कलानंद कथक नृत्य संस्थेतर्फे गुरुपौर्णिमेनिमित्त ‘कथकरंग’ या कथक नृत्याच्या विविध पैलूंचे दर्शन घडविणाऱ्या कार्यक्रमात बहारदार नृत्य सादरीकरणातून कथकरंग उलगडले. विश्वास लॉन्स येथे बुधवारी रंगलेल्या या कार्यक्रमात एक रंग व एक तालातील विविध रचनांचे सादरीकरण करण्यात आले.
कलानंद संस्थेच्या उगवत्या व अनुभवी विद्यार्थीवृंदाने हा कार्यक्रम सादर केला. एक वर्ष नृत्य शिक्षण घेतलेल्या विद्यार्थिनींपासून ते विशारद, अलंकार झालेल्या विद्यार्थिनींपर्यंत आपली कला सादर करून गुरू संजीवनी कुलकर्णी यांना वंदन केले. कार्यक्रमाची सुरुवात ‘एकदंत प्रथम नमन’ या गणेशवंदनेने करण्यात आली. त्यानंतर कथक परिचय, रास रयत, सरगम, झपताल, होरी आदी नृत्यप्रकार सादर झाल्यानंतर कलानंदच्या ज्येष्ठ विद्यार्थिनींनी विविध प्रकारच्या गत-निकास सादर केल्या. या कार्यक्रमात नितीन पवार (तबला), कुणाल काळे (संवादिनी), मोहन उपासनी (बासरी) यांनी संगीतसाथ केली. पुष्कराज भागवत यांनी गायनसाथ केली. सुमुखी अथनी, वृषाली कोकाटे, मधुवंती देशपांडे यांनी संयोजन केले. अपर्णा क्षेमकल्याणी यांनी कार्यक्रमाचे सूत्रसंचालन केले. मधुवंती देशपांडे यांनी आभार मानले.
३६ वर्षांची परंपरा...
संस्थेच्या प्रथेप्रमाणे कार्यक्रमाच्या उत्तरार्धात विशिष्ट संकल्पना घेऊन अनोखे सादरीकरण करण्यात आले. त्यात ‘एक रंग एक ताल’ ही संकल्पना मांडण्यात आली. संकल्पनेत दुर्गा स्तवन, सावन, तराणा, ताल विस्तार, भजन आदी नृत्यप्रकार एकतालात गुंफून सादर करण्यात आले. कार्यक्रमाचा समारोप आरोह या संकल्पनेवरील नृत्य सादर करून झाला. गेल्या ३६ वर्षांपासून दर वर्षी हा कार्यक्रम सादर करण्यात येत आहे.
मोबाइल अॅप डाउनलोड करा आणि राहा अपडेट