजेसे कपडे, पारंपरिक विधी, खर्चाची आखणी कुठे व कशी करावी, या सर्वांची जबाबदारी वर-वधूच्या कुटुंबीयांशी चर्चा करून वेडिंग प्लॅनर पार पाडतो. आपल्या बजेटमध्ये लग्न व्हावे, यासाठी वेडिंग प्लॅनरची मदत घेण्यात मध्यमवर्गीय कुटुंबीयदेखील सरसावले आहेत.
--
स्टार्टर्सपासून डेझर्टपर्यंत...
लग्न चांगले झाले, ही प्रतिक्रिया लग्नातील मंडळी देतात ते तेथील नियोजनामुळे आणि स्वादिष्ट जेवणामुळेच. लग्नातील जेवण चांगले, तर ही मंडळी खूश असे चित्र लग्नांमध्ये हमखास दिसते. जेवण बेचव असेल, तर लग्नातही मजा नाही, अशी समीकरणं करणारी मंडळीही असतात. त्यामुळे लग्नातील सजावटीबरोबर मुख्य काळजी घेतली जाते ती जेवणाची. स्टार्टर्सपासून डेझर्टपर्यंतचे पॅकेजेस केटरर्सकडून देण्यात येतात. महाराष्ट्रीयन पंचपक्वाने, वेलकम ड्रिंक्स, रंगीबेरंगी मॉकटेल्स, पंजाबी, राजस्थानी, चायनीज, इटालियन, चाट, केळीच्या पानाच्या पंगतीपासून, बुफेपर्यंत आणि त्यानंतर रुचकर पानापर्यंत असे सर्व काही केटरर्सकडून पुरविले जातात. किमान पावणेदोनशे रुपये थाळीपासून पुढे जितक्या पदार्थांचा समावेश होईल, त्यानुसार केटरिंगचे पॅकेज ठरत असते.
--
सर्वसमावेशक फोटोग्राफीचा ट्रेंड
पूर्वी केवळ लग्न आणि त्यापूर्वीच्या हळद, सीमंती अशा विधींपासून ते पाठवणीपर्यंत व्हिडीओ शूटिंग, फोटोग्राफीचे पॅकेज असायचे. यामध्ये एक मुख्य फोटोग्राफर व त्याच्या सहाय्यासाठी एक-दोन जण इतकाच त्यांचा ग्रुप असायचा. गेल्या तीन-चार वर्षांमध्ये ही पद्धत मात्र कालबाह्य ठरली आहे. केवळ लग्नापुरताच फोटोग्राफर आता राहिला नसून, लग्नाच्या इव्हेंटमधला तो एक महत्त्वपूर्ण घटक बनला आहे. फोटोग्राफर्सची आठ-दहा लोकांची टीम लग्नासाठी कार्यरत असते. लग्नाचे विधी, पाहुणे मंडळींचे स्वागत, वर-वधूंच्या विधींचे फोटो, मेंदी, संगीत व इतर काही पारंपरिक विधी, त्यांचे ‘कॅन्डीड’ क्षण, व्हिडीओ शूटिंग असे सर्व फोटोज व्यवस्थित मिळावेत यासाठी ही टीम केवळ लग्नाच्या दिवशीच नव्हे, तर त्यापूर्वीच्या प्रत्येक इव्हेंटला वर-वधूसोबत असते. हे तर झाले लग्नाचे. परंतु, लग्न ठरल्यानंतर आता कपल्सची पहिली पसंती असते ती प्री-वेडिंग फोटोशूटला. ड्रोनसारख्या विविध आधुनिक तंत्रज्ञानाच्या साहाय्याने फोटोशूट करीत अनेक जण आठवणींचा हा खजिना सांभाळून ठेवत आहेत. प्री-वेडिंग, कॉफी टेबल बुक, लग्नाचा अल्बम, करिझ्मा अल्बम, शॉर्टफिल्म, कुटुंबीय, मित्र-मैत्रिणींच्या त्या कपलविषयी असणाऱ्या भावना मुलाखतीद्वारे आणण्यासाठी फोटोग्राफर्सचा शोध ही लग्नकार्यावेळी महत्त्वाची बाब बनली आहे.
--
डिजिटल अन् पारंपरिक निमंत्रण
एकीकडे डिजिटलच्या युगात कमी खर्चात ऑनलाइन पत्रिका देण्याचा ट्रेंड वाढत आहे, तर दुसरीकडे महागड्या पत्रिका छापून घेण्याकडेही कल दिसून येत आहे. सध्या सोशल मीडियाचा वापर खुबीने करता येत असल्याने कमी खर्चात प्रभावी निमंत्रण पत्रिका स्नेहीजणांना पाठविणे सुलभ झाले आहे. संबंधित सोहळ्याबाबतची क्लिप तयार करून ई-मेल्स, व्हॉट्सअॅप आदींद्वारे पाठविले जाणारे निमंत्रण चर्चेचा विषय ठरत आहे. दुसरीकडे कपल्सचे फोटो टाकून लग्नातील विधींची माहिती देणाऱ्या निमंत्रण पत्रिकांचा ट्रेंडही जोरात आहे. केवळ पत्रिका न देता त्याबरोबर सुकामेवा, चॉकलेट्स, मिठाई यांचा समावेश करीत निमंत्रण आकर्षक केले जात आहे.
--
जुन्या-नव्याची कल्पक सांगड
आजच्या पिढीला केवळ नवीन ट्रेंड भुरळ घालतात असे नसून, जुन्या काळातील, पारंपरिक गोष्टींचीही तितकीच भुरळ पडताना दिसून येते. लग्नात डीजे असावा की नाही या विचाराबरोबरच लग्नात विधी सुरू असताना शहनाईचाच आवाज असावा, बग्गीत बसून वरातीचा आनंद लुटावा, अशी मागणी काही जणांकडून केली जाते. केवळ नवीन ट्रेंडच नाही, तर नाही पारंपरिक आणि आधुनिक अशी सांगड घालत त्यांना लग्नसोहळा पार पाडायचा असतो. त्यासाठी जुन्या-नव्याची कल्पक सांगड घालण्याकडेही वाढता कल दिसून येत आहे.
---
लग्नातील प्रत्येक गोष्टीबाबत हल्ली लोक खूप चिकित्सक झाले आहेत. त्यांच्या डीमांडनुसार आम्ही त्यांना पॅकेजेस देत असतो. पेशवाई या थीमपासून ते एकदम मॉडर्न थीममध्ये लग्न करण्याची मागणी पुढे येत असते. यामध्ये वाढपींनीही त्याच वेशभूषेत येऊन वाढावे, असा आग्रहही अनेकांचा असतो. या मागण्या त्यांना हव्या तशा पद्धतीने पुरविण्यात येतात. त्याची वेगवेगळी पॅकेजेस असतात.
-प्रकाश मते, अध्यक्ष, लॉन्स संघटना
--
पूर्वी केवळ पारंपरिक थीमवर फोटोज काढले जात होते. ज्या कपलचे लग्न आहे ते थेट लग्नाच्या दिवशीच फोटोग्राफरला बघायला मिळत. त्यामुळे फोटोग्राफर आणि कपलमध्ये व्यवस्थित बाँडिंग नसल्याने त्याचा परिणाम फोटोंवर व्हायचा. सध्याचा ट्रेंड बदलला आहे. कंटेम्पररी स्टाइल, सिनेमॅटिक व्हिडीओ करण्याला कपल्सची पसंती असते. लग्नापूर्वी, फोटोशूटपूर्वी आम्ही कपल्ससोबत मीटिंग्ज घेतो. त्यांच्या स्टोरीनुसार फोटोशूट करतो. इंटरनेटमुळे अनेक नवनवीन ट्रेंड सर्वसामान्यांनाही माहिती असल्याने त्यांच्याकडूनही वेगवेगळ्या मागण्या पुढे येत असतात.
-सागर कोल्हे, फोटोग्राफर
मोबाइल अॅप डाउनलोड करा आणि राहा अपडेट
