म. टा. वृत्तसेवा, सातपूर
एमआयडीसी वसाहतीत उघड्यावर सर्रासपणे कचरा जाळला जात आहे. कचरा जाळणाऱ्या अशा व्यक्तींवर महापालिका आरोग्य विभाग दुर्लक्ष करीत आहे. त्यामुळे नेमकी कारवाई करणार कोण असा प्रश्न जागरुक नागरिकांकडून उपस्थित केला जात आहे.
उघड्यावर घाण, कचरा फेकणे गुन्हा असतांना कचरा जाळण्याचे प्रकार मात्र सातत्याने दिसून येत आहेत. अंबड आणि सातपूर एमआयडीसी परिसरात पडून असलेल्या भूखंडांच्या बाजूला कचरा जाळण्याचे प्रकार नित्याचेच झाले आहेत. परंतु, कचरा जाळणाऱ्यांवर कारवाई करणार कोण, असा सवाल उपस्थित केला जात आहे. विशेष म्हणजे वर्षांनुवर्ष बंद असलेल्या कारखान्यांच्या भूखंडांवर व त्याबाजूला असलेल्या जागेवर कचरा जाळण्याचे प्रकार सर्वाधिक होत असतात. उघड्यावर कचरा जाळणाऱ्यांवर महापालिकेने दंडात्मक कारवाईची जोरदार मोहीम राबविली. मात्र, काही दिवसांपासून आरोग्य विभागाची मोहीम थंड पडल्याने उघड्यावर कचरा जाळण्याचे प्रमाण वाढले आहे. महापालिकेच्या आरोग्य विभागाने याकडे तात्काळ लक्ष घालत उघड्यावर कचरा जाळणाऱ्यांवर तात्काळ कारवाई करावी, अशी मागणी पर्यावरणप्रेमींनी केली आहे.
सातपूर व अंबड एमआयडीसी वसाहतीत बंद कारखान्यांच्या भूखंडांवर उघड्यावर कचरा जाळला जात आहे. मात्र, याकडे महापालिकेच्या आरोग्य विभागाकडून दुर्लक्ष केले जात आहे.
- राहुल आहिरराव, पर्यावरण प्रेमी
मोबाइल अॅप डाउनलोड करा आणि राहा अपडेट
