बिटकॉइन या इंटरनेटवरील व्हर्च्युअल करन्सीत गुंतवणूक करणाऱ्यांना एका कॉइनमागे चक्क १० लाख रुपये परतावा देण्याचे आमिष संशयितांकडून दाखवण्यात येत होते. सध्या भारतात बिटकॉइन चलनावर बंदी आहे. लवकरच ही बंदी उठवण्यात येईल. त्यानंतर गुंतवणूकदारांना हा मोबदला मिळणार असल्याचे सांगण्यात येत होते. फसवणुकीच्या दृष्टीनेच बिटकॉइनचा प्रचार आणि प्रसार केला जात असल्याचे यातून स्पष्ट होत असल्याचा दावा पोलिसांनी केला आहे.
बिटकॉइन हे इंटरनेटवरील एक चलन आहे. या चलनाचा परदेशात वापर केला जातो. विशेषतः अंडरवर्ल्डद्वारे ड्रग्ज, हत्यारे खरेदी- विक्रीच्या व्यवहारांसाठी या चलनाचा वापर केला जातो. भारतात या चलनाच्या वापरावर बंदी आहे. पुणे, नागपूर, शिर्डी या शहरांसह नाशिकमध्ये बिटकॉइनमध्ये गुंतवणुकीस उद्युक्त करणाऱ्या एका टोळीला शहर पोलिसांनी नुकतीच अटक केली. सध्या ही टोळी पोलिस कोठडीत आहे. त्यांची चौकशी केली असता, या टोळीने नाशिकसह पुणे, नागपूर, अहमदनगर जिल्ह्यातील शिर्डी येथे अनेक बैठकी घेतल्याचे समोर आले आहे. मल्टिलेव्हल मार्केटिंग पद्धतीने ही टोळी बिटकॉइनचा प्रसार करून गुंतवणूकदारांना गुंतवणूक करण्यासाठी उद्युक्त करीत होते. बिटकॉइनमध्ये गुंतवणूक केल्यास मोठा फायदा होण्याचे आमिष संशयितांकडून दाखवण्यात येत होते. भारताने बिटकॉइनवरील बंदी हटवल्यानंतर गुंतवणूकदारास एका बिटकॉइनमागे तब्बल १० लाख किंवा त्यापेक्षा अधिक मोबादला मिळू शकतो, असा दावा संशयितांकडून करण्यात येत होता. संशयित आरोपींमध्ये निशेद महादेवजी वासनिक (वय २९, नागपूर), रोमजी बिन अहमद (मलेशिया), आशिष शंकर शहारे (वय २८, कोपरगाव, जि. अहमदनगर), दिलीप प्रेमदास बनसोड (वय २९, पाथर्डी फाटा), कुलदीप लखू देसले (वय ३८, रा. सुरेश बापू प्लाझा, खुटवडनगर, नाशिक) यांचा समावेश आहे. यातील रोमजी अहमद हा मलेशिया येथील संशयित www.futurebit.com या वेबसाइटच्या मदतीने राज्यात बस्तान बसवण्याचा प्रयत्न करीत होता. तो या गुन्ह्याचा मुख्य सूत्रधार असून, शहरापर्यंत तो कसा पोहोचला याचा शोध पोलिस घेत आहेत.
मोबाइल अॅप डाउनलोड करा आणि राहा अपडेट
