जेलरोड येथील बस स्टॉपच्या निवारा शेडवरील खानावळीचा जाहिरात फलक अखेर हटविण्यात आला आहे. त्याचप्रमाणे करन्सी नोट प्रेससमोरील निवारा शेडमधील पोस्टाची पेटीदेखील काढण्यात स्थलांतरित करण्यात आली आहे. याबाबत ‘मटा’मध्ये नुकतेच छायाचित्रासह वृत्त प्रसिद्ध झाले होते. त्याची दखल घेऊन ही कार्यवाही करण्यात आल्याने फुकटची जाहिरातबाजी थांबल्याबद्दल नागरिकांनी समाधान व्यक्त केले आहे. मात्र, या परिसरातील निवारा शेडचे विद्रुपीकरण दूर करून त्यांची दुरुस्ती करण्याची मागणीदेखील परिसरातून करण्यात येत आहे.
जेलरोड येथील महावितरणच्या वीजबिल भरणा केंद्राशेजारील बस स्टॉपवर प्रवाशांसाठी निवारा शेड उभारण्यात आले आहे. मात्र, परिसरातील एका खानावळ मालकाने मोठा बोर्ड करून तो या बस स्टॉपच्या निवारा शेडवर लावला. त्यात पत्ता व फोन नंबरही दिला होता. या फलकामुळे हा बस स्टॉप आहे, की हॉटेल असा प्रश्न प्रवाशांना पडत होता. हा फलक कोसळून प्रवासी जखमी होण्याचीही भीती होती. ‘मटा’मध्ये याबाबत छायाचित्रासह वृत्त प्रसिद्ध झाल्यानंतर हा फलक हटविण्यात आला आहे.
--
पोस्टानेही केली कार्यवाही
जेलरोडला करन्सी नोट प्रेससमोरील बस स्टॉपवर बस कधीच थांबत नसल्याच्या तक्रारी आहेत. या निवारा शेडमध्ये भाजीविक्रेते आपल्या वस्तू त्यात ठेवतात. या शेडमध्येच पोस्टाची पेटीदेखील लावण्यात आलेली होती. त्यामुळे प्रवाशांकडून नाराजी व्यक्त केली जात होती. याबाबत ‘मटा’मध्ये छायाचित्रासह वृत्त प्रसिद्ध होताच ही पेटी संबंधित विभागाने काढून घेतली आहे. नाशिकरोडचे पोस्टमास्तर सुधाकर जाधव यांनी कर्मचारी पाठवून ही पेटी काढली आणि शेजारी असलेल्या प्रेसच्या जाळीवर बसविली आहे.
मोबाइल अॅप डाउनलोड करा आणि राहा अपडेट