रेल्वे व वेअर हाउसला वर्षाकाठी लाखो रुपयांचा महसूल मिळवून देणाऱ्या रेल्वे मालधक्क्यासह येथील शेकडो माथाडी कामगार आजही मूलभूत सुविधांच्या प्रतीक्षेत आहेत. करोडो रुपयांच्या मालाची ने-आण या मालधक्क्यावरून होत असूनही येथील सुरक्षाव्यवस्था मात्र रामभरोसे आहे.
नाशिकरोड रेल्वे स्थानकाला लागूनच रेल्वे मालधक्का आहे. येथे सिमेंटसारखा दररोज लाखो टन माल उतरवला जातो. या मालधक्क्यावर सध्या दिवसा २५०, तर रात्रपाळीत १०० माथाडी कामगार काम करतात. परंतु, या मालधक्क्याच्या सुरक्षेचे तीनतेरा वाजले असल्याचे चित्र सध्या दिसून येते.
रेल्वे मालधक्क्याची संरक्षक भिंत अनेक ठिकाणी ढासळली आहे. त्यामुळे मालधक्क्यावर अनधिकृत व्यक्तींचा वावर वाढला असून, चोऱ्यांचे प्रमाणही वाढले आहे. भटकी जनावरे थेट रेल्वे ट्रॅकवर येत आहेत. प्रवासीही या मार्गाने ये-जा करीत आहेत. पूर्वेला संरक्षक भिंतच नसल्याने चेहेडी रस्त्याने पायी येणारे प्रवासी व सायकलस्वार थेट रेल्वे रूळ ओळांडून येतात. त्यामुळे येथे अपघात होण्याची शक्यता आहे.
--
इन-आऊट एकाच मार्गाने
मालधक्क्यावर दररोज शेकडो ट्रक येतात. या गाड्यांसाठी इन व आउटसाठी एकच मार्ग आहे. बाहेर पडणाऱ्या लोडेड गाड्या देवळालीगाव राजवाड्यातील रहिवासी भागातून जातात. त्यामुळे येथे अनेकदा छोटे-मोठे अपघात झाले आहेत. बाहेर जाण्यासाठीचा रस्ता वेगळा असावा, अशी गेल्या अनेक वर्षांपासूनची मागणी अद्याप प्रलंबित आहे.
--
कामगारांचे हाल
येथील कामगारांना कोणत्याही स्वरुपाच्या मूलभूत सुविधा मिळत नसल्याने त्यांच्याही आरोग्याचा प्रश्न निर्माण झाला आहे. रेल्वे मालधक्क्यावर दोन स्वच्छतागृहे आहेत. परंतु, त्यापैकी एक २००६ पासून बंदच आहे, तर दुसऱ्याची पडझड झाली आहे. त्यामुळे येथील माथाडी कामगारांना शौचविधीसाठी उघड्यावरच जावे लागते. या मालधक्क्यावर सुमारे ७०० परवानाधारक माथाडी कामगार आहेत. मात्र, त्यांच्या आरोग्यासाठी येथे कोणतीही सुविधा उपलब्ध नाही. साधी प्रथमोपचार पेटीदेखील येथे उपलब्ध नाही. काम करताना कामगार जखमी झाल्यास त्यांना स्वखर्चाने उपचारांसाठी बाहेर जावे लागते. रेल्वे मालधक्क्यावरील कामगारांसाठीचे विश्रांतिगृह २००६ पासून बंद आहे. त्यामुळे माथाडी कामगारांना वेअर हाउसमधील सिमेंटच्या धुळीतच विश्रांती घ्यावी लागते. परिणामी या कामगारांना श्वसनविषयक विकार जडले आहेत.
----
रेल्वेकडून मूलभूत सुविधा मिळत नसल्याने आंध्रप्रदेशसह महाराष्ट्रातील चंद्रपूर व भादली येथून रस्तामार्गे सिमेंटची वाहतूक वाढली आहे.
-शिवनारायण सोमाणी, कार्टिंग एजंट
--
रेल्वे मालधक्क्यावरील कामगारांना आरोग्य व सुरक्षाविषयक कोणत्याही सुविधा मिळत नाहीत. मात्र, पगारातून माथाडी बोर्ड ३५ टक्के लेव्ही कपात करते.
-रामबाबा पठारे, जिल्हा संपर्कप्रमुख, रिपब्लिकन एम्प्लॉईज फेडरेशन
मोबाइल अॅप डाउनलोड करा आणि राहा अपडेट
