गुरुवारी क्विंटलमागे कमाल २६४९ रुपये असा उच्चांकी भाव कांदा उत्पादक शेतकऱ्यांच्या हाती टेकवणाऱ्या उन्हाळ कांद्याने शुक्रवारी मात्र उत्पादक शेतकऱ्यांची काहीशी निराशा केली. गुरुवारी उन्हाळ कांदा बाजारभावाने घेतलेली मोठी उसळी बघता शुक्रवारी अनेकांनी बाजार समितीची वाट धरली. मात्र आवक वाढताच गुरुवारच्या तुलनेत उन्हाळ कांदा बाजारभाव कमाल व सरासरी तीनशे रुपयांनी खाली आला.
ज्यांनी कांदा चाळीत उन्हाळची साठवण केली आहे त्यांच्यात खुशीचे वातावरण दिसत आहे. येवला कृषी उत्पन्न बाजार समितीत गेल्या दहा दिवसात उन्हाळ कांदा बाजारभावाचा आलेख वरवर सरकताना गुरुवारी उन्हाळला प्रतिक्विंटल किमान ८०० ते कमाल २६४९ रुपये (सरासरी २४००) असा बाजारभाव मिळाला होता. या हंगामातील हा कमाल उच्चांकी बाजारभाव असल्याने उत्साहित झालेले शेतकरी शुक्रवारच्या कांदा लिलावासाठी गुरुवारी सायंकाळपासूनच येवला बाजार समितीत मुक्कामी डेरेदाखल झाले होते. एकदम ट्रॅक्टरची वाढलेली संख्या बघता बाजार समिती हाउसफुल्ल होताना मार्केट कमेटीसमोरील मनमाड-नगर राज्य महामार्गावर लांबच लांब ट्रॅक्टरच्या रांगा लागल्या होत्या. मात्र, गुरुवारच्या तुलनेत उन्हाळचा बाजारभाव सरासरी तसेच कमाल देखील तीनशे रुपयांनी खाली आल्याने शेतकऱ्यांचा अपेक्षाभंग झाला.
शुक्रवारी येवला बाजार समितीत जवळपास साडेसातशे ट्रॅक्टर दाखल झाले होते. त्यातील सहाशे ट्रॅक्टर तसेच गुरुवारच्या राहिलेल्या २२० पिकअप रिक्षा यातील कांद्याचा शुक्रवारी दिवसभरात लिलाव झाला. त्यात उन्हाळ कांद्याला प्रतिक्विंटल किमान १ हजार ते कमाल २३५० (सरासरी २१००) असा भाव मिळाला. मात्र दुपार सत्रात कमाल बाजारभाव पुन्हा ५० रुपयांनी खाली आल्याचे दिसले. अंदरसूल उपबाजार आवारात शुक्रवारी उन्हाळ कांद्याला किमान १ हजार ते कमाल २४५३ (सरासरी २१००) असा भाव मिळाला. कांदा अधिक गडगडू नये याची चिंता शेतकऱ्यांना लागली आहे.
मोबाइल अॅप डाउनलोड करा आणि राहा अपडेट
