दुचाकी पार्किंगच्या वादातून दोन कुटुंबामध्ये हाणामारी झाली. ही घटना मोठा मातंगवाडा भागात घडली असून, या प्रकरणी भद्रकाली पोलिस स्टेशनमध्ये मारहाणीसह विनयभंगाचा गुन्हा दाखल करण्यात आला आहे.
रोहित सुभाष लव्हेरा (२३ रा. मोठा मातंगवाडा भद्रकाली) यांनी दिलेल्या फिर्यादीनुसार, शनिवारी (दि. ८) दुपारी मातंगवाडा व्यायामशाळेजवळ मोपेड दुचाकी पार्क करीत असतांना जोगेंद्र डांगळे, योगेश थावरी, संगिता डांगळे आणि पूजा थावरी (सर्व रा. मातंगवाडा) आदींनी दुचाकी पार्क केल्यावरून शिवीगाळ केली. यावेळी संशयित आरोपींना रोहित समजावून सांगण्याचा प्रयत्न करीत असताना योगेशने लाकडी दांडक्याने मारहाण केल्याचे रोहितच्या तक्रारीत नमूद केले आहे. दरम्यान, संगिता आणि पूजा थावरी या महिला सकाळी भावाच्या पार्क केलेल्या चारचाकी वाहनात पर्स शोधत असतांना रोहितने विनयभंग केल्याचा आरोप तक्रारीत करण्यात आला आहे. यावेळी महिलेचा पती घटनास्थळी पोहचला असता संशयित आरोपी रोहितने त्यांना लाकडी दांडा व फायटरने मारहाण केल्याचे तक्रारीत नमूद केले आहे. घटनेचा अधिक तपास हवालदार भगरे करीत आहेत.
घरात घुसून महिलेचा विनयभंग
शरणपूररोड परिसरात राहणाऱ्या महिलेच्या घरात घुसून संशयित आरोपीने तिचा विनयभंग केला. पीडित महिलेने विरोध केला असता संशयिताने तिला बेदम मारहाण करून पोबारा केला. या प्रकरणी सरकारवाडा पोलिस स्टेशनमध्ये गुन्हा दाखल करण्यात आला आहे. राजू वाघमारे (रा. जुने पोलिस आयुक्तालयासमोर, शरणपूर रोड) असे संशयित आरोपीचे नाव आहे. वैराज हॉलमागे राहणारी ३० वर्षीय महिला आपल्या घरात एकटी असताना हा प्रकार घडला. महिल एकटीची असल्याची संधी साधत संशयिताने घरात प्रवेश केला. यावेळी त्याने महिलेशी अंगलट करण्याचा प्रयत्न करीत विनयभंग केला. दरम्यान महिलेने विरोध केला असता संशयिताने तिला बेदम मारहाण करीत पोबारा केला. घटनेचा अधिक तपास पोलिस उपनिरीक्षक मोरे करीत आहेत.
युवतीस बेदम मारहाण
भेटण्यास बोलावून घेत जळगाव जिल्ह्यातील युवतीला बेदम मारहाण करण्याची धक्कादायक घटना सिडकोतील दत्तमंदिर परिसरात घडली. लोखंडी रॉडने मारहाण झाल्याने पीडित युवती जखमी झाली. या प्रकरणी अंबड पोलिस स्टेशनमध्ये गुन्ह्याची नोंद करण्यात आली आहे. मेघराज धनराज मोरे (२३, रा. भोरटेक ता. भडगाव) असे संशयित आरोपीचे नाव आहे. तरुण आणि युवती एकमेकाच्या परिचयाचे आहे. १७ वर्षीय पीडित युवती सिडकोतील हेडगेवारनगर भागात राहते. संशयित आरोपीने युवतीला रविवारी (दि. ९) सकाळी आठ वाजेच्या सुमारास परिसरातील दत्त मंदिराशेजारी भेटण्यासाठी बोलावले. यावेळी दोघांमध्ये काही कारणावरून वाद झाला. शाब्दिक चकमकीचे रुपांतर हाणामारीत झाले. संशयिताने युवतीस शिवीगीळ करीत लोखंडी रॉडने मारहाण केली. घटनेचा अधिक तपास सहायक पोलिस उपनिरीक्षक जाधव करीत आहेत.
मोबाइल अॅप डाउनलोड करा आणि राहा अपडेट
