तळवाडे साठवण तलावातील पाणी पुरवठ्याचे नियोजन करून दाभाडी गावास पाणी देणे व स्वच्छ महाराष्ट्र अभियानांततर्गत वैयक्तिक शौचालय बांधकामबाबत धोरणात्मक निर्णय घेण्यावरून गुरुवारची महासभा गाजली. साठवण तलावातून दाभाडीसाठी ५० एमटीएफसी पाण्यासाठी मतदान घेऊन मंजुरी देण्यात आली.
पालिका सभागृहात महापौर रशीद शेख, उपमहापौर सखाराम घोडके, आयुक्त संगीता धायगुडे, नगरसचिव राजेश धसे यांच्या उपस्थित महासभा झाली. नवनिर्वाचित सदस्यांच्या उपस्थित ही पहिलीच महासभा होती. विषयपत्रिकेवर शिवसेना गटनेते नीलेश आहेर यांच्या सुचनेवरून पालिकेच्या तळवाडे साठवण तलावाचा पाणी पुरवठ्याचा नियोजनाचा विषय चांगलाच तापला. शहराला पाणीपुरवठा करणाऱ्या या तलावातून दाभाडीसाठी पाणी
देण्याबाबत आहेर यांनी आग्रही भूमिका मांडली. महागठबंधन आघाडीचे गटनेते बुलंद इक्बाल, एमआयएमचे गटनेते डॉ. खालिद परवेज आदींनी आक्षेप घेतला. त्यामुळे महासभेत गोंधळ झाला.
मानवतेच्या भावनेतून या दाभाडीसाठी पाण्याचे आवर्तन देण्यात यावे अशी मागणी आहेर यांनी केली. एमआयएमचे गटनेते खालिद यांनी शहाराचा पाणीसाठा जैसे थे राहणार असल्यास पाणी देण्यास हरकत नसल्याचे सांगितले. मात्र बुलंद इक्बाल यांनी उपसूचना मांडल्याने त्यावर हात उंचावून मतदान घेण्यात आले. शिवसेनेच्या ठरवाच्याबाजूने एमआयएमच्या नगससेवकांनी मतदान केल्याने यास मंजुरी देण्यात आली. यासह शहरातील हागणदारीमुक्त अभियानाचा विषयावर देखील जोरदार चर्चा झाली.
या विषयांना मंजुरी
मनपा कर्मचारी, अधिकारी यांच्या वैद्यकीय भत्ता वाढ
मनपा हद्दीत उद्यान व ग्रीन स्पेस विकसित करणे
नादुरुस्त शौचालय दुरुस्तीसाठी खर्चास मंजुरी
मनपाने नेमून न दिलेल्या जागेत कचरा फेकल्यास दंड
आरोग्यविषय सेवांचे शुल्क रद्द करणे
मोबाइल अॅप डाउनलोड करा आणि राहा अपडेट
