दहावीच्या परीक्षेत येथील रचना विद्यालयाची विद्यार्थिनी अक्षता देवेंद्र पाटील हिने ९९.८० टक्के मिळवून शहरातून अव्वल क्रमांक पटकावला आहे. या यशाचे श्रेय अक्षताने आई-वडिलांकडून मिळालेल्या पाठबळाला दिले आहे. अक्षताच्या सोबतच तिची जुळी बहीण ऋतुजा शिकते. तिनेही या परीक्षेत रचना विद्यालयातून घवघवीत यश मिळवित ९३.२० टक्के मिळविले आहेत.
त्र्यंबकेश्वर तालुक्यातील दुर्गम आदिवासी पाड्यावर अक्षता हिची आई स्वाती पाटील आणि वडील देवेंद्र पाटील हे जिल्हा परिषदेचे शिक्षक म्हणून सेवा बजावतात. पाटील कुटुंब नाशिक शहरात निवासाला असले, तरीही आई-वडिलांच्या नोकरीच्या दुर्गम ठिकाणामुळे त्यांना शिक्षक असूनही मुलींच्या शिक्षणासाठी वैयक्तिक अन् पुरेसा वेळ देणे शक्य होत नव्हते.
अक्षता आणि ऋतुजा या दोघीही दहाव्या इयत्तेत आल्यानंतर घरात पहिला घडलेला बदल म्हणजे घरातला बंद झालेला टीव्ही. मुलींच्या अभ्यासावर प्रतिकूल परिणाम होऊ नये, यासाठी दिवसभरातील कुठल्याही टीव्ही कार्यक्रमाचा अपवाद न ठेवता पाटील कुटुंबीयांनी दहावीची परीक्षा होईपर्यंत टीव्हीचे कनेक्शनच काढून ठेवले. शाळा, गरजेपुरता क्लास यातील जाणारा वेळ वगळता दिवसभरातून अक्षताने सुमारे पाच तास अभ्यासाला दिले. बाजारातील तयार नोट्सवर अवलंबून न राहता स्वत: काढलेल्या अभ्यासविषयांच्या नोट्सची सवय तिला आत्मविश्वास देऊन गेली. या मुलींच्या वडिलांनाही नुकतेच आदर्श शिक्षक पुरस्काराने राष्ट्रपतींच्या हस्ते गौरविण्यात आले आहे.
अक्षता हिला ५०० पैकी एकूण ५९९ गुण पडले. यातील १५ गुण हे क्रीडा आणि कला विषयातील सहभागाबद्दल देण्यात येणारे अधिकचे गुण आहेत, तर या १५ गुणांशिवाय तिला पडलेल्या गुणांची एकूण बेरीज ४८४ होते.
_ _ _ _
शिस्तीच्या शिरस्त्याचा उपयोग
अभ्यासासाठी आई-वडिलांनी वेळोवेळी दिलेले प्रोत्साहन, लावलेली शिस्त दहावीच्या यशात उपयोगी आली. दिवसाकाठी सुमारे पाच तासांचा अभ्यास, स्वत:च्या नोट्स काढण्याची सवय फायद्याची ठरली. भविष्यात एमबीबीएसचे शिक्षण घेऊन प्रशासनात अधिकारी बनायचे स्वप्न आहे.
-अक्षता पाटील, विद्यार्थिनी
मोबाइल अॅप डाउनलोड करा आणि राहा अपडेट
