शहरातील मुख्य रस्त्यांवरील फूटपाथ फेरीवाले आणि व्यावसायिकांनी गिळंकृत केल्याने पादचाऱ्यांसाठीचे फूटपाथच दिसेनासे झाले आहेत. या व्यावसायिकांवर पालिकेचा अतिक्रमण विभागही मेहरबान असल्याने सर्वोच्च न्यायालयाचे निर्देशही पायदळी तुडविले गेल्याचे चित्र सध्या नाशिकरोडमध्ये बघायला मिळत आहे.
शहरातील सर्वच रस्त्यांना पालिकेने फूटपाथ तयार केलेले आहेत. नागरिकांना सुरक्षितपणे पायी चालता यावे यासाठी फूटपाथ केलेले असले तरी सध्या या फूटपाथचा वापर फेरीवाले, व्यावसायिक आणि दुकानदारांकडून केला जात आहे. सर्वच रस्त्यांवर विक्रेत्यांनी अतिक्रमण केले असल्याने शहरात फूटपाथ दिसेनासे झाले आहेत. शहरातील प्रमुख व वर्दळीच्या रस्त्यांचे फूटपाथ पादचाऱ्यांसाठी मोकळे ठेवण्याची जबाबदारी सर्वोच्च न्यायालयाने स्थानिक स्वराज्य संस्थांवर टाकलेली आहे. असे असतानाही नाशिकरोडमधील फूटपाथची परिस्थिती बघता न्यायालयाच्या निर्देशांना पालिकेच्या अतिक्रमण विभागाने केराची टोपली दाखवली असल्याचे उघड झाले आहे.
हे रस्ते फूटपाथलेस..
बिटको चौक ते शिवाजी पुतळा
शिवाजी पुतळा ते देवी चौक आणि बसस्थानक
बसस्थानक ते शिवाजी पुतळा व महात्मागांधी टाऊन हॉल
बिटको चौक ते दुर्गादेवी गार्डन
वास्को चौक ते मस्जिद
मुक्तिधाम चौक ते मनपा शाळा क्र.१२५
संपूर्ण जेलरोड,
बिटको चौक ते दत्तमंदिर
वाहनबाजारचालक शिरजोर
शहरातील सर्वच मुख्य रस्त्यांवरील फूटपाथवर दुकानदारांनी आपले व्यवसाय थाटलेले आहेत. याशिवाय जेलरोडला फूटपाथवरच वाहनबाजार आहेत. दुकानदार आणि वाहनबाजार चालकांच्या या मुजोरीमुळे मुख्य रस्त्यांवरील रहदारीलाही अडथळा निर्माण होत आहे. या दुकानांत खरेदीसाठी येणाऱ्या ग्राहकांची वाहने मुख्य रस्त्यांवरच पार्क केली जातात. परिणामी सार्वजनिक वाहतुकीचा फज्जा उडत आहे.
नगरसेवकांचेही अतिक्रमण
मुक्तिधामभोवतीच्या सर्व रस्त्यांवरील फूटपाथ हॉटेल व्यावसायिकांसह इतर विक्रेत्यांनी गिळंकृत केलेले असल्याने या रस्त्यावर दररोज सायंकाळी वाहतुकीचा खेळखंडोबा होताना दिसून येतो. या रस्त्यावरील फूटपाथवरच व्यावसायिकांनी दुकाने थाटली आहेत. विशेष म्हणजे मुक्तिधाम चौकातील फूटपाथवरील काही टपऱ्या चक्क आजी-माजी नगरसेवकांच्याच आहेत. त्यांनी या व्यावसायिकांना भाडेतत्वावर दिलेल्या आहेत. त्यामुळे शहरातील फूटपाथवरील अतिक्रमणाबाबत पालिका प्रशासन मूग गिळून आहे. सामान्य नागरिकांचे मात्र फूटपाथअभावी हाल सुरू आहेत.
हप्ते वसुली जोरात
फूटपाथवर अतिक्रमण केलेल्या व्यावसायिक आणि फेरीवाल्यांकडून काही माजी नगरसेवक हप्ते वसुली करीत असल्याचीही या व्यावसायिकांत चर्चा आहे. बसस्थानक व रेल्वे स्थानक परिसरातील हातगाडे व इतर व्यावसायिकांचे अतिक्रमण प्रवाशांसाठी प्रचंड तापदायक झालेले आहे. मात्र, वाहतूक शाखेचे कर्मचारीही हप्ता मिळत असल्याने या अतिक्रमणाकडे दुर्लक्ष करीत आहेत. पालिकेच्या अतिक्रमण विभागाकडूनही या गंभीर प्रश्नाची दखल घेण्यास टाळाटाळ केली जात आहे.
सध्या धार्मिक स्थळांच्या अतिक्रमणाचा प्रश्न ऐरणीवर आहे. हॉकर्स झोनचा प्रश्नही मिटलेला नाही. शहरातील फूटपाथवरील व्यावसायिकांची लवकरच एक बैठक बोलावली जाणार असून, त्यांना बिटको रुग्णालयाजवळील जागेत स्थलांतरीत होण्याचे आवाहन केले जाणार आहे. त्यानंतर कायदेशीर कारवाई केली जाईल.
-सोमनाथ वाडेकर, विभागीय अधिकारी, नाशिकरोड
मोबाइल अॅप डाउनलोड करा आणि राहा अपडेट