सावित्रीबाई फुले पुणे विद्यापीठाच्या परीक्षा विभागाचा अनागोंदी कारभार अद्याप थांबलेला नाही. मॅथेमेट‌िक्स या विषयात बीएससी पदवीचे शिक्षण घेणाऱ्या २० विद्यार्थ्यांच्या उत्तरपत्रिका अर्धवट तपासून गुणदान करण्यात आल्याची धक्कादायक बाब समोर आली आहे. या अजब कारभारामुळे या विद्यार्थ्यांचे भवितव्यच धोक्यात आले आहे. यात नाशिकच्याही एका विद्यार्थ्याचा समावेश असून, आणखी विद्यार्थ्यांचेही या प्रक्रियेत नुकसान झाल्याची शक्यता व्यक्त केली जात आहे.
विद्यापीठाच्या वतीने घेण्यात आलेल्या बीएससीच्या अंतिम वर्षाच्या परीक्षेत सहाव्या सेमिस्टरमध्ये रिंग थिअरी या विषयामध्ये एकूण ४० गुणांपैकी अवघे १० किंवा त्यापेक्षाही कमी गुण देण्यात आले आहेत. याबाबत विद्यार्थ्यांना विश्वास न वाटल्याने विद्यापीठाकडून फोटोकॉपीजची मागणी केल्यानंतर त्यांनी गुणांचा पडताळा करून पाहिला. त्यावेळी त्यांना आश्चर्याचा धक्काच बसला. या विद्यार्थ्यांच्या उत्तपत्रिकेमध्ये बरोबर उत्तरे लिहूनही काही ठिकाणी शून्य गुण टेकविण्यात आले आहेत. काही उत्तरे तपासलीच न गेल्याचाही या विद्यार्थ्यांचा दावा आहे. फोटोकॉपीजच्या आधारावर तज्ज्ञ प्राध्यापकांकडून पडताळणी केल्यानंतर या विद्यार्थ्यांच्या एकूण गुणांमध्ये ५ ते १६ गुणांची भर पडत आहे. या रितीने तपासणी झाल्यास नापास ठरविले गेलेले २० विद्यार्थी पास होऊ शकतात, असा विद्यार्थ्यांचा दावा आहे. हे वाढणारे संभाव्य गुण पदरात पाडून नियमांनुसार अपेक्षित बदल घडण्यासाठी पुनर्मूल्यांकनाच्या महिनाभराच्या प्रक्रियेची विद्यार्थ्यांना प्र्रतीक्षा करावी लागणार आहे. मात्र, दुसरीकडे अशी प्र्रतीक्षा केल्यास या विद्यार्थ्यांची एम. एस्सी. प्रवेशाची मुदत संपून जाण्याचा धोका आहे.
मॉडरेटरच्या खुणा नाहीत
या सर्व फोटोकॉपीजवरूनही काही मुद्दे समोर येत आहेत. यातील बहुतांश फोटोकॉपीजवर एकाच पर्यवेक्षकाची सही आहे. शिवाय परीक्षकानंतर मॉडरेटरने या उत्तरपत्रिका तपासल्याच्या खुणा आढळून येत नाही. या विद्यार्थ्यांना आता विद्यापीठाकडे उत्तरपत्रिका पुनर्मूल्यांकनाशिवाय पर्याय राह‌िलेला नाही. विद्यार्थ्यांना नियमानुसारच प्रक्रिया करावी लागेल, असे विद्यापीठाचे म्हणणे आहे.
मोबाइल अॅप डाउनलोड करा आणि राहा अपडेट
