म. टा. प्रतिनिधी, नाशिक
भूतबाधा झाल्याच्या संशयावरून दोन महिलांना पायाखाली तुडवून ठार मारल्याप्रकरणी नाशिक जिल्हा व सत्र न्यायाधीश यू. एम. नंदेश्वर यांनी मृत महिलेची दोन मुले आणि भगत महिलेसह ११ जणांना मंगळवारी जन्मठेपेची शिक्षा सुनावली. महाराष्ट्र नरबळी आणि अमानुष, अनिष्ट व अघोरी प्रथा व जादूटोणा प्रतिबंधक कायद्यान्वये जन्मठेपेची शिक्षा होण्याची राज्यातील ही पहिलीच घटना आहे. २०१४ मध्ये ही संतापजनक घटना घडली होती.
इगतपुरी तालुक्यातील घोटी पोलिस स्टेशनच्या हद्दीमध्ये टाकेहर्ष गाव आहे. ३० डिसेंबर २०१४ रोजी या गावात बुधीबाई पुनाजी दोरे, तसेच तिची बहीण अंबाई (ता. त्र्यंबकेश्वर) येथील काशीबाई भ‌िका वीर या दोघींना भूतबाधा झाली आहे असे समजून भगत महिला बच्चीबाई नारायण खडके आणि दहा जणांनी काठीने बेदम मारहाण केली होती, तसेच पायाखाली तुडवून त्यांना ठार मारण्यात आले. बुधीबाई यांची मुलगी आणि या प्रकरणातील तक्रारदार राहीबाई हिरामण पिंगळे (रा. दांडवळ, ता. मोखाडा, जि. ठाणे) यांनाही भूतबाधेच्या संशयावरून ठार मारण्याचा प्रयत्न झाला. या प्रकरणी घोटी पोलिसांनी गुन्हा दाखल केला होता. तत्कालीन पोलिस उपअधीक्षक सी. एस. देवराज यांनी या गुन्ह्यात संशयित ११ आरोपींविरोधात सबळ पुरावे गोळा केले. या प्रकरणातील संशयित बच्चीबाई खडके, हरी बुधा निरगुडे, लक्ष्मण बुधा निरगुडे, नारायण भिवा खडके, वामन हनुमंता निरगुडे, किसन बुधा निरगुडे (सर्व रा. टाकेहर्ष, ता. इगतपुरी) गोविंदा पुनाजी दोरे, काशीनाथ पुणाजी दोरे, महादू कृष्णा वीर, बुगीबाई महादू वीर, सतीबाई बुधा निरगुडे (सर्व रा. दांडवळ व वाघ्याची वाडी, ता. मोखाडा, जि. ठाणे) यांच्या विरोधात पोलिस निरीक्षक मनोहर पाटील यांनी कोर्टात आरोपपत्र दाखल केले होते. बच्चीबाई खडके हिच्यासह सर्व आरोपींना जिल्हा व सत्र न्यायाधीश नंदेश्वर यांनी मंगळवारी जन्मठेपेची शिक्षा सुनावली. सरकार पक्षातर्फे सरकारी वकील अजय मिसर, सहाय्यक सरकारी वकील पौर्णिमा नाईक व दीपशिखा भिडे यांनी काम पाहिले.
मोबाइल अॅप डाउनलोड करा आणि राहा अपडेट
