त्र्यंबक नगरपालिका निवडणूक जाहीर झाल्यापासून शहरातील वातावरण ऐन थंडीत चांगले तापले आहे. यंदा थेट नगराध्यक्ष निवड होणार असल्यामुळे ही निवडणूक खूपच रंगतदार ठरण्याची पूर्वचिन्ह दिसत आहेत. नगराध्यक्षांच्या उमेदवारीसाठी बरीच मोठी यादी आहे. त्यामध्ये त्र्यंबकेश्वर देवस्थान संस्थान ट्रस्टचे दोन विद्यमान विश्वस्त समोरासमोर उभे ठाकण्याची तयारी करीत आहेत. माजी नगराध्यक्ष कैलास घुले आणि मंदिराचे पूजक डॉ. सत्यप्रिय शुक्ल हे दोन विश्वस्त लढतीसाठी सज्ज झाले आहेत. त्यामुळे यंदाच्या निवडणुकीत नगरसेवकांसह नगराध्यक्षाच्या निवडीतही प्रचंड स्पर्धा असेल.
कैलास घुले हे सिंहस्थ २००३च्या पूर्वनियोजनात नगराध्यक्ष होते. तर सत्यप्रिय शुक्ल शहराच्या जडणघडणीत महत्त्वपूर्ण योगदान असलेले स्व. डॉ. नानासाहेब शुक्ल परिवाराचा वारसा चालवत आहेत. नगराध्यक्ष आणि मंदिर विश्वस्त या दोन्ही पदांच्या अधिकाराचा समन्वय साधत शहराचा विकास करावयाचा आहे, अशी दोन्हींचा दावा आहे. कैलास घुले हे भाजपच्या उमेदवारीसाठी प्रबळ दावेदार आहेत. तर सत्यप्रिय शुक्ल यांनी काँग्रेसकडे उमेदवारीची मागणी केली असून, वेळ पडल्यास अपक्षदेखील लढत देण्याची तयारी ठेवली आहे. नगराध्यक्षांसाठी भाजपकडून पुरूषोत्तम लोहगावकर, माजी नगराध्यक्ष डॉ. दिलीप जोशी, माजी नगराध्यक्षा सुचिता शिखरे, अॅड. पराग दीक्षित आदींनी उमेदवारीवर दावा ठोकला आहे. काँग्रेसकडून माजी नगराध्यक्ष सुनील अडसरे, नबियून शेख आदींसह आणखी काही उमेदवार आहेत. शिवसेनेकडून माजी नगराध्यक्ष धनंजय तुंगार तयार आहेत. या व्यतिरिक्त आणखी काही नवे उमेदवार अर्ज दाखल करतांना पुढे येतील अशी दाट शक्यता आहे. राष्ट्रवादी, मनसेसह सर्वपक्ष आपले उमेदवार देतील असाही अंदाज व्यक्त केला जात आहे. मागणी केलेल्या पक्षाने तिकीट नाकारल्यानंतर इतर पक्षाची वा अपक्ष उमेदवारी करण्याची वरीलपैकी काहींची शक्यता आहे.
शेवटच्या दहा दिवसांत होणार धावपळ
अर्ज दाखल करण्यासाठी १६ ते २२ नोव्हेंबर हा सहा दिवसांचा कालावधी आहे. माघारी २८ नोव्हेंबर रोजी आणि मतदान १० डिसेंबर रोजी होणार आहे. शहराची एकूण मतदार संख्या १०६१४ आहे व माघारीनंतर दहा दिवसात या सर्व मतदारांपर्यंत पोहचावयाचे आहे. एकूणच पाहू वेळ आल्यावर ठरवू, असे म्हणत वेळ दवडणे घातक ठरणार आहे.
जाणकारांकडून तर्कवितर्क
यंदा भाजपकडे विजयाची उमेदवारी म्हणून पाहिले जाते. मात्र काँग्रेस राष्ट्रवादीचे एकत्र‌ित बळ आणि सामाजिक समीकरणांची जोड वेळेवर चित्र पालटविणारे ठरेल असा जाणकारांचा अंदाज व्यक्त होत आहे. शिवसेना आपली ताकद स्वतंत्र अजमावणार असे दिसते. शहरात भाजपचे दोन हजाराच्या आत मतदान आहे. ते देखील स्थानिक स्वराज्य संस्थेच्या या निवडणुकीत नातेगोते व मित्रपरिवारांच्या माध्यमातून वाटणी होण्याची दाट शक्यता आहे.
भाजपने जिंकले होते नगराध्यक्षपद
सन २००२ मध्ये थेट नगराध्यक्ष निवडणुकीत अनुसुचित जमाती आरक्षण होते. तेव्हा अनुसुचित जमातीचे नऊ उमेदवार रिंगणात होते. भाजप-सेना युती होती. तर राष्ट्रवादी आणि काँग्रेस यांची आघाडी होती. अर्थात जवळपास सर्वच पक्षातील बंडखोरांनी उमेदवारी करत आपला करारीबाणा कायम ठेवला होता. भाजपने पार्टी विथ द डिफरन्स असे म्हणत महिला उमेदवार पुष्पा मोहन झोले यांना उमेदवारी देऊन निवडणूक जिंकली होती. त्यावेळेस बाळकृष्ण झोले यांनी अपक्ष उमेदवारी करत सर्वच उमेदवारांना मागे टाकले होते.
मोबाइल अॅप डाउनलोड करा आणि राहा अपडेट
