हायवेपासून ५०० मीटरवरील मद्य विक्रीची दुकाने, हॉटेल्स बंद झाली. मात्र, मोजणीप्रक्रिया राबवताना संबंधित विभागाने चालढकल केली असून, यामुळे दिंडोरी, तसेच पेठ रोडवरील चार हॉटेल्स, तसेच मद्य विक्रीची दुकाने सुटल्याचा आरोप नागरिकांकडून करण्यात येतो आहे. या पार्श्वभूमीवर आज संयुक्त मोजणीप्रक्रिया राबवण्यात आली. याचा अहवाल आल्यानंतर पुढील कार्यवाही करण्यात येणार असल्याचे राज्य उत्पादन शुल्क विभागाने स्पष्ट केले.
हायवेवरील फेटल अपघातांचे प्रमाण कमी करण्यासाठी सुप्रीम कोर्टाने हायवेपासून ५०० मीटरच्या आत येणारी मद्य विक्रीची सर्व दुकाने बंद करण्याचे आदेश दिले. या निर्णयाची अंमलबजावणी एक एप्रिलपासून सुरू झाली. यामुळे शहरासह जिल्ह्यातील जवळपास ८०० दुकाने, परमिट रूम, बार बंद झाली. मात्र, दिंडोरी, तसेच पेठरोडवरील मोजणीप्रक्रिया सदोष असल्याचा दावा नागरिकांकडून करण्यात येतो आहे. तसे निवेदन नागरिकांकडून राज्य उत्पादन शुल्क विभागाला देण्यात आले होते. याबाबत बोलताना राज्य उत्पादन शुल्क विभागाचे अधीक्षक आर. जी. आवळे यांनी सांगितले, की रस्त्यांच्या मोजणीचे काम त्रयस्थ म्हणजे सार्वजनिक बांधकाम विभागाकडून करण्यात आले. त्या अहवालानुसार दुकाने बंद करण्याचे आदेश देण्यात आले. याबाबत काही तक्रारी प्राप्त होत असल्याने शनिवारी महापालिकेचा सार्वजनिक बांधकाम विभाग, सार्वजनिक बांधकाम विभाग, राज्य उत्पादन शुल्क विभाग, तसेच नॅशनल हायवे अॅथोरिटी ऑफ इंडिया या विभागाच्या अधिकाऱ्यांनी संयुक्तपणे दिंडोरी, तसेच पेठरोडवरील रस्त्याची मोजणी केली. या मोजणीचा अहवाल समोर आल्यानंतर पुढील कायदेशीर प्रक्रिया राबवली जाईल. शहरातून जाणाऱ्या एखाद्या हायवेचा भाग महापालिकेच्या ताब्यात असल्यास असा प्रश्न निर्माण होऊ शकतो. यातील तांत्रिक बाबींचादेखील आढावा घेतला जात असून, जाणीवपूर्वक दुकानांना अभय देण्याचा प्रश्नच उद््भवत नसल्याचा दावा आवळे यांनी केला. मालेगाव स्टँड परिसरातील काही मद्य विक्री दुकानांबाबत परिसरातील नागरिकांचा आक्षेप असून, या विरोधात अनेकदा मोर्चे काढून निदर्शने करण्यात आली आहेत.
पत्रकारास ठार मारण्याची धमकी
मद्य दुकानाबाबत वार्तांकन करण्यासाठी गेलेल्या पत्रकारास ठार मारण्याची धमकी दिल्याप्रकरणी पंचवटी पोलिसांनी अदखलपात्र गुन्ह्याची नोंद केली आहे. देवानंद बैरागी (रा. हनुमान मंदिरामागे, मालेगाव स्टँड) यांच्या तक्रारीनुसार, शनिवारी सरकारी विभागाचे काही कर्मचारी रस्त्याचे अंतर मोजण्यासाठी मालेगाव स्टॅण्ड परिसरात आले होते. हायवेपासून ५०० मीटरवरील दुकाने बंद करण्याचे आदेश सुप्रीम कोर्टाने दिले असून, मालेगाव स्टँड येथील दुकानांबाबत परिसरातील नागरिकांचा आक्षेप आहे. याच पार्श्वभूमीवर शनिवारी सकाळी मोजणीप्रक्रिया सुरू असताना वार्तांकनासाठी बैरागी घटनास्थळी पोहोचले. या वेळी काळाराम मंदिराचे विश्वस्त पांडुरंग बोडके यांनी मोजणी दिंडोरी नाका येथून करावी, असे सांगत अधिकाऱ्यांशी वाद घातला. संदीप शर्मा आणि बोडके यांनी बैरागी यांना शिवीगाळ करीत ठार मारण्याची धमकी दिली. या प्रकरणी पंचवटी पोलिसांनी अदखलपात्र गुन्हा नोंदवला असून, पुढील तपास सुरू आहे.
मोबाइल अॅप डाउनलोड करा आणि राहा अपडेट
