नाशिक : सरकार विभागाच्या सावळ्या-गोंधळाच्या अनेक सूरस कथा वारंवार समोर येतात. असाच प्रकार आताही समोर आला आहे. दिंडोरी तालुक्यातील वणी येथे ग्रामीण रुग्णालयाच्याच जागेत तब्बल तीन कोटी रुपये खर्चून अत्याधुनिक ट्रॉमा केअर युनिट बांधले असले तरी त्याचा कुठलाच थांगपत्ता आरोग्य विभागाला नाही. त्यामुळे हे सेंटर उभारूनही अद्याप धूळखातच पडले आहे. समन्वयाअभावी हा सारा प्रकार होत असतानाच हे सेंटर प्रत्यक्षात कधी सुरू होईल, याबाबत साशंकताच आहे.
अपघातग्रस्तांना मदत मिळावी, यासाठी दिंडोरी तालुक्यातील वणी येथे ट्रॉमा केअर सेंटर उभारण्याचा निर्णय झाला. लोकप्रतिनिधींच्या शिफारशींनुसार आदिवासी विकास भवनने लागलीच सुमारे तीन कोटी रुपयांचा निधी मंजूर केला. सार्वजनिक बांधकाम खात्याने तत्परता दाखवित बांधकाम केले. ठेकेदाराचे बिलही अदा झाले. मात्र, असे काही काम सुरू असल्याचे आरोग्य विभागाच्या गावी पोहचलेच नाही. इमारतीचे काम पूर्ण झाले पण आता मनुष्यबळच उपलब्ध होत नाही. पदांना नक्की कधी मंजुरी मिळेल आणि प्रत्यक्षात ट्राम्प सेंटर कधी सुरू होईल, याबाबत अनभिज्ञताच आहे.
शहराच्या तुलनेत ग्रामीण भागात जीवघेण्या अपघाताचे प्रमाण मोठे आहे. रस्ते अपघातानंतर वेळेत उपचार मिळाले नाहीत म्हणून शेकडो नागरिकांचा दरवर्षी मृत्यू होतात. या पार्श्वभूमीवर राज्य सरकारने महत्त्वाच्या रस्त्यांवर ट्राम्प सेंटर सुरू करण्याचा महत्त्वपूर्ण निर्णय झाला होता. या सेंटरमध्ये २४ तास अस्थीरोग तज्ज्ञ, भूलतज्ज्ञ, फिजीशियन, रेडिओलॉजिस्ट असा प्रशिक्षित कर्मचारी वर्ग तैनात करण्यात येतो. ट्रामा सेंटरसाठी किमान ३० ते ४० डॉक्टर व इतर कर्मचाऱ्यांची आवश्यकता आहे. मात्र, आरोग्य विभागाकडे अद्यापपर्यंत मनुष्यबळाबाबतचा प्रस्तावच पोहचला नसल्याचे समोर आले आहे. सर्वांनी मिळून फक्त इमारत बांधण्यावरच जोर दिला. मागील आठवड्यात आरोग्य उपसंचालिका डॉ. लोचना घोडके यांनी वणी ग्रामीण रुग्णालयाला भेट दिल्यानंतर हा प्रकार उघडकीस आला.
वर्षाकाठी ३०० अपघात
श्री सप्तश्रृंगी गडामुळे येथील प्रमुख दोन महामार्गावर भाविकांची वर्षभर मोठी वर्दळ असते. वणी येथे एक ३० खाटांचे ग्रामीण रुग्णालय असून, त्यास १९८४ मध्ये मंजुरी मिळाली आहे. येथे अवघे तीन डॉक्टर कार्यरत आहे. बाळंतपण असो की जीवघेणा अपघात सर्व जबाबदारी थोड्याबहुत कर्मचाऱ्यांवर टाकली जाते. पर्याय नसल्याने अनेकदा पेशंटला सिव्हिल हॉस्पिटलला पाठवले जाते. ट्रॉमा सेंटरचे योग्य नियोजन करून काम झाले असते तर मोठा कर्मचारी वर्ग उपलब्ध झाला असता. या परिसरात वर्षाकाठी ३००च्या आसपास अपघात होतात. नुकतेच कृष्णागाव येथे अपघातात दोघांचा मृत्यू झाला तर एकाला अत्यवस्थ अवस्थेत सिव्हिल हॉस्पिटलला पाठवण्यात आले होते. ट्रॉमा सेंटर सुरू झाल्यास नागरिकांचे हाल थांबतील, अशी अपेक्षा व्यक्त केली जात आहे.
उपचारासाठी प्रवासयातना
नाशिक : शहर आणि जिल्ह्यात रस्ते अपघातात किमान एक हजार व्यक्ती मृत्यूमुखी पडतात. जिल्ह्यात राष्ट्रीय आणि राज्य महामार्गांचे मजबूत जाळे पसरले असून, रस्ते अपघातात वेळीच वैद्यकीय उपचार मिळत नसल्याने बळ जाणाऱ्यांची संख्या लक्षणीय ठरते. या पार्श्वभूमीवर ट्रॉमा केअर सेंटर महत्त्वाचे ठरतात. दुर्दैवाने जिल्ह्यातील ट्रॉमा सेंटर कागदावरच असून, जखमींना दोन ते तीन तासांच्या अंतराने उपचार मिळतो.
जिल्ह्यात जीवघेण्या अपघातांमध्ये सिन्नर तालुक्याचा प्रथम क्रमांक लागतो. सिन्नर, मुसळगाव आणि वावी पोलिस स्टेशन हद्दीत वर्षात शभंरावर नागरिकांचा रस्ते अपघातात मृत्यू होतो. या ठिकाणी ट्रॉमा सेंटरसाठी जागेची अनेक वर्षांपासून शोधाशोध सुरू आहे. मात्र, जागाच उपलब्ध होत नाही. इगतपुरीच्या सेंटरचे बांधकाम ७५ टक्क्यांपर्यंत पोहचले आहे. चांदवड आणि सटाणा या अपघातप्रवण तालुक्यांमध्ये ट्रॉमा सेंटर सुरू असल्याचे सांगितले जाते. येथील इमारती बांधण्यात आल्या आहेत. मात्र, प्रत्यक्षात भूलतज्ज्ञ आहे तर अस्थीरोगतज्ज्ञ नाही, अशी परिस्थिती आहे. ट्रॉमा केअर सेंटरमध्ये किमान चार ते पाच तज्ज्ञ डॉक्टर आणि २० पेक्षा अधिक सहायक कर्मचाऱ्यांची आवश्यकता असते. अपघातातील जखमींवर उपचार करण्यासाठी आधुनिक यंत्रसामुग्रीदेखील आवश्यक आहे. मात्र, याचा गांभीर्याने विचार होत नाही. अपघातानंतर जखमींना थेट सिव्हिल हॉस्पिटलमध्ये आणण्यात येते. शहरापासून दूरवर झालेल्या अपघातग्रस्तांना दोन ते तीन तासांनी उपचार मिळतो. यामुळे मृत्यूमुखी पडणाऱ्यांचे प्रमाण वाढत असून, राज्य सरकारने याचा गंभीरतेने विचार करावा, अशी मागणी केली जात आहे.
मोबाइल अॅप डाउनलोड करा आणि राहा अपडेट
