नाशिक येथे गोरेगावच्या धर्तीवर दादासाहेब फाळके चित्रपटसृष्टीसाठी प्रस्तावित जमीन सांस्कृतिक कार्य विभागाकडे हस्तांतरित करण्याकरिता लवकरच सांस्कृतिक कार्य, तसेच महसूल व वन विभागाची संयुक्त बैठक आयोजित करण्यात येणार असल्याची माहिती राज्याचे सांस्कृतिक कार्यमंत्री विनोद तावडे यांनी दिली. मुंबई येथे सुरू असलेल्या अधिवेशनात आमदार जयवंतराव जाधव यांनी विचारलेल्या तारांकित प्रश्नांवर राज्याचे सांस्कृतिक कार्यमंत्री विनोद तावडे यांनी हे उत्तर दिले.
नाशिक येथे गोरेगावच्या धर्तीवर दादासाहेब फाळके चित्रपटसृष्टी निर्माण करण्याकरिता नाशिक विकास कार्यक्रमांतर्गत १० कोटी रुपये नियतव्यय निश्चित केल्यानुसार जिल्हाधिकाऱ्यांनी महाराष्ट्र चित्रपट रंगभूमी आणि सांस्कृतिक विकास महामंडळाने सविस्तर अहवाल सादर केला आहे. या प्रकल्पासाठी मुंढेगाव (ता. इगतपुरी) येथील जागा सांस्कृतिक कार्य विभागाच्या नावे हस्तांतरित करण्याकरिता प्रस्तावही पाठविण्यात आला. सरकारने चित्रपटसृष्टीसाठी सांस्कृतिक कार्य विभागास जमीन हस्तांतरण करून या चित्रपटसृष्टीचे काम सुरू करण्याबाबत अद्याप कार्यवाही केली नाही. याबाबत सांस्कृतिक कार्यमंत्री तावडे यांना प्रश्न विचारण्यात आला होता. त्यावर त्यांनी नाशिक येथे गोरेगावच्या धर्तीवर दादासाहेब फाळके चित्रपटसृष्टीसाठी प्रस्तावित जमीन सांस्कृतिक कार्य विभागाकडे हस्तांतरित करण्याबाबतचा प्रस्ताव तपासण्यात येत असून, लवकरच सांस्कृतिक कार्य विभागासोबत महसूल व वन विभागाची संयुक्त बैठक आयोजित करण्यात येणार असल्याचे सांगितले. त्यामुळे या कामाला एकप्रकारे हिरवा कंदीलच मिळाला आहे.
मोबाइल अॅप डाउनलोड करा आणि राहा अपडेट
