जिल्हाभरातील मतदान केंद्रांवर यंत्रणा सज्ज
म. टा. प्रतिनिधी, नाशिक
मराठा विद्या प्रसारक या शिक्षण संस्थेसाठी यंदा अत्यंत प्रतिष्ठेची बनलेल्या निवडणुकीकरिता आज (दि. १३ ऑगस्ट) मतदान होणार आहे. जिल्हाभरातून सुमारे साडेदहा हजार सभासद मतदानाचा हक्क बजावणार आहेत. उद्या (दि. १४ ऑगस्ट) मविप्रच्या प्रांगणातील जिमखाना परिसरातच मतमोजणी होऊन निकाल जाहीर होणार असल्याची माहिती निवडणूक मंडळाने दिली. आज सकाळी ८ ते दुपारी ४ या वेळेत हे मतदान होणार आहे.
मविप्रच्या मध्यवर्ती कार्यालयावर २०१७ ते २०२२ या पंचवार्षिक कालावधीकरिता सत्तेचे निशाण रोवण्यासाठी सत्ताधारी प्रगती पॅनल आणि विरोधी समाज विकास पॅनलने सर्व प्रतिष्ठा पणाला लावली आहे. निवडणुकीच्या अंतिम टप्प्यात प्रचार थंडावल्यानंतरही प्रत्यक्ष-अप्रत्यक्ष साम, दाम, दंड आणि भेद या चतु:सूत्रीचा उपयोग होत असल्याच्या चर्चा मविप्रच्या वर्तुळात मतदानाच्या पूर्वसंध्येपर्यंत रंगल्या. दरम्यान, दिवसभर जिल्हाभरातील केंद्रांना आवश्यक त्या साहित्याचा पुरवठा मध्यवर्ती कार्यालयातून निवडणूक मंडळाव्दारे करण्यात आला.
५५० कर्मचारी आणि ४३ बूथ
मविप्रसाठी १० हजार १४७ हजार सभासद आहेत. सेवकांची संख्या ४६४ आहे. याप्रमाणे एकूण १० हजार ६११ सभासद आहेत. जिल्ह्यात पंधरा तालुक्यांमध्ये १३ मतदान केंद्रांवर ४३ बूथची रचना करण्यात आली आहे. यातील दोन बूथ हे सेवकपदासाठी होणाऱ्या मतदानाकरिता आहेत. आजच्या मतदानाकरिता ५५० कर्मचाऱ्यांचे नियोजन करण्यात आले आहे. एकूण २१ जागांसाठी ५२ उमेदवार रिंगणात आहेत. यात सर्वाधिक सभासद असलेल्या निफाड तालुक्यात १२ बूथ, तर अल्प सभासद असणाऱ्या इगतपुरी, नांदगाव आणि येवला तालुक्यात प्रत्येकी एका बूथची व्यवस्था केली आहे.
असे असतील मतदान केंद्र
या मतदानास आज, रविवारी सकाळी ८ वाजता सुरुवात होऊन दुपारी ४ वाजेपर्यंत मतदान होईल. नाशिक मनपा क्षेत्रासाठी गंगापूर रस्त्यावरील मराठा हायस्कूल, महापालिका क्षेत्रातील २० गावे आणि त्र्यंबकेश्वर तालुक्यासाठी अभिनव बालविकास मंदिर, सेवक सभासद मतदारांसाठी शिवाजीनगर येथील केआरटी कॉलेज, निफाड तालुक्यासाठी कर्मवीर गणपतदादा मोरे कॉलेज, इगतपुरीसाठी कर्मवीर पुंजाबाबा गोवर्धने कॉलेज, कळवण व सुरगाण्यासाठी मानूर आर्ट, कॉमर्स अँड सायन्स कॉलेज, चांदवड तालुक्यासाठी जिजाबाई गुंजाळ कॉलेज, दिंडोरी आणि पेठसाठी दिंडोरीतील जनता इंग्लिश स्कूल, नांदगाव तालुक्यासाठी नांदगांव आर्ट, कॉमर्स आणि सायन्स कॉलेज, सटाण्यासाठी कर्मवीर आबासाहेब सोनवणे तथा ना. म. सोनवणे कॉलेज, मालेगाव तालुक्यासाठी सोयगावचे आर्ट, कॉमर्स आणि सायन्स कॉलेज, सिन्नर तालुक्यासाठी जीएमडी आर्ट, बी. डब्ल्यू. कॉमर्स या मतदान केंद्रांवर मतदान होणार आहे.
लक्षवेधी लढती
मविप्रच्या घटनेतील केंद्रस्थानच्या म्हणजेच सरचिटणीसपदाच्या मुख्य लढतीकडे जिल्ह्याचे लक्ष आहे. विद्यमान सरचिटणीस नीलिमा पवार आणि विद्यमान सभापती अॅड. नितीन ठाकरे यांच्यात होणारी ही दुरंगी लढत चर्चेचे मध्यवर्ती केंद्र आहे. अध्यक्षपदासाठीही तीन उमेदवार रिंगणात आहेत. यामध्ये विद्यमान अध्यक्ष व माजी खासदार प्रतापदादा सोनवणे, डॉ. तुषार शेवाळे आणि भास्कर पवार यांच्यात लढत होत आहे. यामध्ये सोनवणे आणि डॉ. शेवाळे हे दोन्ही उमेदवार कसमादे पट्ट्यातील आहेत. सभापतिपदासाठी माणिकराव बोरस्ते आणि दिलीपराव मोरे यांच्यात, उपसभापतिपदासाठी राघो आहिरे, रवींद्र पगार, भगवंत बोराडे, रामदास गायकवाड यांच्यात तर चिटणीस पदासाठी नानासाहेब बोरस्ते व डॉ. सुनील ढिकले यांच्यात लढत होत आहे. याशिवाय उर्वरित तालुका सदस्य पदासाठीच्या लढतीवर प्रत्येक तालुक्याचे लक्ष लागले असून, एकेक जागेसाठी दोन्हीही पॅनलने जोरदार फिल्डिंग लावली आहे.
सोमवारी मतमोजणी
रविवारी दुपारी ४ वाजेपर्यंत मतदान पार पडल्यानंतर उद्या (दि. १४ऑगस्ट) मविप्र आवारातील जिमखाना परिसरात मतमोजणी होणार आहे. सायंकाळी ७ वाजेपर्यंत सर्व जागांचे निकाल हाती येण्याची शक्यता आहे.
मोबाइल अॅप डाउनलोड करा आणि राहा अपडेट
