नाशिकरोड सेंट्रल जेलमध्ये खुनाच्या गुन्ह्यात शिक्षा भोगत असलेल्या मोहनगिरी उर्फ गौतम काशिनाथ जोशी (७१, मूळ रा. सुरेंद्रनगर, उत्तरप्रदेश) या वृद्ध कैद्याने गळफास घेऊन आत्महत्या केल्याची घटना शुक्रवारी उघडकीस आली. जेलच्या स्वच्छतागृहाच्या बॅरेकमध्ये त्याने गळफास घेतला.
आत्महत्या केलेला गौतम जोशी हा कैदी बारा वर्षांपासून एका खुनाच्या गुन्ह्यात शिक्षा भोगत होता. लवकरच त्याची सुटका होणार होती. मराठवाड्यातील किनवट येथे घडलेल्या खुनाच्या गुन्ह्यात त्याला शिक्षा सुनावण्यात आली होती. चांगल्या वर्तणुकीमुळे त्याला खुल्या कारागृहात ठेवण्यात आले होते. जेलच्या मुख्य प्रवेशद्वारासमोरील झाडांची तो विशेष काळजी घेत असे. ‘बाबा’ या नावाने तो जेलच्या कर्मचाऱ्यांमध्ये परिचित होता. गेल्या काही वर्षांत त्याच्या वर्तनात सुधारणा झाली होती. तरीही त्याने आत्महत्या केल्याने जेल प्रशासनाने आश्चर्य व्यक्त केले आहे. नैराश्यातून त्याने आत्महत्या करण्याची शक्यता जेल प्रशासनातील सूत्रांनी व्यक्त केली. नाशिकरोड पोलिस ठाण्यात या घटनेची नोंद करण्यात आली. यापुर्वी २ सप्टेंबर रोजी डॅनी उर्फ हरपालसिंग कृपालसिंग चौधरी (३१, मूळ रा. धोरणगढा, पोस्ट वीर, ता. रुबास, जि. भरतपूर, राजस्थान) या कैद्यानेही आत्महत्या केल्याची घटना घडली होती.
मोबाइल अॅप डाउनलोड करा आणि राहा अपडेट
